ಕಳೆದ 58 ವರ್ಷಗಳಲ್ಲಿ ಅನುಭವಿಸದಂಥ ಚಳಿಗೆ ದೆಹಲಿ ತತ್ತರ

ನವದೆಹಲಿ, ನ.01: ಈ ಬಾರಿಯ ಚಳಿಗಾಲದ ಆರಂಭದಲ್ಲೇ ದೆಹಲಿ ಗಢಗಢ ನಡುಗಿದೆ. ಕಳೆದ 58 ವರ್ಷಗಳಲ್ಲೇ ಕಾಣದಂಥ, ಅನುಭವಿಸದಂಥ ಭಾರಿ ಚಳಿಯನ್ನು ಅಕ್ಟೋಬರ್ ತಿಂಗಳಿನಲ್ಲಿ ದಾಖಲಿಸಲಾಗಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ತಿಳಿಸಿದೆ.

ಅಕ್ಟೋಬರ್ ತಿಂಗಳಿನಲ್ಲಿ ಸರಾಸರಿ 17.2 ಡಿಗ್ರಿ ಸೆಲ್ಸಿಯಸ್ ದಾಖಲಾಗಿದೆ. 1937ರ ಅಕ್ಟೋಬರ್‌ 31ರಂದು 9.4 ಡಿಗ್ರಿ ಸೆಲ್ಸಿಯಸ್‌ ಉಷ್ಣಾಂಶ ವರದಿಯಾಗಿತ್ತು. 1962ರಲ್ಲಿ 16.9 ಡಿಗ್ರಿಸೆಲ್ಸಿಯಸ್ ದಾಖಲಾಗಿತ್ತು. 1994ರಲ್ಲಿ 12.5 ಡಿಗಿ ಸೆಲ್ಸಿಯಸ್ ಕನಿಷ್ಠ ತಾಪಮಾನ ಕಂಡು ಬಂದಿತ್ತು.

ಭಾನುವಾರ(ನ.1) ಬೆಳಗ್ಗೆ 11.4 ಡಿಗ್ರಿ ಸೆಲ್ಸಿಯಸ್‌ ತಾಪಮಾನ ದಾಖಲಾಗಿದ್ದು, ಈ ಋತುವಿನ ಅತಿ ಕನಿಷ್ಠ ತಾಪಮಾನ ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ಹೇಳಿದೆ.

ಅಕ್ಟೋಬರ್ ತಿಂಗಳಿನಲ್ಲಿ ಸಾಮಾನ್ಯವಾಗಿ ಕನಿಷ್ಠ ತಾಪಮಾನ ಸರಾಸರಿ 19.1 ಡಿಗ್ರಿ ಸೆಲ್ಸಿಯಸ್ ಇರುತ್ತದೆ. ನವೆಂಬರ್‌ ಮೊದಲ ವಾರದಲ್ಲಿ15 ರಿಂದ 16 ಡಿಗ್ರಿ ಸೆಲ್ಸಿಯಸ್‌ ದಾಖಲಾಗುತ್ತದೆ. ಆದರೆ, ಈ ಬಾರಿ ಅಕ್ಟೋಬರ್ ತಿಂಗಳಿನಂತೆ ನವೆಂಬರ್ ತಿಂಗಳಲ್ಲೂ ಅಧಿಕ ಚಳಿ ಕಂಡು ಬರಲಿದ್ದು, ನವೆಂಬರ್‌ ತಿಂಗಳಾಂತ್ಯದಲ್ಲಿ 11-12 ಡಿಗ್ರಿ ಸೆಲ್ಸಿಯಸ್‌ಗೆ ಇಳಿಯಲಿದೆ ಎಂದು ಐಎಂಡಿ ವರದಿ ಮಾಡಿದೆ.

ದೆಹಲಿಯಲ್ಲಿ ಹೊಗೆ ಮಂಜು ಕವಿದ ವಾತಾವರಣ ಗಾಳಿ ಕಡಿಮೆ ಇರುವುದು ಕನಿಷ್ಠ ತಾಪಮಾನಕ್ಕೆ ಪ್ರಮುಖ ಕಾರಣವಾಗಿದೆ,ಪರ್ವತ ಪ್ರದೇಶಗಳಲ್ಲಿ ಇನ್ನೂ ಹಿಮಪಾತ ಆರಂಭವಾಗಿಲ್ಲ, ಹಿಮಪಾತ ಶುರುವಾದರೆ, ದೆಹಲಿಯಲ್ಲಿ ಹವಾಮಾನ ತಂಪಾಗಲಿದೆ ಎಂದು ಸ್ಥಳೀಯ ಐಎಂಡಿ ಕೇಂದ್ರದ ಮುಖ್ಯಸ್ಥ ಕುಲ್‌ದೀಪ್‌ ಶ್ರೀವಾಸ್ತವ್‌ ಹೇಳಿದ್ದಾರೆ.(ಪಿಟಿಐ)

English summary

The month of October was the coldest in 58 years in the national capital, according to India Meteorological Department (IMD) data. The mean minimum temperature in October this year was 17.2 degrees Celsius, the lowest since 1962, when it was 16.9 degrees Celsius, the IMD said.