India-EU Trade Deal: ಭಾರತ-ಐರೋಪ್ಯ ಒಕ್ಕೂಟ ವಾಣಿಜ್ಯ ಒಪ್ಪಂದಕ್ಕೆ ಸಹಿ, ಅಗ್ಗವಾಗಲಿವೆಯೇ ಬೆಂಜ್, ಆಡಿ ಕಾರುಗಳು?

Updated: Tuesday, January 27, 2026, 16:55 [IST]

ನವದೆಹಲಿ: ಭಾರತ ಮತ್ತು ಐರೋಪ್ಯ ಒಕ್ಕೂಟದ ನಡುವಿನ ಆರ್ಥಿಕ ಬಾಂಧವ್ಯದಲ್ಲಿ ಇಂದು ಹೊಸ ಅಧ್ಯಾಯವೊಂದು ಆರಂಭವಾಗಿದೆ. ವಿಶ್ವದ ಎರಡು ಬೃಹತ್ ಆರ್ಥಿಕ ಶಕ್ತಿಗಳ ನಡುವೆ ದೀರ್ಘಕಾಲದಿಂದ ನೆನೆಗುದಿಗೆ ಬಿದ್ದಿದ್ದ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ ಅಂತಿಮವಾಗಿ ತೆರೆಬಿದ್ದಿದೆ. ಮಂಗಳವಾರ ಪ್ರಧಾನಿ ನರೇಂದ್ರ ಮೋದಿ ಮತ್ತು ಐರೋಪ್ಯ ಆಯೋಗದ ಅಧ್ಯಕ್ಷೆ ಉರ್ಸುಲಾ ವಾನ್ ಡೆರ್ ಲೇಯನ್ ಅವರು ಈ ಐತಿಹಾಸಿಕ ಒಪ್ಪಂದವನ್ನು ಅಂತಿಮಗೊಳಿಸಿರುವುದಾಗಿ ಘೋಷಿಸಿದ್ದಾರೆ.

ಈ ಒಪ್ಪಂದವು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರೀ ಗಮನ ಸೆಳೆದಿದ್ದು, ಎರಡೂ ಕಡೆ ವ್ಯಾಪಾರ ವಹಿವಾಟಿಗೆ ಬಲವಾದ ಉತ್ತೇಜನ ನೀಡಲಿದೆ. ಈ ಒಪ್ಪಂದದ ಅಡಿಯಲ್ಲಿ, ಶೇ. 90 ಕ್ಕೂ ಹೆಚ್ಚು ಭಾರತೀಯ ಸರಕುಗಳ ಮೇಲಿನ ಸುಂಕ ಮತ್ತು ಸುಂಕ ರಹಿತ ಅಡೆತಡೆಗಳನ್ನು ತೆಗೆದುಹಾಕುವ ನಿರೀಕ್ಷೆಯಿದೆ. ಇದರಿಂದಾಗಿ ಭಾರತದ ಜವಳಿ, ಚರ್ಮ, ರಾಸಾಯನಿಕ, ಎಲೆಕ್ಟ್ರಾನಿಕ್ಸ್ ಮತ್ತು ಆಭರಣ ಉದ್ಯಮಗಳಿಗೆ ಯುರೋಪ್ ಮಾರುಕಟ್ಟೆಯಲ್ಲಿ ದೊಡ್ಡ ಮಟ್ಟದ ಅವಕಾಶಗಳು ತೆರೆದುಕೊಳ್ಳಲಿವೆ. ಈ ವಲಯಗಳು ಯುರೋಪಿಯನ್ ತಯಾರಕರೊಂದಿಗೆ ನೇರ ಪೈಪೋಟಿ ಹೊಂದಿಲ್ಲದ ಕಾರಣ, ಭಾರತೀಯ ರಫ್ತುದಾರರಿಗೆ ಇದು ವರದಾನವಾಗಲಿದೆ.

