ಪ್ರಮೋದ್ ಮಹಾಜನ್ ಅವರ ಪುತ್ರ ರಾಹುಲ್ ಮಹಾಜನ್ ಗೆ 3ನೇ ಮದುವೆ

ಮುಂಬೈ, ನವೆಂಬರ್ 23: ಬಿಜೆಪಿಯ ಪ್ರಭಾವಿ ನಾಯಕರಾಗಿದ್ದ ದಿವಂಗತ ಪ್ರಮೋದ್ ಮಹಾಜನ್ ಅವರ ಪುತ್ರ ರಾಹುಲ್ ಮಹಾಜನ್ ಅವರು ಮೂರನೇ ಬಾರಿಗೆ ಮದುವೆಯಾಗಿದ್ದಾರೆ.

ಬಿಗ್ ಬಾಸ್ ರಿಯಾಲಿಟಿ ಶೋ ಸ್ಪರ್ಧಿಯಾಗಿದ್ದ ರಾಹುಲ್ ಮಹಾಜನ್ (43) ಅವರು ತಮಗಿಂತ 18 ವರ್ಷ ಚಿಕ್ಕವರಾದ ಕಜಕಸ್ತಾನದ ರೂಪದರ್ಶಿ ನಟಾಲ್ಯಾ ಇಲಿಯ್ನಾ ಅವರನ್ನು ಮಂಗಳವಾರ(ನವೆಂಬರ್ 20) ದಂದು ಖಾಸಗಿ ಸಮಾರಂಭದಲ್ಲಿ ವರಿಸಿದರು ಎಂದು ಮುಂಬೈ ಮಿರರ್ ವರದಿ ಮಾಡಿದೆ.

ರಾಹುಲ್' ರಿಯಲ್ 'ಮದುವೆ ಮುರಿದು ಬಿತ್ತು!

ಮಲಬಾರ್ ಹಿಲ್ಸ್ ನ ದೇಗುಲವೊಂದರಲ್ಲಿ ಸರಳವಾಗಿ ನಡೆದ ಮದುವೆ ಸಮಾರಂಭದಲ್ಲಿ ರಾಹುಲ್ ಕುಟುಂಬದ ಆಪ್ತರು ಹಾಗೂ ಬಂಧು ಮಿತ್ರರು ಮಾತ್ರ ಪಾಲ್ಗೊಂಡಿದ್ದರು ಎಂದು ತಿಳಿದು ಬಂದಿದೆ.

ರಾಹುಲ್ ಅವರಿಗೆ ಇದು ಮೂರನೇ ಮದುವೆ: ಬಾಲ್ಯದಿಂದ 13 ವರ್ಷಗಳ ಕಾಲ ಗೆಳೆತನ ಹೊಂದಿದ್ದ ಶ್ವೇತಾ ಸಿಂಗ್ ಅವರೊಂದಿಗೆ ರಾಹುಲ್ ಮಹಾಜನ್ ಅವರು ಮದುವೆಯಾಗಿದ್ದರು.ಆದರೆ, ಕೌಟುಂಬಿಕ ಕಲಹದ ಕಾರಣ ಇಬ್ಬರೂ ವಿವಾಹ ವಿಚ್ಛೇದನಕ್ಕೆ ಅರ್ಜಿ ಹಾಕಿದರು. 2008ರಲ್ಲಿ ಡಿವೋರ್ಸ್ ಸಿಕ್ಕಿತು.

ಇದೇ ವರ್ಷ ಬಿಗ್ ಬಾಸ್ 8ರಲ್ಲಿ ಪಾಲ್ಗೊಂಡಿದ್ದ ರಾಹುಲ್, ಗ್ರ್ಯಾಂಡ್ ಫಿನಾಲೆ ತನಕ ತಲುಪಿದ್ದರು. ಆದರೆ, ಮನೆಯಿಂದ ಪರಾರಿಯಾಗಲು ಯತ್ನಿಸಿ ರಿಯಾಲಿಟಿ ಶೋನಿಂದ ಹೊರ ಹಾಕಲ್ಪಟ್ಟರು. ಬಿಗ್ ಬಾಸ್ ಮನೆಯಲ್ಲಿ ಪಾಯಲ್ ರೊಹಟ್ಗಿ, ಮೋನಿಕಾ ಬೇಡಿ ಜತೆ ರಾಹುಲ್ ಹೆಸರು ತಗುಲಿಹಾಕಿಕೊಂಡಿತ್ತು.

2010ರಲ್ಲಿ ರಾಹುಲ್ ದುಲ್ಹನಿಯಾ ಲೆ ಜಾಯೆಂಗಾ ರಿಯಾಲಿಟಿ ಶೋನಲ್ಲಿ ಪಾಲ್ಗೊಂಡು ಡಿಂಪಿ ಗಂಗೂಲಿ ಅವರನ್ನು ವರಿಸಿದರು. 2014ರ ಡಿಸೆಂಬರ್ 25ರಂದು ಈ ವಿವಾಹ ಬಂಧನವನ್ನು ಕಡಿದುಕೊಂಡರು. ಮೊದಲೆರಡು ಮದುವೆ ಮುರಿಯಲು ರಾಹುಲ್ ಅವರ ಒರಟುತನ, ಪತ್ನಿಗೆ ಹಿಂಸೆ ಕಾರಣವಾಗಿದ್ದು ಸುಳ್ಳಲ್ಲ.

English summary

Late Union Minister Pramod Mahajan's son, Former Bigg Boss star Rahul Mahajan(43) got married to a 25 year old model from Kazakhstan Natalya llina on November 20 in a private ceremony.