ನಾನು ಮದ್ಯಪಾನ ವ್ಯಸನಿಯಾಗಿದ್ದೆ, ದಯವಿಟ್ಟು ಅಪರಾಧಿಗಳಂತೆ ನೋಡಬೇಡಿ: ಸ್ವಂತ ಅನುಭವ ಹೇಳಿಕೊಂಡ ನಟಿ ಜಾನ್ವಿ ಕಪೂರ್
ಬಾಲಿವುಡ್ ನಟಿ ಜಾನ್ವಿ ಕಪೂರ್ ಅವರು ತಮ್ಮ ವೈಯಕ್ತಿಕ ಜೀವನದ ಕರಾಳ ಅಧ್ಯಾಯವೊಂದನ್ನು ಬಿಚ್ಚಿಟ್ಟಿದ್ದು, ತಾವು ಮದ್ಯಪಾನದ ವ್ಯಸನಕ್ಕೆ ತುತ್ತಾಗಿದ್ದ ವಿಷಯ ಹಾಗೂ ಅದರಿಂದ ಹೊರಬರಲು ನಡೆಸಿದ ಕಠಿಣ ಹೋರಾಟದ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ. ಇತ್ತೀಚೆಗೆ ಸಾಮಾಜಿಕ ಸಂಘಟನೆಯೊಂದು ಆಯೋಜಿಸಿದ್ದ ಜಾಗೃತಿ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಅವರು, ಈ ಗಂಭೀರ ವಿಷಯವನ್ನು ಯಾವುದೇ ಮುಚ್ಚುಮರೆಯಿಲ್ಲದೆ ಹಂಚಿಕೊಂಡಿದ್ದಾರೆ. ವ್ಯಸನದ ವಿರುದ್ಧ ಹೋರಾಡುತ್ತಿರುವವರನ್ನು ಅಪರಾಧಿಗಳಂತೆ ನೋಡಬಾರದು ಎಂದು ಅವರು ಇದೇ ವೇಳೆ ಒತ್ತಿ ಹೇಳಿದ್ದಾರೆ.
ಜಾನ್ವಿ ಅವರ ಪ್ರಕಾರ, ಡ್ರಗ್ಸ್ ಅಥವಾ ಮದ್ಯಪಾನದ ವ್ಯಸನವು ಕೇವಲ ನೈತಿಕ ಪತನವಲ್ಲ, ಬದಲಾಗಿ ಅದು ಒಂದು ಮಾನಸಿಕ ಆರೋಗ್ಯ ಸಮಸ್ಯೆಯಾಗಿದೆ. ಒತ್ತಡ, ಆತಂಕ ಮತ್ತು ಭಾವನಾತ್ಮಕ ಒತ್ತಡಗಳು ವ್ಯಕ್ತಿಯನ್ನು ಇಂತಹ ಅಭ್ಯಾಸಗಳತ್ತ ದೂಡುತ್ತವೆ. ಇಂತಹ ಸಮಯದಲ್ಲಿ ಸಮಾಜವು ಅವರನ್ನು ದೂರವಿಟ್ಟರೆ ಪರಿಸ್ಥಿತಿ ಇನ್ನಷ್ಟು ಹದಗೆಡುತ್ತದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ವ್ಯಸನಿಗಳಿಗೆ ಅನುಕಂಪ ಮತ್ತು ಬೆಂಬಲದ ಅಗತ್ಯವಿದ್ದು, ಚೇತರಿಕೆಯ ಹಾದಿಯಲ್ಲಿ ಇದು ಪ್ರಮುಖ ಪಾತ್ರ ವಹಿಸುತ್ತದೆ ಎಂದು ಅವರು ಜನರಲ್ಲಿ ಮನವಿ ಮಾಡಿದ್ದಾರೆ.
