ಎಫ್-16 ಯುದ್ಧ ವಿಮಾನ ದುರ್ಬಳಕೆ: ಪಾಕ್ ವಿರುದ್ಧ ಅಮೆರಿಕಕ್ಕೆ ಸಾಕ್ಷ್ಯ ನೀಡಿದ ಭಾರತ

Updated: Wednesday, March 13, 2019, 13:59 [IST]

ನವದೆಹಲಿ, ಮಾರ್ಚ್ 2: ಭಾರತದ ಮೇಲೆ ದಾಳಿ ಮಾಡುವಾಗ ಪಾಕ್ ಎಫ್ 16 ಯುದ್ಧ ವಿಮಾನವನ್ನು ದುರ್ಬಳಕೆ ಮಾಡಿರುವ ಕುರಿತು ಅಮೆರಿಕಕ್ಕೆ ಭಾರತ ಸಾಕ್ಷ್ಯ ಒದಗಿಸಿದೆ.

ವಿಂಗ್ ಕಮಾಂಡರ್ ಅಭಿನಂದನ್ ವರ್ಧಮಾನ್ ಹೊಡೆದುರುಳಿಸಿದ ಅಮೆರಿಕಾ ನಿರ್ಮಿತ ಎಫ್-16 ಯುದ್ಧ ವಿಮಾನವನ್ನು ದುರ್ಬಳಕೆ ಮಾಡಿಕೊಂಡಿತ್ತು. ಅಮೆರಿಕಾದ ಅನುಮತಿ ಇಲ್ಲದೆ ವಿಮಾನವನ್ನು ಬಳಕೆ ಮಾಡಿತ್ತು.

ಹಾಗಾಗಿ ವಿಮಾನ ಪತನಗೊಂಡಿರುವ ವಿಚಾರವನ್ನು ಕೂಡ ಪಾಕ್ ಮುಚ್ಚಿಟ್ಟಿತ್ತು. ಭಾರತೀಯ ಸೇನಾಪಡೆಯ ಬ್ರಿಗೇಡ್ ಮತ್ತು ಬೆಟಾಲಿಯನ್ ಮೇಲೆ ದಾಳಿ ಮಾಡಲು ಪಾಕ್ ವಾಯುಪಡೆ ಯೋಧರು ಯತ್ನಿಸಿದ್ದರು ಎಂದು ಭಾರತ ಅಮೆರಿಕಕ್ಕೆ ದೂರು ನೀಡಿದೆ.

ಕೆಲ ದಿನಗಳ ಹಿಂದೆ ಭಾರತದೊಂದಿಗೆ ನಡೆದಿದ್ದ ವೈಮಾನಿಕ ಪೈಪೋಟಿಯಲ್ಲಿ ಪಾಕಿಸ್ತಾನ ಎಫ್-16 ಯುದ್ಧ ವಿಮಾನಗಳನ್ನು ಬಳಸಿ ಭಾರತದ ಮೇಲೆ ದಾಳಿ ಮಾಡಲು ಯತ್ನಿಸಿತ್ತು.

ಮಿಗ್-21 ವಿಮಾನದ ಮೂಲಕ ವಾಯುಪಡೆ ವಿಂಗ್ ಕಮಾಂಡರ್ ಅಭಿನಂದನ್ ವರ್ಧಮಾನ್ ಆ ವಿಮಾನವನ್ನು ಹೊಡೆದುರುಳಿಸಿದ್ದರು. ಆದರೆ, ಪಾಕಿಸ್ತಾನ ಈ ವಿಷಯವನ್ನು ಅಲ್ಲಗಳೆದಿತ್ತು.

ಕೊನೆಗೆ ಭಾರತದ ಗಡಿಯೊಳಗೆ ಬಿದ್ದಿದ್ದ ಎಫ್-16 ಯುದ್ಧ ವಿಮಾನದ ಅವಶೇಷವನ್ನು ಭಾರತೀಯ ವಾಯುಪಡೆ ಅಧಿಕಾರಿಗಳು ಪ್ರದರ್ಶಿಸಿದ್ದರು. ಅಲ್ಲದೆ, ಪಾಕ್ ವಾಯುಪಡೆಯ ವಿಮಾನಗಳು ರಾಜೌರಿಯಲ್ಲಿ ಭಾರತದ ವಾಯುಗಡಿ ಪ್ರವೇಶಿಸಿದ್ದವು.

ಅವುಗಳನ್ನು ಹಿಮ್ಮೆಟ್ಟಿಸಲು ಮಿಗ್-21 ಬೈಸನ್, ಎಸ್ಯು-20 ಎಂಕೆಐ ಮತ್ತು ಮಿರಾಜ್ ವಿಮಾನಗಳನ್ನು ಕಳುಹಿಸಲಾಗಿತ್ತು. ಮಿಗ್-21 ಬೈಸನ್ ವಿಮಾನದಲ್ಲಿದ್ದ ಅಭಿನಂದನ್ ಎಫ್-16 ಯುದ್ಧವಿಮಾನವನ್ನು ಹೊಡೆದುರುಳಿಸಿದ್ದರು ಎಂದು ಭಾರತ ಹೇಳಿದೆ.