ವಾಹನ ಪ್ರಿಯರಿಗೆ ಬಂಪರ್ ಸುದ್ದಿ: ಇಳಿಯಲಿದೆ ಕಾರುಗಳ ಬೆಲೆ

ಈ ಒಪ್ಪಂದದ ಅತ್ಯಂತ ರೋಚಕ ಸಂಗತಿ ಎಂದರೆ ಭಾರತದ ಆಟೋಮೊಬೈಲ್ ಕ್ಷೇತ್ರದಲ್ಲಿ ಆಗಲಿರುವ ಬದಲಾವಣೆ. ಒಪ್ಪಂದದ ಅನ್ವಯ, ಯುರೋಪಿಯನ್ ಒಕ್ಕೂಟದಲ್ಲಿ ತಯಾರಾದ ಕಾರುಗಳ ಮೇಲಿನ ಆಮದು ಸುಂಕವನ್ನು ಸುಮಾರು ಶೇ. 40 ಕ್ಕೆ ಇಳಿಕೆ ಮಾಡುವ ಸಾಧ್ಯತೆಯಿದೆ. ಪ್ರಸ್ತುತ ವಿದೇಶಿ ಕಾರುಗಳ ಮೇಲೆ ಭಾರತದಲ್ಲಿ ವಿಪರೀತ ತೆರಿಗೆಯಿದ್ದು, ಈ ಕಡಿತದಿಂದಾಗಿ ಯುರೋಪಿನ ಪ್ರಖ್ಯಾತ ಕಾರು ಕಂಪನಿಗಳಾದ ಫೋಕ್ಸ್‌ವ್ಯಾಗನ್ (Volkswagen), ಬಿಎಂಡಬ್ಲ್ಯೂ (BMW), ಮರ್ಸಿಡಿಸ್-ಬೆಂಜ್, ಆಡಿ, ಪೋರ್ಷೆ, ಮಾಸೆರಾಟಿ, ಸ್ಕೋಡಾ ಮತ್ತು ವೋಲ್ವೋ ಕಂಪನಿಗಳಿಗೆ ಭಾರತದ ಮಾರುಕಟ್ಟೆಯಲ್ಲಿ ಬೆಲೆ ತಗ್ಗಿಸಲು ಮತ್ತು ವಹಿವಾಟು ಹೆಚ್ಚಿಸಲು ಸಹಾಯವಾಗಲಿದೆ.

ಯಾವೆಲ್ಲಾ ಕಾರುಗಳು ಅಗ್ಗವಾಗಲಿವೆ?

ಜರ್ಮನಿಯ ಪ್ರಮುಖ ಮೂರು ವಾಹನ ತಯಾರಕ ಕಂಪನಿಗಳ ಹೈ-ಪರ್ಫಾಮೆನ್ಸ್ ಮತ್ತು ಐಷಾರಾಮಿ ಮಾಡೆಲ್‌ಗಳ ಬೆಲೆಯಲ್ಲಿ ಗಮನಾರ್ಹ ಇಳಿಕೆ ಕಂಡುಬರುವ ಸಾಧ್ಯತೆಯಿದೆ.

ಮರ್ಸಿಡಿಸ್-ಬೆಂಜ್ (Mercedes-Benz): ಎಂಜಿ ಜಿ 63 (AMG G63), ಎಂಜಿಎಸ್ 63 ಈ ಪರ್ಫಾಮೆನ್ಸ್ ಮತ್ತು ಮೇಬ್ಯಾಕ್ ಎಸ್-ಕ್ಲಾಸ್ ನಂತಹ ದುಬಾರಿ ಕಾರುಗಳು ಕೈಗೆಟುಕುವ ದರದಲ್ಲಿ ಸಿಗುವ ನಿರೀಕ್ಷೆಯಿದೆ.
ಬಿಎಂಡಬ್ಲ್ಯೂ (BMW): ಎಂ ಸೀರೀಸ್ ಮಾಡೆಲ್‌ಗಳು, ಎಕ್ಸ್‌ಎಂ ಎಸ್‌ಯುವಿ (XM SUV) ಮತ್ತು ಝಡ್4 ರೋಡ್‌ಸ್ಟರ್ ಕಾರುಗಳ ಬೆಲೆ ಇಳಿಯಬಹುದು.
ಆಡಿ (Audi): ಕ್ಯೂ8 ಮತ್ತು ಆರ್‌ಎಸ್ ಕ್ಯೂ8 (Q8/RS Q8) ಮಾಡೆಲ್‌ಗಳು ಅಗ್ಗವಾಗಲಿವೆ.

