ಮೈಸೂರು–ಬೆಂಗಳೂರು ಹೈವೇಲಿ ಶುರುವಾಗಲಿದೆ ಇ-ಚಾರ್ಜಿಂಗ್ ಪಾಯಿಂಟ್
ಮೈಸೂರು, ಮೇ 31 : ಮೈಸೂರು - ಬೆಂಗಳೂರು ಮುಖ್ಯ ರಸ್ತೆಯಲ್ಲಿ ಇ- ವಾಹನಗಳ ಚಾರ್ಜಿಂಗ್ ಪಾಯಿಂಟ್ ಗಳನ್ನು ಸ್ಥಾಪಿಸಲು ಸೆಸ್ಕ್ ಚಿಂತನೆ ನಡೆಸಿದ್ದು, ಈಗಾಗಲೇ ಆರು ಕಡೆ ಸ್ಥಳಗಳನ್ನು ಆಯ್ಕೆ ಮಾಡಲಾಗಿದೆ.
ಮೈಸೂರು ಪಶ್ಚಿಮ ಪ್ರಾದೇಶಿಕ ಸಾರಿಗೆ ಕಚೇರಿಯಲ್ಲಿ ಇಲ್ಲಿಯವರೆಗೂ ಸುಮಾರು 119 ಇ ವಾಹನಗಳ ನೋಂದಣಿಯಾಗಿದೆ. ಅದರಲ್ಲಿ 7 ಇ ರಿಕ್ಷಾ, 6 ಕಾರು ಹಾಗೂ ಉಳಿದಂತೆ ದ್ವಿಚಕ್ರ ವಾಹನಗಳು. ಬ್ಯಾಟರಿ ಬಳಕೆ ಇಲ್ಲದಿರುವುದು ಹಾಗೂ ಚಾರ್ಜಿಂಗ್ ಪಾಯಿಂಟ್ ಗಳ ಕೊರತೆಯಿಂದ ವಾಹನಗಳನ್ನು ಖರೀದಿಸಲು ಜನ ನಿರಾಸಕ್ತಿ ತಾಳುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಇ ವಾಹನಗಳ ಬಳಕೆಯನ್ನು ಉತ್ತೇಜಿಸುವ ರೀತಿಯಲ್ಲಿ ಸರ್ಕಾರ ಅಗತ್ಯ ಕ್ರಮಗಳನ್ನು ಕೈಗೊಳ್ಳಲು ಮುಂದಾಗಿದೆ.
ಈ ಕುರಿತು ಅಧಿಕಾರಿಗಳು ಪ್ರತಿಕ್ರಿಯಿಸಿ, ಚಾರ್ಜಿಂಗ್ ಪಾಯಿಂಟ್ ವ್ಯವಸ್ಥೆ ಇಲ್ಲದಿರುವುದರಿಂದ ಇ ವಾಹನಗಳ ಖರೀದಿಗೆ ಜನ ಮನಸ್ಸು ಮಾಡುತ್ತಿಲ್ಲ. ಸೂಕ್ತ ವ್ಯವಸ್ಥೆ ಇದ್ದರೆ ಈ ವಾಹನಗಳ ಪ್ರಮಾಣವೂ ಹೆಚ್ಚಾಗಿರುತ್ತದೆ. ಇದರಿಂದ ಸಂಪನ್ಮೂಲಗಳ ಉಳಿತಾಯವೂ ಆಗುತ್ತದೆ. ಅಲ್ಲದೇ ಪರಿಸರ ಮಾಲಿನ್ಯದ ಪ್ರಮಾಣವೂ ಕಡಿಮೆಯಾಗುತ್ತದೆ. ಈ ದೃಷ್ಟಿಯಿಂದ ಜರೂರಾಗಿ ಚಾರ್ಜಿಂಗ್ ಪಿನ್ ಸೌಲಭ್ಯವನ್ನು ಕಲ್ಪಿಸುವ ಮುಂದಾಗುತ್ತೇವೆ ಎನ್ನುತ್ತಾರೆ.
ಈಗಾಗಲೇ ಬೆಂಗಳೂರು ನಗರದಲ್ಲಿ ಹಲವು ಘಟಕಗಳನ್ನು ಸ್ಥಾಪಿಸಿದ್ದು, ಹಲವು ಇ ವಾಹನಗಳು ನಗರದಲ್ಲಿ ಸಂಚರಿಸುತ್ತಿವೆ. ಅದೇ ಮಾದರಿಯಲ್ಲಿ ಬೆಂಗಳೂರು - ಮೈಸೂರು ಹೈವೇ ರಸ್ತೆಯಲ್ಲಿಯೂ ಘಟಕಗಳನ್ನು ಸ್ಥಾಪಿಸಲಾಗುವುದು. ಮೊದಲ ಹಂತದಲ್ಲಿ ಮದ್ದೂರು, ಮಂಡ್ಯ ವ್ಯಾಪ್ತಿಯಲ್ಲಿ ತಲಾ 2 ಹಾಗೂ ಶ್ರೀರಂಗಪಟ್ಟಣ - ಮೈಸೂರು ನಗರದಲ್ಲಿ ತಲಾ 1 ಚಾರ್ಜಿಂಗ್ ಪಾಯಿಂಟ್ ಸ್ಥಾಪಿಸಲು ನಿರ್ಧರಿಸಲಾಗಿದೆ.
ಎರಡನೇ ಹಂತದಲ್ಲಿ ಮೈಸೂರು ನಗರದೊಳಗೆ ಸಾರ್ವಜನಿಕ ಮತ್ತು ಖಾಸಗಿ ಚಾರ್ಜಿಂಗ್ ಸ್ಟೇಷನ್ ತೆರೆಯುವ ಚಿಂತನೆ ಇದೆ. ಅಲ್ಲದೆ ಸೆಸ್ಕ್ ಕಾರ್ಪೊರೇಟ್ ಕಚೇರಿಯಲ್ಲೂ ಒಂದು ಚಾರ್ಜಿಂಗ್ ಘಟಕ ತೆರೆಯುವ ಚಿಂತನೆಯೂ ಇದೆ. 8*20 ಜಾಗದಲ್ಲಿ ಚಾರ್ಜಿಂಗ್ ಪಾಯಿಂಟ್ ಸ್ಥಾಪಿಸಲು ಚಿಂತನೆ ನಡೆಸಿದ್ದು, ನಿತ್ಯ ಎರಡು ವಾಹನಗಳಿಗೆ ವಿದ್ಯುತ್ ಚಾರ್ಜ್ ಒದಗಿಸುವ ಸಾಮರ್ಥ್ಯ ಹೊಂದಿದೆ. ಚಾರ್ಜ್ ಆದ ವಾಹನ ಸುಮಾರು 40 ಕಿಲೋ ಮೀಟರ್ ಸಂಚರಿಸಬಹುದಾಗಿದೆ.
Click it and Unblock the Notifications
Sign in with Google