Ranji Trophy: ಸಿಕ್ಸರ್ ವಿಚಾರದಲ್ಲಿ ಹೊಸ ವಿಶ್ವ ದಾಖಲೆ ಬರೆದ ಅಗರ್ವಾಲ್
ಹೈದರಾಬಾದ್ ತಂಡದ ಆರಂಭಿಕ ಆಟಗಾರ ತನ್ಮಯ್ ಅಗರ್ವಾಲ್ ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ ಹೊಸ ವಿಶ್ವದಾಖಲೆ ಬರೆದಿದ್ದಾರೆ. ಶುಕ್ರವಾರ ವೇಗದ ತ್ರಿಶತಕ ಗಳಿಸಿದ್ದ ಅವರು, ಅತಿ ಹೆಚ್ಚು ವೈಯಕ್ತಿಕ ಸ್ಕೋರ್ಗಾಗಿ (501*) ಬ್ರಿಯಾನ್ ಲಾರಾ ಅವರ ದಾಖಲೆ ಮುರಿಯುವಲ್ಲಿ ವಿಫಲವಾದರು. ಆದರೆ ಅವರು ಹೆಚ್ಚಿನ ಸಿಕ್ಸರ್ಗಳ ವಿಶ್ವ ದಾಖಲೆಯನ್ನು ಮುರಿದರು.
ಹೈದರಾಬಾದ್ನ ನೆಕ್ಸ್ಜೆನ್ ಕ್ರಿಕೆಟ್ ಮೈದಾನದಲ್ಲಿ ಅರುಣಾಚಲ ಪ್ರದೇಶ ವಿರುದ್ಧದ ರಣಜಿ ಟ್ರೋಫಿ ಪ್ಲೇಟ್ ಗ್ರೂಪ್ ಪಂದ್ಯದ 1 ನೇ ದಿನದಂದು ಪ್ರಥಮ ದರ್ಜೆ ಕ್ರಿಕೆಟ್ ಇತಿಹಾಸದಲ್ಲಿ ಅತ್ಯಂತ ವೇಗದ ತ್ರಿಶತಕ ಸಿಡಿಸಿದ ಹೈದರಾಬಾದ್ ಆರಂಭಿಕ ಆಟಗಾರ ತನ್ಮಯ್ ಅಗರ್ವಾಲ್ ಶನಿವಾರ 366 ರನ್ಗಳಿಗೆ ಔಟಾದರು.
ದಿನದಾಟವನ್ನು 323 ರಲ್ಲಿ ಪುನರಾರಂಭಿಸಿದ ಅಗರ್ವಾಲ್ 350 ಕ್ಕೆ ತಲುಪಲು ಸ್ವಲ್ಪ ಸಮಯ ತೆಗೆದುಕೊಂಡರು. ಶುಕ್ರವಾರ 21 ಸಿಕ್ಸರ್ ಸಿಡಿಸಿದ್ದ ಅವರು, ಶನಿವಾರ ಮತ್ತೆ 5 ಸಿಕ್ಸರ್ ಸಿಡಿಸುವ ಮೂಲಕ ಒಟ್ಟಾರೆ ಇನ್ನಿಂಗ್ಸ್ನಲ್ಲಿ 26 ಸಿಕ್ಸರ್ ಸಿಡಿಸಿದರು.
