ಕೊಂಕಣ ರೈಲ್ವೆ ಮಾಹಿತಿ ಪಡೆಯಲು ಹೊಸ ಸಹಾಯವಾಣಿ

Updated: Tuesday, January 27, 2015, 15:32 [IST]

ಮಂಗಳೂರು, ಜ.27 : ಕೊಂಕಣ ರೈಲ್ವೆ ಪ್ರಯಾಣಿಕರ ಅನುಕೂಲಕ್ಕಾಗಿ ನೂತನ ಸಹಾಯವಾಣಿಯನ್ನು ಆರಂಭಿಸಿದೆ. ಹಿಂದೆ ಇದ್ದ ಸಹಾಯವಾಣಿ ಸಂಖ್ಯೆ ಸ್ಥಗಿತಗೊಂಡಿದ್ದು, ಜನವರಿ 26ರಿಂದಲೇ ನೂತನ ಸಂಖ್ಯೆ ಅಸ್ತಿತ್ವಕ್ಕೆ ಬಂದಿದೆ.

ಸೋಮವಾರದಿಂದ 18002331332 ನಂಬರ್‌ ಅಸ್ತಿತ್ವಕ್ಕೆ ಬಂದಿದ್ದು ಪ್ರಯಾಣಿಕರು ರೈಲಿನ ಬಗ್ಗೆ ಮಾಹಿತಿಯನ್ನು ಈ ನಂಬರ್‌ಗೆ ಕರೆ ಮಾಡುವ ಮೂಲಕ ಪಡೆದುಕೊಳ್ಳಬಹುದು. ಹಿಂದೆ ಇದ್ದ 18002661332 ನಂಬರ್‌ ಕಾರ್ಯಾಚರಣೆ ಸ್ಥಗಿತಗೊಂಡಿದೆ. [ವೈಷ್ಣೋದೇವಿ ದರ್ಶನಕ್ಕೆ ಹೋಗಲು ಬೆಂಗಳೂರಿನಿಂದ ರೈಲು]

ರೈಲಿನ ಮಾಹಿತಿಯನ್ನು ಪಡೆಯಲು ಮಾತ್ರ ಈ ನಂಬರ್‌ಗೆ ಕರೆ ಮಾಡಬಹುದಾಗಿದೆ. ಈ ನಂಬರ್‌ ಮಾತ್ರವಲ್ಲದೇ ಭಾರತ ಎಲ್ಲಿಂದ ಬೇಕಾದರೂ 139 ಸಂಖ್ಯೆಗೆ ಕರೆ ಮಾಡುವ ಮೂಲಕ ಮಾಹಿತಿ ಪಡೆಯಬಹುದಾಗಿದೆ. ಹಣ ಮರುಪಾವತಿ, ಸೀಟುಗಳ ಸಂಖ್ಯೆ, ಸೀಟುಗಳ ಖಾತ್ರಿ ಮುಂತಾದ ಮಾಹಿತಿಗಳು ಈ ನಂಬರ್‌ನಲ್ಲಿ ದೊರೆಯುವುದಿಲ್ಲ ಎಂದು ಕೊಂಕಣ ರೈಲ್ವೆ ಪ್ರಕಟಣೆಯಲ್ಲಿ ತಿಳಿದಿದೆ. [30 ಸೆಕೆಂಡ್ ನಲ್ಲಿ ತತ್ಕಾಲ್ ಟಿಕೆಟ್ ಬುಕ್ಕಿಂಗ್ ಹೇಗೆ?]

ರೈಲ್ವೆ ಇಲಾಖೆಯ ಬಗ್ಗೆ ದೂರುಗಳಿದ್ದರೆ 9004470700 ನಂಬರ್‌ಗೆ ಸಂದೇಶ ಕಳಿಸಬಹುದು ಅಥವ 18002665725 ಕರೆ ಮಾಡಿ ದೂರನ್ನು ದಾಖಲು ಮಾಡಬಹುದು. ಕೊಂಕಣ ರೈಲ್ವೆ ಬಗ್ಗೆ ಮಾಹಿತಿ ಪಡೆಯಲು www.konkanrailway.com ವೆಬ್‌ಸೈಟ್‌ಗೆ ಜನರು ಭೇಟಿ ಮಾಡಬಹುದಾಗಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.