Liquor Price: ಮದ್ಯಪ್ರಿಯರೇ ಗಮನಿಸಿ: ರಾಜ್ಯದಲ್ಲಿ ಜಾರಿಯಾಯ್ತು ಹೊಸ ಅಬಕಾರಿ ನೀತಿ; ಇಲ್ಲಿದೆ ಹೊಸ ಎಂಆರ್‌ಪಿ ದರ ವಿವರ

Updated: Sunday, May 17, 2026, 20:07 [IST]

ಬೆಂಗಳೂರು: ಕರ್ನಾಟಕ ಸರ್ಕಾರವು ಮದ್ಯದ ಮೇಲಿನ ತೆರಿಗೆ ವಿಧಿಸುವ ಪದ್ಧತಿಯಲ್ಲಿ ಮಹತ್ವದ ಬದಲಾವಣೆ ತಂದಿದ್ದು, ನೂತನ 'ಆಲ್ಕೋಹಾಲ್ ಇನ್ ಬೆವರೇಜ್' (AIB-Alcohol-in-Beverage) ಆಧಾರಿತ ಅಬಕಾರಿ ಸುಂಕ ವ್ಯವಸ್ಥೆಯನ್ನು ಅಧಿಕೃತವಾಗಿ ಜಾರಿಗೆ ತಂದಿದೆ. ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ತಮ್ಮ 2026-27ನೇ ಸಾಲಿನ ಬಜೆಟ್ ಭಾಷಣದಲ್ಲಿ ಘೋಷಿಸಿದ್ದ ಈ ಮಹತ್ವದ ಸುಧಾರಣಾ ನೀತಿಯು ಈಗ ಜಾರಿಗೆ ಬಂದಿದೆ.

ಪರಿಷ್ಕೃತ ಎಂಆರ್‌ಪಿ (MRP) ದರ ಪಟ್ಟಿ ಬಿಡುಗಡೆ

ಹೊಸ ನಿಯಮದ ಪ್ರಕಾರ, ಇನ್ಮುಂದೆ ಮದ್ಯದ ಬ್ರ್ಯಾಂಡ್ ಅಥವಾ ಬೆಲೆಯ ಬದಲಾಗಿ, ಆಯಾ ಪಾನೀಯದಲ್ಲಿ ಇರುವ ಆಲ್ಕೋಹಾಲ್ ಪ್ರಮಾಣವನ್ನು ಲೆಕ್ಕ ಹಾಕಿ ತೆರಿಗೆಯನ್ನು ನಿಗದಿಪಡಿಸಲಾಗುತ್ತದೆ. ಹೊಸ ನೀತಿಯನ್ನು ವ್ಯವಸ್ಥಿತವಾಗಿ ಅನುಷ್ಠಾನಕ್ಕೆ ತರಲು ಅಬಕಾರಿ ಇಲಾಖೆಯು ರಾಜ್ಯದಲ್ಲಿ ಹೆಚ್ಚು ಮಾರಾಟವಾಗುವ ಪ್ರಮುಖ ಲಿಕ್ಕರ್ ಹಾಗೂ ಬಿಯರ್ ಬ್ರ್ಯಾಂಡ್‌ಗಳ ಗಾತ್ರ ಮತ್ತು ದರಗಳಿಗೆ ಅನುಗುಣವಾಗಿ ನೂತನ ಗರಿಷ್ಠ ಚಿಲ್ಲರೆ ಮಾರಾಟ ಬೆಲೆಯ (MRP) ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಇದರಿಂದಾಗಿ ಕೆಲವು ಮದ್ಯದ ಬ್ರ್ಯಾಂಡ್‌ಗಳ ಬೆಲೆಯಲ್ಲಿ ಏರಿಳಿತವಾಗುವ ಸಾಧ್ಯತೆಯಿದೆ.

ಅಂತರರಾಷ್ಟ್ರೀಯ ಮಟ್ಟದ ತೆರಿಗೆ ವ್ಯವಸ್ಥೆ

ವಿಶ್ವದ ಹಲವು ಮುಂದುವರಿದ ದೇಶಗಳಲ್ಲಿ ಜಾರಿಯಲ್ಲಿರುವ ಅತ್ಯುತ್ತಮ ತೆರಿಗೆ ಪದ್ಧತಿಯನ್ನು ಅಳವಡಿಸಿಕೊಳ್ಳುವ ಮೂಲಕ ಕರ್ನಾಟಕವು ದೇಶದಲ್ಲೇ ಈ ಮಾದರಿಯ ನೀತಿ ತಂದ ಮೊದಲ ರಾಜ್ಯ ಎಂಬ ಹೆಗ್ಗಳಿಕೆಗೂ ಪಾತ್ರವಾಗಿದೆ. ಈ ಹೊಸ ಸುಧಾರಣೆಯಿಂದಾಗಿ ಮದ್ಯದ ದರ ನಿಗದಿಯಲ್ಲಿ ಹೆಚ್ಚಿನ ಪಾರದರ್ಶಕತೆ ಬರಲಿದ್ದು, ಸರ್ಕಾರದ ಅಬಕಾರಿ ಆದಾಯ ಸಂಗ್ರಹಣೆ ಕೂಡ ಗಣನೀಯವಾಗಿ ಹೆಚ್ಚಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.