ಇದಲ್ಲದೆ, ಯುರೋಪ್ ನಿಂದ ನೇರವಾಗಿ ಆಮದಾಗುವ ಪೋರ್ಷೆ (Porsche) ಕಂಪನಿಯ ಜನಪ್ರಿಯ ಮಾಡೆಲ್‌ಗಳಾದ 911, ಪನಾಮೆರಾ, ಮಕಾನ್ (ICE) ಕಾರುಗಳು ಕೂಡ ಈ ಒಪ್ಪಂದದ ಲಾಭ ಪಡೆಯಲಿವೆ.

ಇಟಾಲಿಯನ್ ಸೂಪರ್ ಕಾರುಗಳೂ ಅಗ್ಗ!

ಕೇವಲ ಜರ್ಮನ್ ಕಾರುಗಳಲ್ಲದೆ, ಇಟಲಿಯ ಸೂಪರ್ ಕಾರು ತಯಾರಕ ಕಂಪನಿಗಳ ವಾಹನಗಳ ಬೆಲೆಯಲ್ಲೂ ಇಳಿಕೆಯಾಗುವ ನಿರೀಕ್ಷೆಯಿದೆ. ಲ್ಯಾಂಬೋರ್ಗಿನಿ (Lamborghini) ತನ್ನ ಎಲ್ಲಾ ಕಾರುಗಳನ್ನು ಇಟಲಿಯಿಂದಲೇ ಆಮದು ಮಾಡಿಕೊಳ್ಳುತ್ತದೆ. ಹೀಗಾಗಿ, ಉರಸ್ (Urus), ರೆವುಯೆಲ್ಟೊ ಮತ್ತು ಹುರಾಕನ್ ನಂತಹ ಕಾರುಗಳ ಬೆಲೆ ತಗ್ಗಿ, ಭಾರತದ ಶ್ರೀಮಂತ ವರ್ಗಕ್ಕೆ ಇವುಗಳನ್ನು ಖರೀದಿಸುವುದು ಸುಲಭವಾಗಲಿದೆ. ಫೆರಾರಿ, ಮಾಸೆರಾಟಿ ಮತ್ತು ವೋಲ್ವೋ ಕಂಪನಿಗಳ ವಾಹನಗಳೂ ಸಹ ಬೆಲೆ ಇಳಿಕೆಯ ಪಟ್ಟಿಯಲ್ಲಿವೆ.

ಆದರೆ, ಟೆಸ್ಲಾ (Tesla) ಕಂಪನಿಯ ವಿಷಯದಲ್ಲಿ ಈ ಲಾಭ ಸಿಗಲು ಸ್ವಲ್ಪ ಸಮಯ ಹಿಡಿಯಬಹುದು. ಒಂದು ವೇಳೆ ಟೆಸ್ಲಾ ತನ್ನ ಉತ್ಪಾದನೆಯನ್ನು ಬರ್ಲಿನ್ ಕಾರ್ಖಾನೆಗೆ ಸ್ಥಳಾಂತರಿಸಿದರೆ ಮಾತ್ರ, ಐದು ವರ್ಷಗಳ ನಂತರ ಈ ಮುಕ್ತ ವ್ಯಾಪಾರ ಒಪ್ಪಂದದ (FTA) ಲಾಭ ಪಡೆಯಲು ಸಾಧ್ಯವಾಗುತ್ತದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಒಟ್ಟಾರೆಯಾಗಿ, ಈ ಒಪ್ಪಂದವು ಭಾರತದ ರಫ್ತು ವಲಯಕ್ಕೆ ಹೊಸ ಚೈತನ್ಯ ನೀಡುವ ಜೊತೆಗೆ, ವಾಹನ ಮಾರುಕಟ್ಟೆಯಲ್ಲಿ ಹೊಸ ಸಂಚಲನ ಮೂಡಿಸುವುದು ಖಚಿತವಾಗಿದೆ.