ಕೊಡಗು ಪೊಲೀಸ್ ಶ್ವಾನದಳದ Rambo ಹೃದಯಾಘಾತದಿಂದ ಮೃತ: ಗೌರವ ಪೂರ್ಣ ನಮನ
ಮಡಿಕೇರಿ, ಅಕ್ಟೋಬರ್ 8: ಕೊಡಗು ಜಿಲ್ಲಾ ಪೊಲೀಸ್ ಶ್ವಾನದಳದ Rambo ಎಂಬ ಹೆಸರಿನ 7 ವರ್ಷದ ಶ್ವಾನ ಇಂದು ಹೃದಯಾಘಾತದಿಂದ ಮೃತಪಟ್ಟಿದೆ.
ಈ ಶ್ವಾನವು ಕೊಡಗು ಪೊಲೀಸ್ ಇಲಾಖೆಯ ಶ್ವಾನ ದಳದ ನಾಲ್ಕು ಶ್ವಾನಗಳಲ್ಲಿ ಒಂದಾಗಿದ್ದು, ಕಳೆದ ಕೆಲ ದಿನಗಳಿಂದ ಅಸ್ವಸ್ಥಗೊಂಡಿತ್ತು ಎನ್ನಲಾಗಿದೆ. ಈ ಕುರಿತು ಪ್ರತಿಕ್ರಿಯಿಸಿದ ಡಿಎಆರ್ ಇನ್ಸ್ ಪೆಕ್ಟರ್ ರಾಚಯ್ಯ ಅವರು Rambo ಸುಮಾರು ನಾಲ್ಕು ನೂರಕ್ಕೂ ಹೆಚ್ಚಿನ ತಪಾಸಣೆ, ತನಿಖೆ ಕಾರ್ಯದಲ್ಲಿ ಕೆಲಸ ಮಾಡಿತ್ತು ಎಂದು ಹೇಳಿದರು.
ಚುರುಕಾಗಿದ್ದ ಈ Rambo ನಾಯಿಯು ವಿಐಪಿ ಭದ್ರತೆ, ಸ್ಪೋಟಕ ತಪಾಸಣೆ, ಬಂದೋಬಸ್ತ್, ಕಳ್ಳತನ, ಕೊಲೆ ತನಿಖೆ ಕಾರ್ಯದಲ್ಲಿ ಪೊಲೀಸರ ಒಡನಾಡಿ ಆಗಿತ್ತು. ಇದನ್ನು ಮೊದಲಿನಿಂದಲೂ ಹ್ಯಾಂಡ್ಲರ್ ಸುಕುಮಾರ್ ಅವರು ನೋಡಿಕೊಳ್ಳುತ್ತಿದ್ದು, ಶ್ವಾನದ ಅಕಾಲಿಕ ಸಾವಿಗೆ ಕಂಬನಿ ಮಿಡಿದಿದ್ದಾರೆ.
ಕೊಡಗು ಜಿಲ್ಲಾ ಸಶಸ್ತ್ರದಳದ ಆವರಣದಲ್ಲಿ ಇಂದು ಶ್ವಾನದ ಪಾರ್ಥಿವ ಶರೀರಕ್ಕೆ ಇಲಾಖೆ ಅಧಿಕಾರಿಗಳಿಂದ ಪುಷ್ಪ ಗುಚ್ಛವನ್ನು ಇರಿಸಿ ಇಲಾಖಾ ಗೌರವಗಳೊಂದಿಗೆ ಅಂತಿಮ ನಮನ ಸಲ್ಲಿಸಲಾಯಿತು. ಈ ಸಂದರ್ಭದಲ್ಲಿ ಕೊಡಗು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕ್ಷಮಾ ಮಿಶ್ರ ಮತ್ತು ಸಿಬ್ಬಂದಿಯವರು ಪಾಲ್ಗೊಂಡಿದ್ದರು.