ಬೆಳಗಾವಿ: ಹುಬ್ಬಳ್ಳಿ, ಗೋವಾ, ಹೈದರಾಬಾದ್ಗೆ ಪ್ರತಿದಿನದ ವಿಮಾನ, ವೇಳಾಪಟ್ಟಿ
ಬೆಳಗಾವಿ, ಅಕ್ಟೋಬರ್ 27: ಬೆಳಗಾವಿಯ ವಿಮಾನ ಪ್ರಯಾಣಿಕರಿಗೆ ಮಹತ್ವದ ಮಾಹಿತಿಯೊಂದಿದೆ. ಸಾಂಬ್ರಾ ವಿಮಾನ ನಿಲ್ದಾಣದಿಂದ ವಿವಿಧ ನಗರಗಳಿಗೆ ಪ್ರತಿದಿನದ ವಿಮಾನ ಸೇವೆ ಆರಂಭವಾಗುತ್ತಿದೆ. ಈ ಹೊಸ ಮಾರ್ಗದ ವಿಮಾನ ಸೇವೆಯ ವೇಳಾಪಟ್ಟಿಯನ್ನು ಡಿಜಿಸಿಎ ತನ್ನ ಚಳಿಗಾಳದ ವೇಳಾಪಟ್ಟಿಯಲ್ಲಿಯೂ ಸಹ ಸೇರಿಸಿಕೊಂಡಿದೆ.
ಫ್ಲೈ-91 ಎಂಬ ವಿಮಾನಯಾನ ಸಂಸ್ಥೆ ಬೆಳಗಾವಿಯಿಂದ ಗೋವಾ, ಹುಬ್ಬಳ್ಳಿ ಮತ್ತು ಹೈದರಾಬಾದ್ಗೆ ಪ್ರತಿದಿನದ ವಿಮಾನ ಸೇವೆಯನ್ನು ಒದಗಿಸಲಿದೆ. ಬೆಳಗಾವಿಯಿಂದ ಹಲವು ವಿಮಾನಗಳು ರದ್ದಾಗುವ ಸಂದರ್ಭದಲ್ಲಿ ಹೊಸದಾಗಿ ವಿಮಾನ ಸೇವೆ ಆರಂಭವಾಗುತ್ತಿರುವುದು ಜನರಿಗೆ ಸಂತಸ ತಂದಿದೆ.
ಬೆಳಗಾವಿ-ಹೈದರಾಬಾದ್, ಬೆಳಗಾವಿ-ಹುಬ್ಬಳ್ಳಿ, ಬೆಳಗಾವಿ-ಗೋವಾ ನಡುವೆ ಫ್ಲೈ-91 ಪ್ರತಿದಿನದ ವಿಮಾನ ಸಂಪರ್ಕವನ್ನು ಕಲ್ಪಿಸಲಿದೆ. ನವೆಂಬರ್ ತಿಂಗಳಿನಿಂದ ಈ ವಿಮಾನಗಳ ಹಾರಾಟ ಆರಂಭವಾಗಲಿದ್ದು, ಫ್ಲೈ-91 ವಿಮಾನದ ವೇಳಾಪಟ್ಟಿಯ ಮಾಹಿತಿಯನ್ನು ಸಹ ಬಿಡುಗಡೆ ಮಾಡಿದೆ.
ವಿಮಾನದ ವೇಳಾಪಟ್ಟಿ: ಫ್ಲೈ-91 ಬೆಳಗಾವಿ-ಹೈದರಾಬಾದ್ ನಡುವೆ ಐಸಿ 1843 ಸಂಖ್ಯೆಯ ವಿಮಾನಗಳ ಕಾರ್ಯಾಚರಣೆ ನಡೆಸಲಿದೆ. ಈ ವಿಮಾನ ಹೈದರಾಬಾದ್ನಿಂದ 10.55ಕ್ಕೆ ಹೊರಟು, 11.45ಕ್ಕೆ ಬೆಳಗಾವಿಗೆ ಆಗಮಿಸಲಿದೆ. ಈ ವಿಮಾನ ಪ್ರತಿದಿನ ಸಂಚಾರವನ್ನು ನಡೆಸಲಿದೆ. ಬೆಳಗಾವಿ-ಹೈದರಾಬಾದ್ ವಿಮಾನ ಬೆಳಗಾವಿಯ ಸಾಂಬ್ರಾ ವಿಮಾನ ನಿಲ್ದಾಣದಿಂದ ಬೆಳಗ್ಗೆ 8.35ಕ್ಕೆ ಹೊರಡಲಿದೆ. ಹೈದರಾಬಾದ್ಗೆ 10.25ಕ್ಕೆ ತಲುಪಲಿದೆ. ಈ ವಿಮಾನ ಸಹ ಪ್ರತಿದಿನ ಸಂಚಾರ ನಡೆಸಲಿದೆ.
