ಚುಕ್ಕಿ ಚೆಲ್ಲ್ಯಾವೆ

• ರಘುನಾಥ ಚ.ಹ.

ಅಂಗಳದ ತುಂಬ

ಚೆಲ್ಲಾಡ್ಯಾವ ಚುಕ್ಕಿ

ಯಾರಿಟ್ಟರು

ಪುಟ್ಟಿಯ ಬಾಯಲ್ಲಿ ಗಿಲಕಿ

*

ಅಂಟು ತೀರಿದ
ಚುಕ್ಕಿ
ಫಳಕ್ಕನೆ ಕಳಚಿದ ಗಳಿಗೆ
ಅರಳಿದವು
ಸಾವಿರ ಹೂವು

*

ಅದ್ಯಾರೊ
ಹುಡುಗಿ
ಬಲು ಚಾಲಾಕಿ
ಕತ್ತಲಲ್ಲೂ ಇರಿಸಿದ್ದಾಳೆ
ತಪ್ಪಿರದ ಚುಕ್ಕಿ

*

ಸದಾ
ಮಿನುಗುತ್ತೀಯಲ್ಲ ಚುಕ್ಕಿ
ಯಾವ ಸೋಪು ಬಳಸುತ್ತಿ ?

*

ಚುಕ್ಕಿ
ಹಗಲಿನಲ್ಲಿ ನಿಂದು ನಿದ್ರೇನ
ಸೂರ್ಯನ ಬಿಸಿಲಿಗೆ
ಕಪ್ಪಾಗುವ ಭಯಾನ

*

ಖದೀಮ ಚಂದ್ರನ
ಬೊಜ್ಜಿನಲ್ಲಿ
ಎಷ್ಟು ಚುಕ್ಕಿಗಳಿವೆಯಾ?

*

ಆಕಾಶ ಮಾರ್ಗದಲ್ಲಿ
ನಡೆದು ಹೋಗಿದ್ದಾಳೆ
ಅದ್ಯಾವಳೊ ಚೆಲುವೆ
ಮುಡಿಯಿಂದ ಜಾರಿದ
ಮಲ್ಲಿಗೆ ಮೊಗ್ಗುಗಳು
ದಾರಿಯುದ್ದಕೂ ಚೆಲ್ಲಿವೆ

*

ಬಾನಂಗಳದ ಮೂಲೆಮೂಲೆಯಲು
ಚಂದ್ರಮ ಚೆಚ್ಚಿದ ಚೆಂಡುಗಳು ;
ಔಟಾಗುವುದೇ ಇಲ್ಲ ಅವನು ಚಾಲಾಕು
ಅಂಪೈರು ಸೂರ್ಯನೇ ಆಟ ನಿಲ್ಲಿಸಬೇಕು.

*

ಆಕಾಶದ ಬಟ್ಟೆಯ ಮೇಲೆ
ಇಡುತ್ತಿದ್ದಾಳೆ ಚಂದ್ರಮ್ಮ ಸಂಡಿಗೆ
ಬಕಾಸುರ ಹಸಿವು ಉರಿಸೂರ್ಯನಿಗೆ
ಸಂಡಿಗೆ ಹಾಗೂ ಚಂದ್ರಮ್ಮ
ಬೆಳಗಿನ ತಿಂಡಿಗೆ

*

ಚುಕ್ಕಿಗಳಿಲ್ಲದ
ಮುಗಿಲು ;
ಕೂಸೊದೆಯದ
ಒಡಲ ದಿಗಿಲು

*

ಎತ್ತರೆತ್ತರ
ಹಾರಿದ ಹಕ್ಕಿಗಳು
ಮುಗಿಲಲ್ಲಿ ನೆಲೆನಿಂತ
ಚುಕ್ಕಿಗಳು

*

ರೇಖೆಗಳ
ಹಂಗ ಮೀರಿದ
ಚುಕ್ಕಿಗಳ ಚಿತ್ತಾರ
ಅಳತೆಗೋಲುಗಳ
ಪರಿಧಿ ಮೀರಿದ
ಚಿತ್ರಕಾರ

*

ಮುಗಿಲ
ಮಾಳಿಗೆಯಲ್ಲಿ
ಮಲ್ಲಿಗೆ
ಚೆಲ್ಲಾಪಿಲ್ಲಿ

ಮುಖಪುಟ / ಸಾಹಿತ್ಯ-ಸಂಸ್ಕೃತಿ