ಎಸ್ಎಸ್ಎಲ್‌ಸಿಯಲ್ಲಿ ಇನ್ನು ಯಾರೂ ಫೇಲ್ ಆಗಲ್ಲ..!

By Kiran B Hegde

Updated: Thursday, January 15, 2015, 11:44 [IST]

ಬೆಂಗಳೂರು, ಜ. 15: ಇನ್ನು ಮುಂದೆ ಎಸ್ಎಸ್ಎಲ್‌ಸಿ ಕಲಿತವರು ಯಾರೂ ಫೇಲಾಗಲ್ಲ. ಅವರಿನ್ನೂ ತರಗತಿ ಪೂರ್ಣಗೊಳಿಸಿರುವುದಿಲ್ಲ ಅಷ್ಟೇ! ಹೀಗೆಂದು ಶಿಕ್ಷಣ ಇಲಾಖೆ ಹೊರಡಿಸಿರುವ ಹೊಸ ಆದೇಶದಲ್ಲಿ ತಿಳಿಸಲಾಗಿದೆ.

ಎಸ್ಎಸ್ಎಲ್‌ಸಿ ಪರೀಕ್ಷೆಗೆ ಸಂಬಂಧಿಸಿದಂತೆ 2014-15ನೇ ಸಾಲಿನಿಂದ ನೂತನ ನಿರಂತರ ಮತ್ತು ಸಮಗ್ರ ಮೌಲ್ಯಮಾಪನ ಹಾಗೂ ಶ್ರೇಣಿ ವ್ಯವಸ್ಥೆಯ ಫಲಿತಾಂಶ ಪದ್ಧತಿಯನ್ನು ಜಾರಿಗೊಳಿಸಲು ರಾಜ್ಯ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಇಲಾಖೆಯು ಅಧಿಸೂಚನೆ ಹೊರಡಿಸಿದೆ. ಇದರ ಪ್ರಕಾರ ಅನುತ್ತೀರ್ಣ ಬದಲು ನಾಟ್ ಕಂಪ್ಲೀಟೆಡ್ ಎಂದು ನಮೂದಿಸಲು ನಿರ್ಧರಿಸಲಾಗಿದೆ. [ಎಸ್ಎಸ್ಎಲ್ ಸಿ ಮಾರ್ಗದರ್ಶಿಗೆ ಮೆಚ್ಚುಗೆ]

ವಿದ್ಯಾರ್ಥಿಯೋರ್ವ ಒಟ್ಟು 219ಕ್ಕಿಂತ ಕಡಿಮೆ ಅಂಕ ಪಡೆದಲ್ಲಿ ಅಥವಾ ಪ್ರತಿ ವಿಷಯದಲ್ಲಿ ಶೇ. 30ಕ್ಕಿಂತ ಕಡಿಮೆ ಅಂಕ ಪಡೆದರೆ ಅವರನ್ನು ಮೊದಲು 'ಅನುತ್ತೀರ್ಣ' ಎಂದು ಪರಿಗಣಿಸಲಾಗುತ್ತಿತ್ತು. ಇನ್ನು ಮುಂದೆ 'ನಾಟ್ ಕಂಪ್ಲೀಟೆಡ್' ಎಂದು ಪರಿಗಣಿಸಲಾಗುವುದು. ಅಂದರೆ ಇಂತಹ ವಿದ್ಯಾರ್ಥಿಗಳು ಉತ್ತೀರ್ಣರಾಗಿರುವುದಿಲ್ಲ ಅಷ್ಟೇ.

