ರಾಜಸ್ಥಾನದಲ್ಲಿ ಮನೆ ಮುಂದೆ ಉಗುಳಿದ್ದು ಮುಸ್ಲಿಂ ಮಹಿಳೆಯರಲ್ಲ, ಮತ್ಯಾರು?
ಜೈಪುರ, ಏಪ್ರಿಲ್ 17: ಕಳೆದ ನಾಲ್ಕು ದಿನಗಳ ಹಿಂದೆ ರಾಜಸ್ಥಾನದ ಕೋಟ ನಗರದಲ್ಲಿ ಘಟನೆಯೊಂದು ನಡೆದಿತ್ತು. ಕೆಲವು ಮಹಿಳೆಯರು ಮನೆಗಳ ಮುಂದೆ ಉಗುಳುತ್ತಿರುವ ದೃಶ್ಯಗಳು ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿತ್ತು. ಕವರ್ನಲ್ಲಿ ಉಗುಳಿ, ಅದನ್ನು ಮನೆಗಳ ಮುಂದೆ ಬಿಸಾಡಿ ಹೋಗುತ್ತಿರುವ ದೃಶ್ಯ ಸೆರೆಯಾಗಿತ್ತು.
ಕೊರೊನಾ ವೈರಸ್ ಹರಡುತ್ತಿರುವ ಈ ಸಮಯದಲ್ಲಿ ಆ ಮಹಿಳೆಯರು ಮಾಡಿದ ಕೆಲಸ ನಿಜಕ್ಕೂ ಆತಂಕ ಸೃಷ್ಟಿಸಿತ್ತು. ಬಳಿಕ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ದೊಡ್ಡ ಸದ್ದು ಮಾಡಿತು. ಅದು ಎಷ್ಟರ ಮಟ್ಟಿಗೆ ಅಂದ್ರೆ ಈ ವಿಡಿಯೋ ಕೋಮುವಾದಕ್ಕೆ ಸಿಲುಕೊಂಡಿತು.
ಸೋಶಿಯಲ್ ಮೀಡಿಯಾದಲ್ಲಿ ಕೆಲವರು ಈ ವಿಡಿಯೋ ಶೇರ್ ಮಾಡಿ, ಮುಸ್ಲಿಂ ಮಹಿಳೆಯರು ಉದ್ದೇಶಪೂರ್ವಕವಾಗಿ ಕೊರೊನಾ ಸೋಂಕು ಹರಡಿಸುತ್ತಿದ್ದಾರೆ. ಅದಕ್ಕಾಗಿ ಮನೆಗಳ ಮುಂದೆ ಉಗುಳುತ್ತಿದ್ದಾರೆ ಎಂದು ಆರೋಪಿಸಿದರು.
ಸಿಸಿಟಿವಿ ಆಧರಿಸಿದ ಪೊಲೀಸರು ಈ ಪ್ರಕರಣವನ್ನು ಬಹಳ ಗಂಭೀರವಾಗಿ ಪರಿಗಣಿಸಿದರು. ನಂತರ, ಸಿಸಿಟಿವಿಯಲ್ಲಿ ಸೆರೆಯಾಗಿದ್ದ ಐದು ಜನರ ಮಹಿಳೆಯರನ್ನು ಪೊಲೀಸರು ಬಂಧಿಸಿ ವಿಚಾರಣೆ ನಡೆಸಿದ್ದಾರೆ. ವಿಚಾರಣೆ ವೇಳೆ ಅವರು ಮುಸ್ಲಿಂ ಮಹಿಳೆಯರು ಅಲ್ಲ ಎನ್ನುವುದು ತಿಳಿದುಬಂದಿದೆ. ಈ ಮೂಲಕ ಮುಸ್ಲಿಂ ಮಹಿಳೆಯರು ಎಂದು ವಿಡಿಯೋ ಶೇರ್ ಮಾಡಿದ್ದವರಿಗೆ ಮುಖಭಂಗವಾಗಿದೆ.
ಪ್ರಾಥಮಿಕ ವರದಿ ಪ್ರಕಾರ, ಈ ಮಹಿಳೆಯರು ಬವಾರಿ ಸಮುದಾಯದವರಾಗಿದ್ದು, ಭಿಕ್ಷೆ ಕೊಟ್ಟಿಲ್ಲ ಎಂಬ ಕಾರಣಕ್ಕೆ ಆ ರೀತಿ ಮನೆ ಮುಂದೆ ಉಗುಳಿದ್ದಾರೆ ಎಂದು ಮಾಹಿತಿ ನೀಡಿದ್ದಾರೆ. ಕುನ್ಹರಿಯ ಬಾಪು ಕಚ್ಚಿ ಬಸ್ತಿ ನಿವಾಸಿಗಳಾದ ಮಾಲಾ ಬವಾರಿ (30), ಅನರಿಯಾ ಬವಾರಿ (65), ದುಲಾರಿ ಬವಾರಿ (35), ಆಶಾ ಬವಾರಿ (35) ಮತ್ತು ಚಂದಾ ಬವರಿ (20) ಎಂದು ಗುರುತಿಸಲಾಗಿದೆ.
ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಈ ಐದು ಮಹಿಳೆಯವರನ್ನು 14 ದಿನಗಳ ನ್ಯಾಯಾಂಗ ಬಂಧನಕ್ಕೆ ನೀಡುವಂತೆ ನ್ಯಾಯಾಲಯ ಆದೇಶಿಸಿದೆ.
Click it and Unblock the Notifications
Sign in with Google