ಇ-ಸಿಗರೇಟ್, ಇ-ಹುಕ್ಕಾ ನಿಷೇಧಕ್ಕೆ ಕೇಂದ್ರದಿಂದ ಎಲ್ಲ ರಾಜ್ಯಗಳಿಗೆ ಸೂಚನೆ
ಬೆಂಗಳೂರು, ಆಗಸ್ಟ್ 30: ಯುವಪೀಳಿಗೆ ಸಿಗರೇಟ್, ಮದ್ಯಪಾನ, ಡ್ರಗ್ಸ್ ಕಡೆಗೆ ಆಕರ್ಷಿತರಾಗಿ ತಮ್ಮ ಜೀವವನ್ನೇ ಕಳೆದುಕೊಳ್ಳುತ್ತಿದ್ದಾರೆ. ಇವುಗಳ ಸಾಲಿಗೆ ಎಲೆಕ್ಟ್ರಾನಿಕ್ ಸಿಗರೇಟ್ ಕೂಡ ಸೇರ್ಪಡೆಯಾಗಿತ್ತು.
ಇದೀಗ ಕೇಂದ್ರ ಸರ್ಕಾರವು ಎಲೆಕ್ಟ್ರಾನಿಕ್ ಸಿಗರೇಟ್, ವೇಪ್, ಇ-ಶೀಶಾ, ಇ-ಹುಕ್ಕಾಗಳನ್ನು ನಿಷೇಧಿಸುವಂತೆ ರಾಜ್ಯ ಸರ್ಕಾರಗಳಿಗೆ ಸಲಹೆ ನೀಡಿದೆ. ಇ-ಸಿಗರೇಟ್ ಸೇವನೆಯಿಂದ ಗರ್ಭಿಣಿಯರು, ಅಪ್ರಾಪ್ತರು, ಮಕ್ಕಳ ಮೇಲೆ ತೀವ್ರ ಪರಿಣಾಮ ಬೀರುತ್ತಿದೆ.
ಇ-ಸಿಗರೇಟ್ ಗಳ ಬೆದರಿಕೆಗೆ ತಡೆಯೊಡ್ಡುವ ಕ್ರಮ ಕೈಗೊಳ್ಳುವಲ್ಲಿ ಕೇಂದ್ರ ಸರ್ಕಾರ ವಿಳಂಬ ತೋರುತ್ತಿದೆ ಎಂದು ದೆಹಲಿ ಹೈಕೋರ್ಟ್ ಇತ್ತೀಚೆಗೆ ಹೇಳಿತ್ತು.
ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಕೇಂದ್ರ ಸರ್ಕಾರ ಇ-ಸಿಗರೇಟ್ ನಿಷೇಧಿಸುವಂತೆ ಸೂಚನೆ ನೀಡಿದೆ. ಈ ಹಿನ್ನೆಲೆಯಲ್ಲಿ ಆರೋಗ್ಯ ಸಚಿವಾಲಯ ಎಲ್ಲಾ ರಾಜ್ಯ, ಕೇಂದ್ರಾಡಳಿತ ಪ್ರದೇಶಗಳಿಗೆ ಸಲಹೆಯನ್ನು ರವಾನಿಸಿದೆ.
ಅತಿಯಾದ ಹೊಗೆ ಶ್ವಾಸಕೋಶದ ಮೇಲೆ ಪರಿಣಾಮ ಬೀರುತ್ತಿದೆ ಎಂಬ ದೃಷ್ಟಿಯಿಂದ ಮಾರುಕಟ್ಟೆಗೆ ಇ- ಸಿಗರೇಟ್ ಬಂದಿದೆ. ಆದರೆ ಇ-ಸಿಗರೇಟ್ ಉಪಕಾರದ ಬದಲು ಅಪಕಾರವೇ ಹೆಚ್ಚು. ಧೂಮಪಾನದ ಚಟದಿಂದ ಪಾರಾಗಲು ಇ- ಸಿಗರೇಟ್ ಸೇದಲು ಆರಂಭಿಸಿದ್ದ ಎಷ್ಟೋ ಜನರು ಈಗ ಅದಕ್ಕೆ ದಾಸರಾಗಿಬಿಟ್ಟಿದ್ದಾರೆ.
