Karnataka Dam Water Level: ಮುಂಗಾರು ಅಬ್ಬರಕ್ಕೆ ರಾಜ್ಯದ ಅಣೆಕಟ್ಟುಗಳಿಗೆ ಜೀವಕಳೆ, ಇಂದಿನ ಮಟ್ಟ ಎಷ್ಟಿದೆ?

Published: Thursday, June 11, 2026, 20:20 [IST]

ಬೆಂಗಳೂರು: ರಾಜ್ಯಾದ್ಯಂತ ಮುಂಗಾರು ಮಳೆ ಆರ್ಭಟಿಸುತ್ತಿದೆ. ಕರಾವಳಿ, ಪಶ್ಚಿಮ ಘಟ್ಟಗಳ ಸಾಲಿನ ಅಲಲ್ಲಿ ಕಳೆದೊಂದು ವಾರದಿಂದ ಉತ್ತಮ ಮಳೆ ಸುರಿದಿದೆ. ಕಳೆದ ವರ್ಷ ಸುರಿದ ಉತ್ತಮ ಮುಂಗಾರು, ಹಿಂಗಾರು ಮಳೆಯಿಂದಾಗಿ ರಾಜ್ಯದ ಕಾವೇರಿ, ಕಬಿನಿ ಸೇರಿ ಕೆಲವು ಜಲಾಶಯಗಳಲ್ಲಿ ತಕ್ಕಮಟ್ಟಿಗಿನ ನೀರಿತ್ತು. ಇನ್ನುಳಿದಂತೆ ಹಲವಾರು ಡ್ಯಾಂಗಳು ನೀರಿಲ್ಲದೇ ಬಣಗುಡುತ್ತಿದ್ದವು. ಇದೀಗ ವ್ಯಾಪಕ ಮಳೆಯಿಂದಾಗಿ ಜೂನ್ ಎರಡನೇ ವಾರದಲ್ಲಿ ವಿವಿಧ ಅಣೆಕಟ್ಟುಗಳಲ್ಲಿ ಒಳಹರಿವು ಹೆಚ್ಚಾಗುತ್ತಿದೆ. ರಾಜ್ಯದ ಪ್ರಮುಖ ಜಲಾಶಯಗಳ ಇಂದಿನ (ಜೂನ್ 11) ನೀರಿನ ಮಟ್ಟದ ಮಾಹಿತಿ ಮುಂದಿದೆ.

ಕೆಲವು ವಾರಗಳಿಂದ ಕೇರಳ ಭಾಗದಲ್ಲಿ ಸಾಧಾರಣದಿಂದ ಭಾರೀ ಮಳೆ ಆಗಿದೆ. ಜಲಾಶಯಗಳ ಜಲಾನಯನ ಪ್ರದೇಶದಲ್ಲಿ ನಿರಂತರ ಮಳೆ ಸುರಿದ ಪರಿಣಾಮ ಕರ್ನಾಟಕ ಪ್ರಮುಖ ಅಣೆಕಟ್ಟುಗಳಾದ ಕೆಆರ್‌ ಎಸ್, ಕಬಿನಿ, ಲಿಂಗನಮಕ್ಕಿ, ಹಾರಂಗಿ, ನಾರಾಯಣಪುರದಲ್ಲಿ ಒಳಹರಿವು ಏರಿಕೆ ಆಗಿದೆ. ಹೊರ ಹರಿವುಗಿಂತ ಒಳಹರಿವಿನ ಪ್ರಮಾಣ ಹೆಚ್ಚಾಗಿದೆ. ಮುಂದಿನ ಕೆಲವೇ ವಾರಗಳಲ್ಲಿ ಎಲ್ಲ ಡ್ಯಾಂಗಳಲ್ಲಿ ಜೀವಕಳೆ ಮರುಕಳಿಸುತ್ತದೆ.

ಕೃಷ್ಣ ರಾಜ ಸಾಗರ (KRS) ಅಣೆಕಟ್ಟು ಕಳೆದ ವರ್ಷ ಜೂನ್ ತಿಂಗಳಲ್ಲೇ ನಿರೀಕ್ಷೆಗೂ ಮೀರಿ ಭರ್ತಿ ಆಗಿತ್ತು. ಸುಮಾರು ಮೂರು ಸಲ ತುಂಬಿ ಹರಿದಿತ್ತು. ಇದರಿಂದ ಬೆಂಗಳೂರು, ಮಂಡ್ಯ, ಮೈಸೂರು, ರಾಮನಗರ ಸೇರಿ ವಿವಿಧ ಭಾಗಗಳು, ಅಷ್ಟೇ ಯಾಕೆ ತಮಿಳುನಾಡಿಗೂ ಉತ್ತಮ ನೀರಿನ ಪೂರೈಕೆ ಆಗಿ ಬೇಸಿಗೆ ಹಾಹಾಕಾರ ತಪ್ಪಿತ್ತು. ಈ ಸಲವು ಉತ್ತಮ ಮುಂಗಾರಿನ ಆರಂಭವಾಗಿದ್ದು, ಇದೇ ರೀತಿ ಮಳೆ ಮುಂದುವರಿಯುವ ನಿರೀಕ್ಷೆ ಇದೆ. ಜುಲೈ ಹೊತ್ತಿಗೆ ಡ್ಯಾಂಗಳಲ್ಲಿ ನಿರೀಕ್ಷಿತ ನೀರು ಸಂಗ್ರಹವಾಗುವ ಸಾಧ್ಯತೆ ಇದೆ.