ಇದು ಮೀನುಗಾರರ ಅದೃಷ್ಟದ ಮೀನು, 30 ಕೇಜಿ 5.5 ಲಕ್ಷಕ್ಕೆ ಮಾರಾಟ
ಮುಂಬೈ, ಆಗಸ್ಟ್ 7: ಅದು ಘೋಲ್ ಮೀನು. ಅದನ್ನು ಮೀನುಗಾರರು ಅದೃಷ್ಟ ಅಂತಲೇ ಕರೆಯುತ್ತಾರೆ. ಮೂವತ್ತು ಕೇಜಿ ತೂಗುವ ಅಂಥ ಅದೃಷ್ಟವೊಂದು ಇಲ್ಲಿನ ಮೀನುಗಾರರ ಬಲೆಗೆ ಭಾನುವಾರ ಬಿದ್ದಿತ್ತು. ಅದರ ಮರುದಿನ, ಅಂದರೆ ಸೋಮವಾರದ ಬೆಳಗ್ಗೆ ಮೂವತ್ತು ಕೇಜಿ ಮೀನು ಐದೂವರೆ ಲಕ್ಷಕ್ಕೆ ಮಾರಾಟ ಆಯಿತು.
ಅಂದಹಾಗೆ, ಈ ದುಬಾರಿ ಮೀನು ಬಲೆಗೆ ಬಿದ್ದಿದ್ದು ಮುಂಬೈ-ಪಲ್ಘಾರ್ ಕರಾವಳಿ ಸಾಲಿನಲ್ಲಿ. ಮಹೇಶ್ ಮೆಹರ್ ಹಾಗೂ ಅವರ ಸೋದರ ಭರತ್ ತಮ್ಮ ಪುಟ್ಟ ದೋಣಿ (ಸಾಯಿಲಕ್ಷ್ಮಿ) ಜತೆಗೆ ಶುಕ್ರವಾರ ಸಮುದ್ರಕ್ಕೆ ಇಳಿಯುವಾಗ ಅಂಥದ್ದೊಂದು ಅದೃಷ್ಟ ಬರುತ್ತದೆ ಎಂಬ ನಿರೀಕ್ಷೆ ಕೂಡ ಇರಲಿಲ್ಲ. ಇತರ ಜಾತಿ ಮೀನಿನ ಜತೆ ಘೋಲ್ ಕೂಡ ಬಿದ್ದಿತ್ತು.
ಈ ಮೀನಿನ ಅಂಗಗಳಿಗೆ ವೈದ್ಯಕೀಯ ಮೌಲ್ಯವಿದೆ. ಸ್ಥಳೀಯ ಮಾರುಕಟ್ಟೆಗೆ ಹೋಲಿಸಿದರೆ ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಇದರ ಬೆಲೆ ಸಿಕ್ಕಾಪಟ್ಟೆ ಜಾಸ್ತಿ ಇದೆ. ಅಂದರೆ ಕೇಜಿಗೆ 800ರಿಂದ 1000 ರುಪಾಯಿ ಬೆಲೆ ಇದೆ. ಸಿಂಗಾಪೂರ್, ಮಲೇಷಿಯಾ, ಹಾಂಕಾಂಗ್, ಜಪಾನ್ ನಲ್ಲಿ ವಿಪರೀತ ಬೇಡಿಕೆಯಿದೆ.
ಮಹೇಶ್ ಹಾಗೂ ಭರತ್ ಗೆ ಸಿಕ್ಕ ಮೀನು ಮರು ದಿನ ಮಾರುಕಟ್ಟೆಯಲ್ಲಿ ಇಪ್ಪತ್ತು ನಿಮಿಷದಲ್ಲೇ ಮಾರಾಟವಾಗಿದೆ. ಬಂದ ದುಡ್ಡಲ್ಲಿ ದೋಣಿ ರಿಪೇರಿ ಮಾಡಿಸಿ, ಬಲೆ ಸರಿ ಮಾಡಿಸಿಕೊಳ್ಳಬೇಕು ಎಂದು ಈ ಸೋದರರು ಹೇಳಿದ್ದಾರೆ.
ಘೋಲ್ ಮೀನು ಹಿಂದೂ ಮಹಾಸಾಗರ ಹಾಗೂ ಪೆಸಿಫಿಕ್ ಸಾಗರದಲ್ಲಿ ಕಂಡುಬರುತ್ತದೆ. ಪರ್ಷಿಯನ್ ಗಲ್ಫ್ ರಾಷ್ಟ್ರಗಳು, ಪಾಕಿಸ್ತಾನ, ಭಾರತ, ಬಾಂಗ್ಲಾದೇಶ್, ಬರ್ಮಾ, ಉತ್ತರ ಜಪಾನ್, ಪಪುವಾ ನ್ಯೂ ಗಿನಿವಾ ಹಾಗೂ ಉತ್ತರ ಆಸ್ಟ್ರೇಲಿಯಾದಲ್ಲಿ ಘೋಲ್ ಮೀನು ಕಂಡುಬರುತ್ತದೆ.
Click it and Unblock the Notifications
Sign in with Google