ಹಾನಿಕಾರಕ ನಿಕೋಟಿನ್ ಇ-ಸಿಗರೇಟ್ ಮೂಲಕ ಜನರನ್ನು ತಲುಪುತ್ತಿದೆ
ಆಕರ್ಷಕವಾಗಿ ನಿಕೊಟಿನ್ ಅನ್ನು ಇ-ಸಿಗರೇಟ್ ಗಳ ಮೂಲಕ ಕಂಪನಿಗಳು ಜನರಿಗೆ ತಲುಪಿಸುತ್ತಿವೆ ಎನ್ನುವುದು ತಜ್ಞರ ಅಭಿಪ್ರಾಯವಾಗಿದೆ. ತಂಬಾಕು ಸಲಕರಣೆಗಳ ಫಿಲಿಪ್ ಮೋರಿಸ್ನಂಥ ಅಂತಾರಾಷ್ಟ್ರೀಯ ಕಂಪನಿಗಳು ಭಾರತಕ್ಕೆ ಬರಲು ಯೋಜನೆ ರೂಪಿಸುತ್ತಿದೆ.
ಇ-ಸಿಗರೇಟ್ ಭಾರಿ ಡೆಂಜರ್
ಇ-ಸಿಗರೇಟ್ ನಲ್ಲಿ ದ್ರವರೂಪದ ನಿಕೋಟಿನ್ ಇರುತ್ತದೆ. ಹೀಗಾಗಿ ಸಾಮಾನ್ಯ ಸಿಗರೇಟಿಗಿಂತಲೂ ಇ-ಸಿಗರೇಟುಗಳ ಬಳಕೆಯಿಂದ ಅಪಾಯ ದೊಡ್ಡ ಮಟ್ಟದ್ದಾಗಿರುತ್ತದೆ. ಕ್ಯಾನ್ಸರ್ ನ ಅಪಾಯವೂ ಇದೆ, ದೀರ್ಘಕಾಲದಲ್ಲಿ ಆರೋಗ್ಯದ ಮೇಲೆ ಗಂಭೀರ ಪರಿಣಾಮವನ್ನು ಬೀರುತ್ತದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಧೂಮಪಾನ ಚಟದಿಂದ ಮುಕ್ತಿ ನೀಡಲು ಇ-ಸಿಗರೇಟ್ ಕಂಡುಹಿಡಿಯಲಾಗಿತ್ತು
ಇ-ಸಿಗರೇಟ್ನ ಅತ್ಯಂತ ದೊಡ್ಡ ವಿಪರ್ಯಾಸವೆಂದರೆ ಧೂಮ್ರಪಾನದ ಚಟದಿಂದ ಮುಕ್ತಿ ನೀಡಲು ಅದನ್ನು ಪರಿಚಯಿಸಲಾಗಿತ್ತಾದರೂ ಹೆಚ್ಚಿನ ಪ್ರಕರಣಗಳಲ್ಲಿ ಅದು ವ್ಯಕ್ತಿಯನ್ನು ತಂಬಾಕಿನ ದಾಸನನ್ನಾಗಿಸಿದೆ. ಇ-ಸಿಗರೇಟ್ ಬಳಸುವ ಹದಿಹರೆಯದವರಲ್ಲಿ ತಂಬಾಕಿನ ಚಟ ಉಂಟಾಗುವ ಸಾಧ್ಯತೆ ನಾಲ್ಕು ಪಟ್ಟು ಹೆಚ್ಚಿದೆ ಎನ್ನುವುದನ್ನು ಇತ್ತೀಚಿನ ಅಧ್ಯಯನವೊಂದು ಬೆಳಕಿಗೆ ತಂದಿದೆ.
