ಕಣ್ಮರೆಯಾಗಿದ್ದ ಬಾಂಬ್ ಸ್ಫೋಟ ತಜ್ಞ ಕುಖ್ಯಾತ ಡಾ.ಬಾಂಬ್ ಬಂಧನ
ಲಖನೌ, ಜನವರಿ 18: ಜೈಲಿನಿಂದ ಪೆರೋಲ್ ಪಡೆದು ಕಣ್ಮರೆ ಆಗಿದ್ದ ಕುಖ್ಯಾತ ಬಾಂಬ್ ಸ್ಫೋಟ ತಜ್ಞ ಡಾ.ಬಾಂಬ್ ಅನ್ನು ಪೊಲೀಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಡಾ.ಅಲೀಸ್ ಅನ್ಸಾರಿ ಅಲಿಯಾಸ್ ಡಾ. ಬಾಂಬ್ ಹಲವು ಬಾಂಬ್ ಸ್ಫೋಟ ಪ್ರಕರಣಗಳಲ್ಲಿ ಪ್ರಮುಖ ಆರೋಪಿ ಆಗಿದ್ದ. ಬಾಂಬ್ ತಯಾರಿಕೆಯಲ್ಲಿ ಈತ ಮಾಸ್ಟರ್ ಮೈಂಡ್. ಕೆಲವು ದಿನಗಳ ಹಿಂದೆ ರಾಜಸ್ಥಾನದ ಅಜ್ಮೇರ್ ಜೈಲಿನಿಂದ ಪರೋಲ್ ಮೇಲೆ ಹೊರಗೆ ಬಂದಿದ್ದ. ಪರೋಲ್ ಮೇಲೆ ಹೊರಬಂದ ಮರುದಿನವೇ ಈತ ಪೊಲೀಸರಿಂದ ಕಣ್ಮರೆ ಆಗಿದ್ದ.
ಬಹು ಅಪಾಯಕಾರಿಯಾಗಿದ್ದ ಡಾ.ಬಾಂಬ್ ಪತ್ತೆಗೆ ಪೊಲೀಸರು ವಿಶೇಷ ತನಿಖಾ ತಂಡ ರಚಿಸಿದ್ದರು. ಬಹು ಹುಡುಕಾಟದ ಬಳಿಕ ನಿನ್ನೆ ಡಾ.ಬಾಂಬ್ ಅನ್ನು ಉತ್ತರ ಪ್ರದೇಶದ ಕಾನ್ಪುರದಲ್ಲಿ ಬಂಧಿಸಲಾಗಿದೆ.
ಮುಂಬೈನ ಮನೆಗೆ ಬಂದಿದ್ದ ಡಾ.ಬಾಂಬ್ ಬೆಳಗಿನ ನಮಾಜ್ ಗೆಂದು ಹೊರಗೆ ಬಂದವ ನಂತರ ಹಿಂತುರಿಗಿರಲಿಲ್ಲ. ಡಾ.ಬಾಂಬ್ ಕಾಣೆಯಾಗಿದ್ದಾನೆಂದು ಆತನ ಕುಟುಂಬ ಸದಸ್ಯರು ಅಗ್ರಿಪದ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು.
ಉತ್ತರ ಪ್ರದೇಶದ ಕಾನ್ಪುರದಲ್ಲಿ ಮಸೀದಿ ಒಂದರಿಂದ ಹೊರಗೆ ಬರುವ ವೇಳೆ ಆತನನ್ನು ಬಂಧಿಸಲಾಗಿದೆ. ಆತನನ್ನು ಲಖನೌ ಗೆ ಕರೆದುಕೊಂಡು ಬರಲಾಗಿದ್ದು, ಆತ ದೇಶ ಬಿಟ್ಟು ಪರಾರಿ ಆಗುವ ಯೋಜನೆಯಲ್ಲಿದ್ದು ಎಂದು ಉತ್ತರ ಪ್ರದೇಶ ಎಸ್ಪಿ ಓಪಿ ಸಿಂಗ್ ತಿಳಿಸಿದ್ದಾರೆ.
ಎಂಬಿಬಿಎಸ್ ವೈದ್ಯನಾಗಿದ್ದ ಡಾ.ಅಲೀಸ್ ಅನ್ಸಾರಿ 1993 ರ ಸರಣಿ ಬಾಂಬ್ ಸ್ಫೋಟದ ಪ್ರಮುಖ ಆರೋಪಿ. ಅದು ಮಾತ್ರವಲ್ಲದೇ ದೇಶದಲ್ಲಿ ನಡೆದಿರುವ ಹಲವು ಬಾಂಬ್ ಸ್ಫೋಟ ಪ್ರಕರಣಗಳಲ್ಲಿ ಈತ ತಯಾರು ಮಾಡಿದ ಬಾಂಬ್ ಬಳಕೆ ಆಗಿದೆ. ಈತನಿಗೆ ಸಿಮಿ ಉಗ್ರರು, ಇಂಡಿಯನ್ ಮುಜಾಹಿದ್ದೀನ್ ಉಗ್ರರ ಜೊತೆ ನಂಟು ಇತ್ತು.
Click it and Unblock the Notifications
Sign in with Google