ಬಾರಿನಲ್ಲೊಂದು ಭಾವಗೀತೆ

• ಪ್ರವೀಣ್‌.ಬಿ.ಎಸ್‌, ಬೆಂಗಳೂರು.
  [email protected]

ನಿಶೆ ಏರಿದ ಸಮಯದಲ್ಲಿ ,

ನಶೆಗಾಗಿ ಬರುವರು ತೆವಲಿನವರು,

ಬಂದವರು ಯಾರಾದರೇನು,
ಒಳಗೆ ಬಂದವರು ಸುಮ್ಮನೆ ಹೋಗುವರೇನು?

ಪ್ರತಿ ಮೇಜಿನಲ್ಲು ಮಾತು,ನಗು,ಕೇಕೆ
ಚಿಂತೆಯ ಮರೆಯಲು, ಸಂತಸ ಹಂಚಲು ,
ಕುಡಿಯಲೊಂದು ಕಾರಣ ಬೇಕೆ ?

ಬೀರ್‌,ರಮ್‌,ವಿಸ್ಕಿಗಳ ಪ್ರವಾಹ ಸಾಗುತ್ತದೆ ಗಂಟಲಲ್ಲಿ,
ನೋವಿನ ಆಲಾಪ ಹರಿಯುತ್ತದೆ ನಾಲಿಗೆಯಲ್ಲಿ,
ಅದಕ್ಕೆ ಕೊನೆಯೆಂಬುದು ಎಲ್ಲಿ ? ಎಲ್ಲಿ ?

ಮಂದ ಬೆಳಕಲ್ಲಿ , ಯಾರು ನೋಡುತ್ತಿಲ್ಲ ಎಂಬ ಹಮ್ಮಿನಲ್ಲಿ,
ಕುಳಿತಿರುವವರೆಲ್ಲಾ ಸತ್ಯ ಹರಿಶ್ಚಂದ್ರರೇ......
ತಿಳಿಯದೇ ಇವರಿಗೆ ಮನೆಯಲ್ಲೊಂದು ಜೀವ ಕಾಯುತ್ತಿರುವ ಸತ್ಯ?

ದುಡಿದ ಹಣವನೆಲ್ಲಾ ಸುರಿವರು,
ಬರಿಗೈಯಲ್ಲಿ ತೂರಾಡುತ್ತ ಮರಳುವರು,
ಮದಿರೆ ಕೊಡುವವ ಕೇಳುತ್ತಾನೆಯೇ ಇದು ಮಕ್ಕಳ ಗಂಜಿ ಹಣವಾ ಎಂದು?

ಬರಿಗೈ ಸರದಾರ ತೆರಳುವನು ಮನೆಯ ಕಡೆಗೆ,
ತೂರಾಡುತ್ತ ಹಾಕುವನು ದಿಕ್ಕು ಕಾಣದ ಹೆಜ್ಜೆಗಳನ್ನ,
ಮತ್ತದೇ ಮರುಕಳಿಸಲು ಬರುವರು ಇನ್ಯಾರೋ ಒಳಗೆ.....

ಮುಖಪುಟ / ಸಾಹಿತ್ಯ-ಸಂಸ್ಕೃತಿ