ಯೂರೋಪ್‌ನಲ್ಲಿ ಕೊರೊನಾ ರಣಕೇಕೆ, ಯುಕೆಯಲ್ಲಿ ಅತಿ ಹೆಚ್ಚು ಸಾವು

Updated: Tuesday, May 5, 2020, 16:14 [IST]

ಲಂಡನ್, ಮೇ 5: ಜಗತ್ತಿನ ಮಾರಣಾಂತಿಕ ರೋಗ ಕೊರೊನಾ ವೈರಸ್‌ಗೆ ಇಡೀ ವಿಶ್ವವೇ ನಲುಗಿ ಹೋಗಿದೆ. ಅದರಲ್ಲೂ ಯೂರೋಪ್‌ ರಾಷ್ಟ್ರಗಳು ಈ ಡೆಡ್ಲಿ ಸೋಂಕಿನಿಂದ ಸಂಪೂರ್ಣ ಸಂಕಷ್ಟಕ್ಕೆ ಸಿಲುಕಿಕೊಂಡಿದೆ. ಸ್ಪೇನ್, ಇಟಲಿ, ಫ್ರಾನ್ಸ್, ಜರ್ಮನ್ ಹಾಗೂ ಯುಕೆ ದೇಶಗಳಲ್ಲಿ ಕೊರೊನಾ ಸೋಂಕು ಅಟ್ಟಹಾಸ ಮೆರೆಯುತ್ತಿದೆ.

ಯುಕೆಯಲ್ಲಿ 32 ಸಾವಿರ ಸಾವು

ಯುನೈಟೆಡ್ ಕಿಂಗ್‍ಡಮ್‌ನಲ್ಲಿ ಕೊರೊನಾ ವೈರಸ್‌ನಿಂದ ಈವರೆಗೂ 32,000 ಜನರು ಸಾವನ್ನಪ್ಪಿದ್ದಾರೆ. ಇದು ಯೂರೋಪ್‌ ರಾಷ್ಟ್ರಗಳ ಪೈಕಿ ಅತಿ ಹೆಚ್ಚು ಸಾವು ವರದಿಯಾಗಿರುವ ದೇಶ ಎನಿಸಿಕೊಂಡಿದೆ. ಸ್ಕಾಟ್ಲೆಂಡ್ ಮತ್ತು ಉತ್ತರ ಐರ್ಲೆಂಡ್‌ನಲ್ಲಿ ವರದಿಯಾಗಿರುವ ಸಾವುಗಳು ಸೇರಿದಂತೆ ಯುಕೆನಲ್ಲಿ ಒಟ್ಟು 32,000 ಜನರು ಪ್ರಾಣ ಕಳೆದುಕೊಂಡಿದ್ದಾರೆ.

ಇಟಲಿಯಲ್ಲಿ 29 ಸಾವಿರ ಸಾವು

ಯುಕೆ ನಂತರ ಇಟಲಿ ದೇಶದಲ್ಲಿ ಅತಿ ಹೆಚ್ಚು ಜನರು ಕೊರೊನಾ ಸೋಂಕಿನಿಂದ ಸಾವನ್ನಪ್ಪಿದ್ದರು. ಇಟಲಿಯಲ್ಲಿ ಈವರೆಗೂ ಒಟ್ಟು 2,11,938 ಜನರಿಗೆ ಸೋಂಕು ದೃಢಪಟ್ಟಿತ್ತು. ಅದರಲ್ಲಿ 29,079 ಜನರು ಗುಣಮುಖರಾಗದೇ ಪ್ರಾಣ ಕಳೆದುಕೊಂಡಿದ್ದರು.

ಸ್ಪೇನ್ ದೇಶದಲ್ಲಿ ನರಕ

ಯುಕೆ, ಇಟಲಿ ದೇಶಗಳಂತೆ ಸ್ಪೇನ್ ದೇಶದಲ್ಲಿ ಕೊರೊನಾ ವೈರಸ್‌ನಿಂದ ನರಕ ಸೃಷ್ಟಿಯಾಗಿದೆ. ಯೂರೋಪ್ ದೇಶಗಳ ಪೈಕಿ ಸ್ಪೇನ್‌ನಲ್ಲೆ ಹೆಚ್ಚು ಸಂಖ್ಯೆಯ ಸೋಂಕಿತರು ಇದ್ದಾರೆ. ಒಟ್ಟು 2,48,301 ಜನರಲ್ಲಿ ಸೋಂಕು ಖಚಿತವಾಗಿದ್ದು, ಅದರಲ್ಲಿ 25,428 ಜನರು ಮೃತಪಟ್ಟಿದ್ದಾರೆ.

ನಾಲ್ಕನೇ ದೇಶ ಫ್ರಾನ್ಸ್

ಫ್ರಾನ್ಸ್ ದೇಶದಲ್ಲೂ ಕೊರೊನಾ ರಣಕೇಕೆ ಹಾಕುತ್ತಿದೆ. 1,69,462 ಜನರಿಗೆ ಡೆಡ್ಲಿ ಸೋಂಕು ತಗುಲಿದ್ದು, ಅದರಲ್ಲಿ 25,201 ಜನರು ಜೀವ ಕಳೆದುಕೊಂಡಿದ್ದಾರೆ. ಫ್ರಾನ್ಸ್ ನಂತರ ಜರ್ಮನ್ ದೇಶದಲ್ಲಿ 1,66,152 ಕೇಸ್ ದಾಖಲಾಗಿದ್ದು, ಅಲ್ಲಿ ಸಾವಿನ ಸಂಖ್ಯೆ 6,993 ಸಾವು ಸಂಭವಿಸಿದೆ.