ಚಂದ್ರಾಮನ ಮೋಡಿ

• ರೇಣುಕಾ ಶ್ಯಾಮ್‌, ನವದೆಹಲಿ
  [email protected]

ಮುಗಿಲಪ್ಪನ ಹಟ್ಟಿಯ ನೀಲಿ ಮಾಡಿನಲಿ,

ಕಿಲುಗುಡುವ ಚುಕ್ಕಿಗಳ ಖಾಲಿ ಗೂಡಿನಲಿ,

ಬೆಳ್ಳಿ ಗಿಂಡಿಯ ತುಂಬ ಕರೆದು ನೊರೆಹಾಲು

ಸುರಿದಂಗ ಬೆಳಗ್ಯಾನೋ ಚೆಲುವ ಚೆನ್ನಿಗನು

ಚೆಲುವ ಚೆನ್ನಿಗ ನಮ ಚಂದ್ರಾಮ..

ಅಂಗಳದ ತುಂಬೆಲ್ಲ ರಂಗೋಲಿ ಎಳೆದಾನೋ,
ಗಂಗಾಳದ ಬಾನಕ್ಕೆ ಕೆನೆಮೊಸರು ನೀಡ್ಯಾನೋ,
ಚಪ್ಪರದ ಅವರಿಯ ಹೂವಾಲ್ಲಿ ಅಡಿಗ್ಯಾನೋ,
ತೊಟ್ಟಿಲದ ಹಸುಗೂಸಿನ ಮಾರಿಯ ತೊಳದಾನೋ....
ಮಾರಿಯ ತೊಳದಾನೋ ನಮ ಚಂದ್ರಾಮ.

ಕಾಡು ಮೇಡಲಿ ನುಸುಳಿ ಅರಸರಸಿ ಅಲೆದಾನೋ,
ಮುಂಬಾಗಿಲ ತುಂಬೆಲ್ಲ ಸಿರಿಬೆಳಕ ಚೆಲ್ಲ್ಯಾನೋ,
ಮೆಲ್ಲಗೆ ಹಿತ್ತಲ ನಸುಬಳ್ಳಿಯ ತಡವ್ಯಾನೊ,
ಗಡಬಡಿಸಿ ಮೋಡಗಳ ಚದುರಿಸುತ ಓಡ್ಯಾನೋ.
ಚದುರಿಸುತ ಓಡ್ಯಾನೋ ನಮ ಚಂದ್ರಾಮ

ಉಕ್ಕೇರಿ ಸೊಕ್ಕೇರಿ ಅಂಬುಧಿಯು ಮೆರೆದಾಳು,
ಹುಚ್ಚೇರಿ ಮತ್ತೇರಿ ವನರಾಜೀ ನಕ್ಕಾಳು,
ನೊಂದೊರಿಗೆ ಬೆಂದೊರಿಗೆ ತಂಬೆಳಕ ತಂದಾನೊ
ಕಾರ್ತಿಕದ ದೀವಳಿಗೆಗೆ ಹೊಂಬೆಳಕ ತುಂಬ್ಯಾನೋ....
ಹೊಂಬೆಳಕ ತುಂಬ್ಯಾನೋ ನಮ ಚಂದ್ರಾಮ !

ಇರುಳ ಹೊಳೆಸಾಲಲ್ಲಿ ಬೆಳ್ಳಕ್ಕಿ ಹಾರ್ಯಾವು.
ಹಗಲ ಮಗ್ಗುಲ ಸರಿದು ನಿಶೆಯು ತೂಕಡಿಸ್ಯಾಳು,
ಚಿಕ್ಕರಸಿಯ ಕಣ್ಗೊಳದಿ ಕನಸುಗಳು ತೇಲ್ಯಾವು,
ಲೌಕಿಕದ ಸೊಂಕುಗಳು ವಿಸ್ಮಯದಿ ಓಡ್ಯಾವು,
ಬೆರಗಾಗಿ ನಕ್ಕಾನೋ ನಮ ಚಂದ್ರಾಮ !!

ಮುಖಪುಟ / ಸಾಹಿತ್ಯ-ಸಂಸ್ಕೃತಿ