ದಸರಾ ಆಹಾರ ಮೇಳದಲ್ಲಿ ಈ ಬಾರಿ ಟಿಬೇಟಿಯನ್ ಸ್ಪೆಷಲ್ ಖಾದ್ಯ
ಮೈಸೂರು, ಸೆಪ್ಟೆಂಬರ್ 6: ಸೆ.30ರಿಂದ ಅ.8ವರೆಗೆ ನಡೆಯುವ ದಸರಾ ಮಹೋತ್ಸವ ವೀಕ್ಷಿಸಲೆಂದು ಸಾಂಸ್ಕೃತಿಕ ನಗರಿಗೆ ಬರುವ ಪ್ರವಾಸಿಗರಿಗೆ ಈ ಬಾರಿ ಆಹಾರ ಮೇಳದಲ್ಲಿ ವಿದೇಶಿ ಖಾದ್ಯಗಳೂ ಲಭ್ಯವಾಗಲಿವೆ.
ಕಳೆದ ಬಾರಿ ಬಂಬೂ ಬಿರಿಯಾನಿ, ಬಿದಿರಕ್ಕಿ ಪಾಯಸ, ಬಿದಿರು-ಕಳಲೆ ಸಾರು, ನಳ್ಳಿ ಸಾರು ಸೇರಿದಂತೆ ಆದಿವಾಸಿ ಬುಡಕಟ್ಟು ಸಮುದಾಯದ ತಿನಿಸುಗಳನ್ನು ಪರಿಚಯಿಸಿದ್ದ ದಸರಾ ಕಾರ್ಯಕಾರಿ ಸಮಿತಿ, ಈ ಸಲ ಟಿಬೇಟಿಯನ್ನರ ತಿನಿಸುಗಳನ್ನು ಇದೇ ಮೊದಲ ಬಾರಿ ಉಣಬಡಿಸಲು ಮುಂದಾಗಿದೆ.
ಕಳೆದ ವರ್ಷ ಚೀನಾ, ಶ್ರೀಲಂಕಾ, ಬಾಂಗ್ಲಾದೇಶ, ದಕ್ಷಿಣ ಆಫ್ರಿಕಾ, ಕಾಂಬೋಡಿಯಾ ಸೇರಿದಂತೆ ವಿವಿಧ ದೇಶಗಳ ತಿನಿಸುಗಳನ್ನು ಮೈಸೂರು ವಿಶ್ವವಿದ್ಯಾನಿಲಯ, ಜೆಎಸ್ಎಸ್, ಎನ್ಐಇ ಕಾಲೇಜು ಸೇರಿದಂತೆ ವಿವಿಧೆಡೆ ವ್ಯಾಸಂಗ ಮಾಡುತ್ತಿರುವ ವಿದೇಶಿ ವಿದ್ಯಾರ್ಥಿಗಳು ತಯಾರಿಸಿದ್ದರು.
ಹೊರ ರಾಜ್ಯದವರಿಗೆ 20 ಮಳಿಗೆಗಳನ್ನು ತೆರೆಯಲು ತೀರ್ಮಾನಿಸಲಾಗಿದೆ. ತಮಿಳುನಾಡು, ಕೇರಳ, ಆಂಧ್ರಪ್ರದೇಶ ಸೇರಿದಂತೆ ದೇಶದ ಹಲವು ರಾಜ್ಯಗಳು ಈ ಬಾರಿಯ ಆಹಾರ ಮೇಳದಲ್ಲಿ ಭಾಗವಹಿಸಲಿವೆ. ಪ್ರತಿ ದಿನ ಒಂದು ರಾಜ್ಯದ ಸಂಸ್ಕೃತಿಯನ್ನು ಬಿಂಬಿಸುವ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಆಹಾರ ಮೇಳದಲ್ಲಿ ಆಯೋಜಿಸಲಾಗುವುದು. ಸಸ್ಯಾಹಾರ, ಮಾಂಸಾಹಾರದ ಬಗೆ ಬಗೆ ತಿನಿಸಗಳೂ ಇರಲಿವೆ ಎಂದು ಜಿಲ್ಲಾಧಿಕಾರಿ ಅಭಿರಾಂ ಜಿ ಶಂಕರ್ ತಿಳಿಸಿದ್ದಾರೆ.
ಇದರೊಟ್ಟಿಗೆ ಬುಡಕಟ್ಟು, ಸಾವಯವ ಆಹಾರ ತಿನಿಸುಗಳೂ ಇರಲಿವೆ. ಆಹಾರ ಮೇಳದ ಜೊತೆಗೆ ಸಾಂಪ್ರದಾಯಿಕ ವೈವಿಧ್ಯಮಯ ಕಾರ್ಯಕ್ರಮಗಳು ಜರುಗಲಿವೆ. ಈ ಬಾರಿಯೂ ಆಹಾರ ಮೇಳ ಸ್ಕೌಟ್ಸ್ ಅಂಡ್ ಗೈಡ್ಸ್ ಮೈದಾನ, ಲಲಿತಮಹಲ್ ಪ್ಯಾಲೇಸ್ ಹೋಟೆಲ್ ಬಳಿ ನಡೆಯಲಿದೆ. ಪ್ರತಿ ಸ್ಥಳದಲ್ಲಿ 70ಕ್ಕೂ ಹೆಚ್ಚು ಮಳಿಗೆಗಳು ಆಹಾರಪ್ರಿಯರ ನಾಲಿಗೆ ತಣಿಸಲಿವೆ.
Click it and Unblock the Notifications
Sign in with Google