ಹಕ್ಕಿ

ಮನೆಯು ಕಳೆಯಿತು, ಮನವನರಸುವ ಹಕ್ಕಿ ಆಕಾಶದಲ್ಲಿ ಅಲೆಮಾರಿಯಾಯಿತು!!

• ರಾಮಚಂದ್ರ ಹೆಗಡೆ, ಸಿಂಗಪೂರ್‌

ಲವಲವಿಕೆಯ ಈ ಹಕ್ಕಿ

ಎಲ್ಲಿಂದಲೋ ಹಾರಿ ಬಂದು

ಕದ ತೆರೆದಿದ್ದ ಗೂಡ ಕಂಡು

ತನಗಿದುವೆ ತಾಣವೆಂದು

ಮೆಲ್ಲನೆ ಗೂಡ ಸೇರಿತು;

ತನ್ನನೇ ತಾನು ಮರೆಯಿತು.

ತನ್ನೊಡಲ ಸೇರಿದ ಹಕ್ಕಿಯ

ಇರವು ಗೂಡಿಗೂ ತಿಳಿಯದಾಯ್ತು!

ಮರೆವಿನಲ್ಲಿಯೇ ಕೆಲ ಕಾಲ ಕಳೆಯಿತು
ನಿಧಾನವಾಗಿ ಗೂಡು ಶಿಥಿಲವಾಯಿತು
ಮಲಿನವಾಗಿ ಸವೆದಿರುವ ಮನೆಯಿದು
ತೊರೆಯಲು ಹಕ್ಕಿಗೆ ಪಕ್ವವೆನಿಸಿತು.

ಹಕ್ಕಿಯ ಮರವೆ ಕಳೆಯಿತು
ನಿಶ್ಶಬ್ದವಾಗಿ ಗೂಡ ತೊರೆಯಿತು.
ಗೂಡು ಆ ಕ್ಷಣದಲೆ ನಿರ್ಜೀವವಾಯಿತು
ಪಂಚಭೂತಗಳಲ್ಲಿ ಹಂಚಿ ಹೋಯಿತು.

ಹಕ್ಕಿ ಹೊಸಗೂಡೊಂದನು ಅರಸುತಿದೆ
ಅರೆಮರವೆಯಲ್ಲೀಗ ಅಂತರಿಕ್ಷದಲ್ಲಿದೆ.
ಅದೀಗ ಜನನ ಮರಣಗಳ ನಡುವಿನಲ್ಲಿದೆ
ವಿಸ್ಮಯದ ತ್ರಿಶಂಕು ಸ್ವರ್ಗದಲ್ಲಿದೆ.