ಲೈಂಗಿಕ ಕಿರುಕುಳ: ಬಂಟ್ವಾಳ ಬಸ್ ಕಂಡಕ್ಟರಿಗೆ ಧರ್ಮದೇಟು

ಬಂಟ್ವಾಳ, ಸೆ.13: ಮೂರು ದಿನಗಳಿಂದ ದೇಶದ ಸಮಸ್ತ ಪ್ರಜ್ಞಾವಂತ ನಾಗರಿಕರು ದೆಹಲಿಯ ಸಾಂಕೇತ್ ಕೋರ್ಟಿನತ್ತ ಕಣ್ಣು ನೆಟ್ಟಿದ್ದಾರೆ. ಅದರಲ್ಲೂ ಇಂದು ದೆಹಲಿ ಗ್ಯಾಂಗ್ ರೇಪ್ ಮತ್ತು ಮರ್ಡರ್ ಪ್ರಕರಣದಲ್ಲಿ 4 ಆರೋಪಿಗಳಿಗೆ ಶಿಕ್ಷೆಯ ಪ್ರಮಾಣ ಪ್ರಕಟವಾಗಲಿದೆ. ಹಾಗಾಗಿ ಮಹಿಳೆಯ ಮೇಲೆ ನಡೆಯುತ್ತಿರುವ ನಿರಂತರ ದೌರ್ಜನ್ಯಕ್ಕೆ ಲಗಾಮು ಹಾಕುವ ನಿಟ್ಟಿನಲ್ಲಿ ಇಂದು Judgement Day ಆಗುತ್ತದೆ.

ಈ ಮಧ್ಯೆ, ಬಂಟ್ವಾಳದಲ್ಲೊಂದು ಲೈಂಗಿಕ ಕಿರುಕುಳ ಪ್ರಕರಣ ನಡೆದಿದ್ದು ಆರೋಪಿ ಬಸ್ ಕಂಡಕ್ಟರಿಗೆ ಸಮ ಧರ್ಮದೇಟು ಬಿದ್ದಿದೆ. ಇಲ್ಲಿನ ಮೆಲ್ಕಾರ್ ಜಂಕ್ಷನ್ನಿನಲ್ಲಿ ಗುರುವಾರ ಈ ಘಟನೆ ನಡೆದಿದೆ. ಮಂಗಳೂರು ಮತ್ತು ಬಿಸಿ ರೋಡ್ ಮಧ್ಯೆ ಸಂಚರಿಸುವ ಬಸ್ಸಿನ ಕಂಡಕ್ಟರ್ ಮೊಹಮ್ಮದ್ ಸಹ ಪ್ರಯಾಣಿಕರಿಂದ ಏಟು ತಿಂದು ಆಸ್ಪತ್ರೆ ಸೇರಿರುವ ಆರೋಪಿ.

ಕಂಡಕ್ಟರ್ ಮೊಹಮ್ಮದ್ ಲೈಂಗಿಕ ಕಿರುಕುಳ ನೀಡತೊಡಗಿದಾಗ ಬಾಧಿತ ಮಹಿಳೆ, ಕುಕ್ಕಾಜೆ ನಿವಾಸಿ ಕೆನ್ನೆಗೆ ಬಾರಿಸಿದ್ದಾರೆ. ಹಿಂದೆ ಪುರುಷರ ಸೀಟಿನಲ್ಲಿ ಕುಳಿತಿದ್ದ ಬಾಧಿತ ಮಹಿಳೆಯ ಪತಿ, ಮೊಹಮ್ಮದನನ್ನು ಮುಂದಿನ ನಿಲ್ದಾಣದಲ್ಲಿ ಬಸ್ಸಿಂದ ಕೆಳಗಿಳಿಸಿ ವಿಚಾರಿಸಿಕೊಂಡಿದ್ದಾರೆ. ಇದಕ್ಕೆ ಸಹ ಪ್ರಯಾಣಿಕರೂ ಸಾಥ್ ನೀಡಿದ್ದಾರೆ. ಹಾಗೆಯೇ ಕೈಗೊಂದು ಏಟು ಎಂಬಂತೆ ಎಲ್ಲರೂ ಮೊಹಮ್ಮದನನ್ನು ಥಳಿಸಿದ್ದಾರೆ.

ಸ್ಥಳಕ್ಕೆ ದೌಡಾಯಿಸಿದ ಪೊಲೀಸರು ಮೊಹಮ್ಮದನನ್ನು ಗುಂಪಿನಿಂದ ಬಿಡಿಸಿಕೊಂಡು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಈ ಹಿಂದೆಯೂ ಮೊಹಮ್ಮದ್ ಇದೇ ರೀತಿ ಇತರೆ ಮಹಿಳಾ ಪ್ರಯಾಣಿಕರನ್ನು ಗೋಳುಹೊಯ್ದುಕೊಂಡಿದ್ದ ಎಂದು ಪ್ರಯಾಣಿಕರು ಆರೋಪಿಯನ್ನು ದೂಷಿಸಿದ್ದಾರೆ.

English summary

Bantwal: Bus conductor Mohammed thrashed for indecent behavior with lady passenger. Mohammed, a conductor of Mangalore to BC Road bus, was the one who was beaten up. The woman from Kukkaje slapped the conductor when he acted indecently with her. Her husband who was sitting behind in the bus, made the conductor get down in the next stop. Other passengers and passersby also assaulted the conductor.