ತಮಾಷೆಗಾಗಿ ಮದ್ಯಪಾನ ಕಲಿತೆ
ತಮ್ಮ ಸ್ವಂತ ಅನುಭವವನ್ನು ಬಿಚ್ಚಿಟ್ಟ ಜಾನ್ವಿ, ಆರಂಭದಲ್ಲಿ ಕೇವಲ ತಮಾಷೆಗಾಗಿ ಅಥವಾ ಸಾಂದರ್ಭಿಕವಾಗಿ ಮದ್ಯಪಾನ ಮಾಡಲಾರಂಭಿಸಿದೆ, ಆದರೆ ಕ್ರಮೇಣ ಅದು ಗಂಭೀರ ವ್ಯಸನವಾಗಿ ಬದಲಾಯಿತು ಎಂದು ಒಪ್ಪಿಕೊಂಡಿದ್ದಾರೆ. ಮದ್ಯಪಾನವು ತಮ್ಮ ಜೀವನದಲ್ಲಿ ಅರಿವಿಲ್ಲದೆಯೇ ನಿಯಂತ್ರಣ ಸಾಧಿಸಿದ ಒಂದು 'ವಿಲನ್' ಎಂದು ಅವರು ಕರೆದಿದ್ದಾರೆ. ಪ್ರತಿದಿನ ಬೆಳಗ್ಗೆ ಎದ್ದಾಗ ತೀವ್ರವಾದ ಹ್ಯಾಂಗೋವರ್ ಮತ್ತು ಮದ್ಯದ ವಾಸನೆ ಬಂದರೂ ಅಸಹ್ಯವಾಗುವಂತಹ ಸ್ಥಿತಿ ತಲುಪಿದಾಗ, ಅವರ ಜೀವನದಲ್ಲಿ ದೊಡ್ಡ ಬದಲಾವಣೆ ಉಂಟಾಯಿತು. ಆ ಹಂತವೇ ಅವರು ತಮ್ಮ ಪರಿಸ್ಥಿತಿಯ ವಾಸ್ತವವನ್ನು ಅರ್ಥಮಾಡಿಕೊಳ್ಳಲು ಮತ್ತು ಚೇತರಿಕೆಯತ್ತ ಹೆಜ್ಜೆ ಇಡಲು ಪ್ರೇರಣೆಯಾಯಿತು ಎಂದು ಹೇಳಿದ್ದಾರೆ.
ಜಾನ್ವಿ ಕಪೂರ್ ತಮ್ಮ ಮಾತನ್ನು ಮುಂದುವರಿಸುತ್ತಾ, ವ್ಯಸನವು ನಮ್ಮ ನಡವಳಿಕೆ ಮತ್ತು ಸಂಬಂಧಗಳ ಮೇಲೆ ನಿರಂತರವಾಗಿ ಪ್ರಭಾವ ಬೀರುವ ಒಬ್ಬ ಅಪರಿಚಿತ ವ್ಯಕ್ತಿಯೊಂದಿಗೆ ಬದುಕುವಂತೆ ಭಾಸವಾಗುತ್ತದೆ ಎಂದು ವಿವರಿಸಿದರು. ಈ ಅಭ್ಯಾಸದಿಂದಾಗಿ ಅವರು ತಮ್ಮ ಸ್ನೇಹಿತರು ಮತ್ತು ಕುಟುಂಬದವರಿಂದ ದೂರ ಉಳಿಯುವಂತಾಗಿತ್ತು. ಈ ಅಭ್ಯಾಸ ಮಾಡುತ್ತಿದ್ದ ಹಾನಿಯನ್ನು ಸಂಪೂರ್ಣವಾಗಿ ಅರಿತುಕೊಂಡ ನಂತರವೇ, ಅವರು ಅದರಿಂದ ಮುಕ್ತರಾಗಲು ಪ್ರಜ್ಞಾಪೂರ್ವಕ ಕ್ರಮಗಳನ್ನು ಕೈಗೊಂಡರು. ಅವರ ಈ ಮಾತುಗಳು ವ್ಯಸನವು ಮನಸ್ಸಿನ ಮೇಲೆ ಎಂತಹ ಹಿಡಿತ ಸಾಧಿಸುತ್ತದೆ ಮತ್ತು ಅದರಿಂದ ಹೊರಬರಲು ಎಷ್ಟು ನಿರಂತರ ಶ್ರಮ ಬೇಕು ಎಂಬುದನ್ನು ವಿವರಿಸಿದ್ದಾರೆ.
ಇನ್ನು ಜಾನ್ವಿ ಕಪೂರ್ ಅವರ ವೃತ್ತಿಜೀವನದ ಬಗ್ಗೆ ಹೇಳುವುದಾದರೆ, ಅವರು ಬುಚ್ಚಿ ಬಾಬು ಸನಾ ನಿರ್ದೇಶನದ 'ಪೆದ್ದಿ' ಚಿತ್ರದಲ್ಲಿ ರಾಮ್ ಚರಣ್ ಅವರಿಗೆ ಜೋಡಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ನಟಿಯಾಗಿ ಯಶಸ್ಸಿನ ಉತ್ತುಂಗದಲ್ಲಿರುವಾಗಲೇ ತಮ್ಮ ಜೀವನದ ಇಂತಹ ಸೂಕ್ಷ್ಮ ವಿಷಯವನ್ನು ಹಂಚಿಕೊಳ್ಳುವ ಮೂಲಕ ಸುದ್ದಿಯಲ್ಲಿದ್ದಾರೆ.
Click it and Unblock the Notifications
Sign in with Google