ಮುನ್ರೋ ದಾಖಲೆ ಮುರಿದ ಅಗರ್ವಾಲ್
ಪ್ರಥಮ ದರ್ಜೆ ಇನ್ನಿಂಗ್ಸ್ನಲ್ಲಿ ಬ್ಯಾಟರ್ನಿಂದ ಅತಿ ಹೆಚ್ಚು ಸಿಕ್ಸರ್ ಸಿಡಿಸಿದ ದಾಖಲೆ ಬರೆದರು. ನ್ಯೂಜಿಲೆಂಡ್ ಆಲ್ರೌಂಡರ್ ಕಾಲಿನ್ ಮುನ್ರೊ ಅವರು 23 ಸಿಕ್ಸರ್ಗಳನ್ನು ಸಿಡಿಸಿದ್ದು ಈವರೆಗಿನ ದಾಖಲೆಯಾಗಿತ್ತು. 2015 ರಲ್ಲಿ ಸೆಂಟ್ರಲ್ ಡಿಸ್ಟ್ರಿಕ್ಟ್ಗಳ ವಿರುದ್ಧ ಆಕ್ಲೆಂಡ್ಗಾಗಿ ಆಡುವಾಗ ಈ ಕಾಲಿನ್ ಮುನ್ರೋ ಈ ಸಾಧನೆ ಮಾಡಿದ್ದರು. ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿರುವ ಅಫ್ಘಾನಿಸ್ತಾನದ ಶಫಿಕುಲ್ಲಾ ಶಿನ್ವಾರಿ ಅವರು ಬೂಸ್ಟ್ ವಿರುದ್ಧ ಕಾಬೂಲ್ಗಾಗಿ 22 ಸಿಕ್ಸರ್ಗಳನ್ನು ಬಾರಿಸಿದ್ದರು.
ಪ್ರಥಮ ದರ್ಜೆಯ ಇನ್ನಿಂಗ್ಸ್ನಲ್ಲಿ ಈ ಹಿಂದೆ ಇಶಾನ್ ಕಿಶನ್ ಮತ್ತು ಶಕ್ತಿ ಸಿಂಗ್ ಜಂಟಿಯಾಗಿ 14 ಸಿಕ್ಸರ್ಗಳನ್ನು ಗಳಿಸಿದ್ದರು. ಈಗ ಆ ದಾಖಲೆಗಳನ್ನು ಕೂಡ ಅಗರ್ವಾಲ್ ಮುರಿದಿದ್ದು, ವಿಶ್ವದಾಖಲೆ ಬರೆದಿದ್ದಾರೆ.
ಅಗರ್ವಾಲ್ ಅವರ 366 ಎಮ್ವಿ ಶ್ರೀಧರ್ ಜೊತೆಗೆ ಭಾರತೀಯರ ಜಂಟಿ ನಾಲ್ಕನೇ ಅತ್ಯಧಿಕ ಪ್ರಥಮ ದರ್ಜೆ ಸ್ಕೋರ್ ಆಗಿದೆ. ಮಹಾರಾಷ್ಟ್ರ ಮತ್ತು ಕಥಿಯಾವಾರ್ ನಡುವಿನ ರಣಜಿ ಟ್ರೋಫಿ ಪಂದ್ಯದಲ್ಲಿ ಅಜೇಯ 443 ರನ್ ಬಾರಿಸಿದ ಬಿಬಿ ನಿಂಬಾಳ್ಕರ್ ಅತ್ಯಧಿಕ ಸ್ಕೋರ್ ಗಳಿಸಿದ ದಾಖಲೆ ಬರೆದಿದ್ದಾರೆ.
ಅಗರ್ವಾಲ್ ಕೇವಲ 181 ಎಸೆತಗಳಲ್ಲಿ 34 ಬೌಂಡರಿ ಮತ್ತು 26 ಸಿಕ್ಸರ್ಗಳ ನೆರವಿನಿಂದ 202.21 ಸ್ಟ್ರೈಕ್ ರೇಟ್ನಲ್ಲಿ 366 ರನ್ ಗಳಿಸಿದರು. ಹೈದರಾಬಾದ್ ತನ್ನ ಮೊದಲ ಇನ್ನಿಂಗ್ಸ್ ಅನ್ನು ಕೇವಲ 59.3 ಓವರ್ಗಳಲ್ಲಿ 5 ವಿಕೆಟ್ಗೆ 615 ರನ್ ಗಳಿಸಿ 443 ರನ್ ಮುನ್ನಡೆಯೊಂದಿಗೆ ಡಿಕ್ಲೇರ್ ಮಾಡಿಕೊಂಡಿತು.
Click it and Unblock the Notifications
Sign in with Google