ಆಂತರಿಕ ಮೌಲ್ಯಮಾಪನಕ್ಕೆ ಕನಿಷ್ಠ ಅಂಕವಿಲ್ಲ : ಈ ಮೊದಲು ವಿದ್ಯಾರ್ಥಿಗಳು ಉತ್ತೀರ್ಣರಾಗಲು ಆಂತರಿಕ ಮೌಲ್ಯಮಾಪನದಲ್ಲಿಯೂ ನಿಗದಿತ ಅಂಕ ಪಡೆಯಬೇಕಾಗಿತ್ತು. ಈ ನಿಯಮ ರದ್ದುಪಡಿಸಲಾಗಿದೆ. ಆದ್ದರಿಂದ ವಿದ್ಯಾರ್ಥಿಯೋರ್ವ ಉತ್ತೀರ್ಣನಾಗಲು ಪ್ರತಿ ವಿಷಯದಲ್ಲಿ ಕನಿಷ್ಠ ಶೇ. 30 ಹಾಗೂ ಒಟ್ಟೂ ಶೇ. 35 ಅಂಕ ಗಳಿಸಿದರೆ ಸಾಕು. [ಎಸ್ಎಸ್ಎಲ್ ಸಿ ಪರೀಕ್ಷಾ ವೇಳಾಪಟ್ಟಿ ಪ್ರಕಟ]

ಅಲ್ಲದೆ, ಪ್ರತಿ ಶ್ರೇಣಿಯಲ್ಲಿ ಒಂದೊಂದು ಅಂಕ ಹೆಚ್ಚಳ ಮಾಡಿದೆ. ಈ ಮೊದಲು ಉತ್ತೀರ್ಣನಾಗಲು ವಿದ್ಯಾರ್ಥಿಯೋರ್ವ 625 ಅಂಕಗಳಿಗೆ 219 ಅಂಕ ಪಡೆಯಲೇ ಬೇಕಾಗಿತ್ತು. ಆದರೆ, 'ಸಿ' ಗ್ರೇಡ್ ಫಲಿತಾಂಶಕ್ಕಾಗಿ 219ರಿಂದ 311 ಅಂಕ ಗಳಿಸುವುದು ಕಡ್ಡಾಯವಾಗಿತ್ತು. ಶೇಕಡಾವಾರು ಲೆಕ್ಕಾಚಾರದಲ್ಲಿಯೂ ಶೇ. 35ರಿಂದ 49 ಎಂದು ಅಂಕ ನೀಡುವ ಬದಲು ಶೇ. 30ರಿಂದ 49 ಎಂದು ತಿಳಿಸಲಾಗಿತ್ತು. ಪ್ರಸ್ತುತ ಸರ್ಕಾರ ಈ ತಪ್ಪು ಸರಿಪಡಿಸಲಾಗಿದೆ. 219ರಿಂದ 312 ಅಂಕ ಗಳಿಸಿದವರು ಅಂದರೆ ಶೇ. 35ರಿಂದ ಶೇ. 50 ಅಂಕ ಗಳಿಸಿದವರಿಗೆ 'ಸಿ' ಗ್ರೇಡ್ ಸಿಗಲಿದೆ. [ಮಕ್ಕಳು ನಿದ್ದೆ ಮಾಡ್ತಿದ್ರೆ ಮೇಷ್ಟ್ರು ಫೋನ್ ಮಾಡ್ತಾರೆ]

ಆಂತರಿಕ ಮೌಲ್ಯಮಾಪನಕ್ಕೆ ಶೇ. 20 ಅಂಕ : ಮೊದಲು ಸಿಸಿಇ ಪದ್ಧತಿಯಲ್ಲಿ ಶೇ. 100ರಷ್ಟು ಅಂಕಗಳಿಗೆ ಲಿಖಿತ ಪರೀಕ್ಷೆ ಪದ್ಧತಿ ಇತ್ತು. ಇದೀಗ ಬದಲಾಗಿದೆ. ಶೇ. 80 ಅಂಕಗಳಿಗೆ ಮಾತ್ರ ಬಾಹ್ಯ ಲಿಖಿತ ಪರೀಕ್ಷೆ ನಡೆಯಲಿದೆ. ಆಂತರಿಕ ಮೌಲ್ಯಮಾನಪಕ್ಕಾಗಿ ಶೇ. 20 ಅಂಕಗಳನ್ನು ನಿಗದಿಪಡಿಸಲಾಗಿದೆ. [ಶಿಕ್ಷಣ ಕ್ಷೇತ್ರ ಸುಧಾರಣೆಯ ಕನಸು]

ಒಟ್ಟು 625 ಅಂಕಗಳಿಗೆ ಪರಿಷ್ಕೃತ ಅಂಕ ಹಾಗೂ ಶ್ರೇಣಿ ಈ ಕೆಳಗಿನಂತಿದೆ.