ಐಸಿ1 1842 ಸಂಖ್ಯೆಯ ವಿಮಾನವನ್ನು ಫ್ಲೈ-91 ಹುಬ್ಬಳ್ಳಿ-ಬೆಳಗಾವಿ ನಡುವೆ ಪ್ರತಿದಿನ ಓಡಿಸಲಿದೆ. ಈ ವಿಮಾನ ಹುಬ್ಬಳ್ಳಿಯನ್ನು ಬೆಳಗ್ಗೆ 7.30ಕ್ಕೆ ಬಿಟ್ಟು, 8 ಗಂಟೆಗೆ ಬೆಳಗಾವಿಗೆ ಆಗಮಿಸಲಿದೆ. ಬೆಳಗಾವಿ-ಹುಬ್ಬಳ್ಳಿ ನಡುವೆ ಐಸಿ 1843 ವಿಮಾನ ಪ್ರತಿದಿನ ಸಂಚಾರ ನಡೆಸಲಿದೆ. ಬೆಳಗಾವಿಯಿಂದ ವಿಮಾನ ಮಧ್ಯಾಹ್ನ 12.15ಕ್ಕೆ ಹೊರಟು, ಹುಬ್ಬಳ್ಳಿಗೆ 12.45ಕ್ಕೆ ತಲುಪಲಿದೆ. ಐಸಿ 1845 ಸಂಖ್ಯೆಯ ವಿಮಾನ ಬೆಳಗಾವಿ-ಹುಬ್ಬಳ್ಳಿ ನಡುವೆ ಸಂಚಾರವನ್ನು ನಡೆಸಲಿದೆ. ಈ ವಿಮಾನ ಬೆಳಗಾವಿಗೆ 20:10ಕ್ಕೆ ಆಗಮಿಸಲಿದೆ.
ಬೆಳಗಾವಿ-ಗೋವಾ ನಡುವೆ ಫ್ಲೈ-91 ಐಸಿ 1845 ವಿಮಾನವನ್ನು ಹಾರಿಸಲಿದೆ. ಬೆಳಗಾವಿಯಿಂದ ವಿಮಾನ 20:40ಕ್ಕೆ ಹೊರಡಲಿದೆ, ಗೋವಾಕ್ಕೆ 21:15ಕ್ಕೆ ತಲುಪಲಿದೆ. ಐಸಿ1844 ಸಂಖ್ಯೆಯ ವಿಮಾನ ಬೆಳಗಾವಿಗೆ ಗೋವಾದಿಂದ 14.25ಕ್ಕೆ ಆಗಮಿಸಲಿದೆ.
ಕೆಲವು ದಿನಗಳ ಹಿಂದೆ ಇಂಡಿಗೋ ವಿಮಾನಯಾನ ಸಂಸ್ಥೆ ಬೆಳಗಾವಿ- ಬೆಂಗಳೂರು ನಡುವಿನ ಬೆಳಗ್ಗೆಯ ನೇರ ವಿಮಾನ ಸೇವೆಯನ್ನು ಅಕ್ಟೋಬರ್ 27ರಿಂದ ನಿಲ್ಲಿಸಲಾಗುತ್ತದೆ ಎಂದು ಹೇಳಿತ್ತು. ಅಲ್ಲದೇ ಬುಕ್ಕಿಂಗ್ ಅನ್ನು ರದ್ದುಗೊಳಿಸಿತ್ತು. ಈಗ ಈ ಮಾರ್ಗದಲ್ಲಿ ಬೆಳಗ್ಗೆ ಸಂಚಾರ ನಡೆಸುವ ಪ್ರಯಾಣಿಕರು ಬೇರೆ ಸಾರಿಗೆ ವ್ಯವಸ್ಥೆಯನ್ನು ನೋಡಿಕೊಳ್ಳಬೇಕು.
ಸುಮಾರು ಎರಡು ವರ್ಷಗಳಿಂದ ಬೆಳಗಾವಿ-ಬೆಂಗಳೂರು ನಡುವೆ ಬೆಳಗ್ಗೆ ನೇರ ವಿಮಾನ ಸೇವೆಯನ್ನು ಇಂಡಿಗೋ ನೀಡುತ್ತಿತ್ತು. ಪ್ರಯಾಣಿಕರಿಂದಲೂ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಆದರೆ ವಿಮಾನಯಾನ ಸಂಸ್ಥೆಯ ಚಳಿಗಾಲದ ವೇಳಾಪಟ್ಟಿಯ ಅನ್ವಯ ಈ ವಿಮಾನ ಸೇವೆಯನ್ನು ರದ್ದುಗೊಳಿಸಲಾಗಿದೆ.
ಈಗಾಗಲೇ ಬೆಳಗಾವಿ ವಿಮಾನ ನಿಲ್ದಾಣದಿಂದ ಸ್ಟಾರ್ ಏರ್ ಜೋಧ್ಪುರ್, ಸೂರತ್, ಇಂಧೋರ್, ನಾಸಿಕ್ ನಡುವಿನ ವಿಮಾನ ಸೇವೆ ರದ್ದುಗೊಳಿಸಿದೆ. ಚಳಿಗಾಲದ ವೇಳಾಪಟ್ಟಿಯಂತೆ ಬೆಳಗಾವಿ-ಅಹಮದಾಬಾದ್ ವಿಮಾನ ಸಹ ರದ್ದಾಗುವ ಸಾಧ್ಯತೆ ಇದೆ. ಆದ್ದರಿಂದ ಬೆಳಗಾವಿಯ ಸಾಂಬ್ರಾ ವಿಮಾನ ನಿಲ್ದಾಣಕ್ಕೆ ಪ್ರಯಾಣಿಕ ವಿಮಾನಗಳ ಸಂಖ್ಯೆ ಕಡಿಮೆಯಾಗಲಿದೆ.
Click it and Unblock the Notifications
Sign in with Google