ಏನಿದು ಇ-ಸಿಗರೇಟ್?
ಇ-ಮಯ ಎಂಬುದು ಸಿಗರೇಟ್ ನ್ನು ಸಹ ಬಿಟ್ಟಿಲ್ಲ. ತಂಬಾಕಿನ ಸಿಗರೇಟ್ ಗಿಂತ ಇ- ಸಿಗರೇಟ್ ಭಿನ್ನವಾಗಿರುತ್ತದೆ. ಬ್ಯಾಟರಿ ಚಾಲಿತ ಇ-ಸಿಗರೇಟ್ ನಲ್ಲಿ ತಂಬಾಕು ಇರೋದಿಲ್ಲ. ನಿಕೋಟಿನ್ ಮೊದಲಾದ ರಾಸಾಯನಿಕ ವಸ್ತುಗಳನ್ನು ಒಳಗೊಂಡಿರುವ ದ್ರವದ ಕಾರ್ಟಿಜ್ ಅನ್ನು ಬಿಸಿ ಮಾಡಿ ಅದರಿಂದ ಬರುವ ಹಬೆಯನ್ನು ಉಸಿರಾಡುವ ಮೂಲಕ ಎಲೆಕ್ಟ್ರಾನಿಕ್ ಸಿಗರೇಟ್ ಅನ್ನು ಸೇದಬಹುದಾಗಿದೆ.
2003ರಲ್ಲಿ ಚೀನಾ ಔಷಧ ವ್ಯಾಪಾರಿ ಹೋನ್ ಲಿಕ್ ಎಂಬಾತ ಈ ಆಧುನಿಕ ಇ-ಸಿಗರೇಟ್ ಅನ್ನು ಆವಿಷ್ಕರಿಸಿದ್ದ. ಇ-ಸಿಗರೇಟ್ ಆ್ಯಪಲ್, ಮ್ಯಾಂಗೋ, ಚೆರಿ ಹೀಗೆ ವಿವಿಧ ಫ್ಲೇವರ್ ಗಳು ದೊರೆಯುತ್ತದೆ. ಇ-ಸಿಗರೇಟ್ ಅನ್ನು ಜೇಬಲ್ಲಿ ಸುಲಭವಾಗಿ ಇಟ್ಟುಕೊಳ್ಳಬಹುದಾಗಿದೆ. ಈ ಸಾಧನ 300ರಿಂದ 3,500 ರುಪಾಯಿಯವರೆಗೂ ದೊರೆಯುತ್ತದೆ.
ಬೆಂಗಳೂರಿನ ಬಾರ್, ಹೋಟೆಲ್ ಗಳಲ್ಲಿ ಧೂಮಪಾನ ನಿಷೇಧ
ಬೆಂಗಳೂರಿನ ಬಾರ್, ಹೋಟೆಲ್, ಕ್ಲಬ್ ಗಳನ್ನು ಸಾರ್ವಜನಿಕವಾಗಿ ಧೂಮಪಾನವನ್ನು ನಿಷೇಧಿಸಲಾಗಿದೆ. ಒಂದೊಮ್ಮೆ ಧೂಮಪಾನಕ್ಕೆ ಅವಕಾಶ ನೀಡುವುದಾದರೆ ಪ್ರತ್ಯೇಕ ಸ್ಮೋಕಿಂಗ್ ಝೋನ್ ತೆರೆಯಲೇ ಬೇಕಾಗಿದೆ. ಒಂದಮ್ಮೆ ಆ ರೀತಿ ಮಾಡದಿದ್ದಲ್ಲಿ ಉದ್ದಿಮೆ ಪರವಾನಗಿ ರದ್ದು ಮಾಡಲಾಗುತ್ತದೆ ಎಂದು ಬಿಬಿಎಂಪಿ ಎಚ್ಚರಿಕೆ ನೀಡಿದೆ.
Click it and Unblock the Notifications
Sign in with Google