ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts
Oneindia App Download

ಕುಂಬಾರನಿಗೊಂದು ವರ್ಷ ದೊಣ್ಣೆಗೊಂದು ನಿಮಿಷ

By Staff
|
Google Oneindia Kannada News

ಕುಂಬಾರನಿಗೊಂದು ವರ್ಷ ದೊಣ್ಣೆಗೊಂದು ನಿಮಿಷ
H.K.Ramapriyan
  • ಹಂ. ಕ. ರಾಮಪ್ರಿಯನ್‌, ಕ್ಲಾರ್ಕ್ಸ್‌ವಿಲ್‌, ಮೇರಿಲೆಂಡ್‌
    [email protected]
ಚೆಂದೊಳ್ಳೆ ಮಡಕೆಯನು ಕುಂಬಾರ ಮಾಡಿದನು ಕಷ್ಟದಿಂ ವರುಷದಲ್ಲಿ
ತಂದೊಂದು ದೊಣ್ಣೆಯನು ಮತ್ತೊಬ್ಬ ಮುರಿದನದ ಸುಲಭದಿಂ ನಿಮಿಷದಲ್ಲೆ

ನೀರು soap, wax ಹಾಕಿ carಆ ನಾನುಜ್ಜುತ್ತ ಹೊಳೆಸಿದೆನು ಗಂಟೆಗಟ್ಲೆ
ದಾರಿಯಲಿ ಮತ್ತೊಂದು carಉ ವೇಗದಿ ಕೊಚ್ಚೆ ಹಾರಿಸಿತು ನಿಮಿಷದಲ್ಲೆ

ಬೆಳಗಾಗ ಬೇಗೆದ್ದು ಅತಿಥಿಗಳಿಗೌತಣವ ಮಾಡಿರಲು ದಿವಸದಲ್ಲಿ
ನಳಪಾಕಕಿನ್ನೊಬ್ಬ ಮತ್ತೆ ಉಪ್ಪನು ಬೆರೆಸಿ ಕೆಡಿಸಿದನು ನಿಮಿಷದಲ್ಲಿ

ಕಲೆಗಾರ ಬಣ್ಣಗಳ ಭಾವಚಿತ್ರವನೊಂದ ನಿರ್ಮಿಸಿದ ವರುಷದಲ್ಲಿ
ಕೊಲೆಗಾರ ಇದ್ದಲಿನ ಚೂರಿನಿಂದದ ಕೊಂದ ಗೀಚುತ್ತ ನಿಮಿಷದಲ್ಲಿ

ಸ್ವಚ್ಛ ಭಾಷೆಯ ನುಡಿಯೆ ಮಗಗೆ ಕಲಿಸಿರೆ ತಾಯಿ ಐದಾರು ವರುಷಗಳಲಿ
ಕೊಚ್ಚೆ ಮಾತನು ಕಲಿತ ಬೀದಿ ಮಕ್ಕಳ ನಡುವೆ ಒಂದೆರಡೆ ನಿಮಿಷಗಳಲಿ

ಗಗನಚುಂಬಿಗಳೆರಡ ನೂರಾರು ಜನ ಕಟ್ಟಲಾರೇಳು ವರುಷಗಳಲಿ
ಗಗನಯಾನಗಳೆರಡ ಬಡಿದವಕೆ ಬೀಳಿಸಿದರೊಂದೆರಡೆ ಗಂಟೆಗಳಲಿ

ಬಲ್ಲ ಶಿಲ್ಪಿಯು ಕಲೆಯ ಬಲೆಯೆಂದು ವಿಗ್ರಹವ ನಿರ್ಮಿಸಿರೆ ವರುಷಗಳಲಿ
ಅಲ್ಲ, ದೇವರಿದಲ್ಲ, ಎಂದು ಧಾಳಿಯ ನಡೆಸಿ ಒಡೆದರದ ನಿಮಿಷಗಳಲಿ

ಮನವ ಹಿಡಿತದೊಳಿಟ್ಟು ಋಷಿ ತಪವ ಮಾಡುತಿರೆ ನೂರಾರು ವರುಷಗಳಲಿ
ಮನವ ಮೋಹಿಸೆ ಬಂದು ಬಳುಕುತ್ತಲಪ್ಸರೆಯು ಕೆಡಿಸಿದಳು ನಿಮಿಷಗಳಲಿ

ಗಾಢವಾದೆಣ್ಣೆಯನು ಭೂದೇವಿ ರಚಿಸಿದಳು ಲಕ್ಷಶತಮಾನಗಳಲಿ
ಮೂಢಜನ ನಾವದನು ಉರಿಸುತ್ತ ಮುಗಿಸುವೆವು ಕೆಲವೆ ಶತಮಾನಗಳಲಿ

ಚೆಂದೊಳ್ಳೆ ಮಡಕೆಯನು ಕುಂಬಾರ ಮಾಡಿದನು ಕಷ್ಟದಿಂ ವರುಷದಲ್ಲಿ
ತಂದೊಂದು ದೊಣ್ಣೆಯನು ಮತ್ತೊಬ್ಬ ಮುರಿದನದ ಸ ುಲಭದಿಂ ನಿಮಿಷದಲ್ಲಿ


ಮುಖಪುಟ / ಎನ್‌ಆರ್‌ಐ

ತಾಜಾ ಸುದ್ದಿ ತಕ್ಷಣ ಪಡೆಯಿರಿ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X