ಮೆಟ್ಟಲಾಗದ ಮುಗಿಲು

• ಡಿ.ವಿ. ಪ್ರಹ್ಲಾದ್‌
  [email protected]

ಬಿಳಿಯ ಆ ಏರು ಎತ್ತರದ

ಜಗದ ಮೋಡದ ಮಾಡಿಗೆ

ಹೆಸರಿಟ್ಟವರು ಯಾರು

ಏರಿದಷ್ಟೂ ಎವರೆಷ್ಟು
ಉಳಿಯುತ್ತದೆ ರವಷ್ಟು

ತೆರೆದ ಅಂಗಡಿಯ ತೆರದಿ
ಕಟ್ಟಕಡೆಯ ಗುಟ್ಟಿನರಿವೆಯ ತೊರೆದು
ಮಲಗಿರುವ ತರಳೆಯನ್ನ ಮಣಿಸಿ
ಮುಂದೇನ ಗೆಲ್ಲಲಿ ? ಎಂದು
ಎದೆಯುಬ್ಬಿಸಿ ನಿಂತವರಿಗೆ
ಎರಡೇ ಎರಡು ಮೆಟ್ಟಿಲೇರಲು
ಇವತ್ತು ಉಬ್ಬಸ-ಪ್ರಯಾಸ

ಮುದುರಿನಿಂತ ಕುದುರೆಗೆ
ಕೆನೆತವಿಲ್ಲ , ಅವತ್ತಿನ ಮೊರೆತವಿಲ್ಲ

ಕೈಗೆ ಮೆತ್ತಿದ ಬಣ್ಣ ನೆನಪು
ಎಷ್ಟು ತೊಳೆದರೂ ಜಾರದು
ಹೆಜ್ಜೆ ಗುರುತುಗಳೆಲ್ಲಾ
ಹಿಮದಡಿಯ ಸಮಾಧಿ

ಈ ಹತ್ಯೆ ಹತಾರುಗಳ
ಹೊತ್ತ ಧೀರರ ಯಾವ ಮಾತೂ
ಅಲ್ಲಿ , ನಿಲ್ಲಲೆಡೆಯಿಲ್ಲ
ಅದೇ ಶೂನ್ಯ ಮೌನದ
ಹಿಮದ ನಿರುತ್ತರ

ತೆರೆದ ಅಂಗಡಿಯ ತೆರದಿ ಕಂಡವರಿಗೆ
ನಿಗೂಢ ಗುಹೆಯ ಕೀಲಿ ಕೈ
ದೊರಕಲೇ ಇಲ್ಲ

ಮಾತಿನೆತ್ತರ ಮೌನದೆತ್ತರ
ಮಾತು-ಮೌನ-ಅರ್ಥಗಳ
ಮೀರಿದ ವಿಸ್ತಾರ
ಮೂರ್ತವಾಗಲೇ ಇಲ್ಲ

ಮೆಟ್ಟಿ ಬಾವುಟ ನೆಟ್ಟ
ಪ್ರತಿ ಎತ್ತರದ ತುದಿಗೂ
ಒಂದೊಂದು ಬಟಾ ಬಯಲು

ತರಳೆ ಮಾತ್ರಾ ನಿರುಮ್ಮಳ
ಮಲಗಿದ್ದಾಳೆ
ಏರಿ ಬರುವವರ
ಮತ್ತೆ ಮತ್ತೆ ಕರೆದು

ಮುಖಪುಟ / ಸಾಹಿತ್ಯ-ಸಂಸ್ಕೃತಿ