ಥಾಯ್ಲೆಂಡ್ನಲ್ಲಿ ಸಿಕ್ಕ ಚಿನ್ನದ ಖಜಾನೆ ಬಿಚ್ಚಿಟ್ಟಿತು ಭಾರತದ 2,000 ವರ್ಷದ ರಹಸ್ಯ!
ಭಾರತದ ಪ್ರಾಚೀನ ಇತಿಹಾಸ ಹಾಗೂ ವಿದೇಶಗಳೊಂದಿಗೆ ನಮಗಿದ್ದ ಸುದೀರ್ಘ ವ್ಯಾಪಾರ ಸಂಬಂಧಗಳಿಗೆ ಮತ್ತೊಂದು ಐತಿಹಾಸಿಕ ಸಾಕ್ಷ್ಯ ಲಭ್ಯವಾಗಿದೆ. ಥಾಯ್ಲೆಂಡ್ನ ಪಶ್ಚಿಮ ಭಾಗದಲ್ಲಿ ಪುರಾತತ್ವ ತಜ್ಞರು ಸುಮಾರು 2,000 ವರ್ಷಗಳಷ್ಟು ಹಳೆಯದಾದ ಎರಡು ಅಪರೂಪದ ಚಿನ್ನದ ಉಂಗುರಗಳನ್ನು ಉತ್ಖನನ ಮಾಡಿ ಪುರಾತತ್ವ ತಜ್ಞರು ಪತ್ತೆಹಚ್ಚಿದ್ದಾರೆ. ಅತ್ಯಂತ ಕುತೂಹಲಕಾರಿ ಸಂಗತಿಯೆಂದರೆ, ಈ ಉಂಗುರಗಳ ಪೈಕಿ ಒಂದರ ಮೇಲೆ ಭಾರತದ ಪ್ರಾಚೀನ 'ಬ್ರಾಹ್ಮಿ ಲಿಪಿ'ಯನ್ನು ಕೆತ್ತಲಾಗಿದೆ. ಇದು ಅಂದಿನ ಕಾಲದಲ್ಲೇ ಭಾರತ ಮತ್ತು ಆಗ್ನೇಯ ಏಷ್ಯಾ ದೇಶಗಳ ನಡುವೆ ಇದ್ದ ಸಾಂಸ್ಕೃತಿಕ ಹಾಗೂ ಆರ್ಥಿಕ ಒಡನಾಟವನ್ನು ಸಾಬೀತುಪಡಿಸಿದೆ.
ಇತಿಹಾಸದ ಆಳದಲ್ಲಿ ಹೂತುಹೋಗಿದ್ದ ರಹಸ್ಯವೊಂದು ಈಗ ಥಾಯ್ಲೆಂಡ್ನಲ್ಲಿ ಜಗತ್ತಿನ ಕಣ್ಣಿಗೆ ಬಿದ್ದಿದೆ. ಅಲ್ಲಿನ ಫೆಚ್ಬುರಿ ಪ್ರಾಂತ್ಯದ ಡಾನ್ ಯಾಯ್ ಥಾಂಗ್ ಪುರಾತತ್ವ ತಾಣದಲ್ಲಿ ಅಗೆಯುವಾಗ ಸಿಕ್ಕ ಮಾನವ ಅಸ್ಥಿಪಂಜರಗಳ ಜೊತೆಗೆ ಕೆಲವು ಅತ್ಯಮೂಲ್ಯ ಉಂಗುರಗಳು ಪತ್ತೆಯಾಗಿವೆ. ಥಾಯ್ಲೆಂಡ್ನ ಫೈನ್ ಆರ್ಟ್ಸ್ ಇಲಾಖೆ ಹೊರಹಾಕಿರುವ ಈ ಮಾಹಿತಿ, ಪುರಾತನ ಕಾಲದ ಜನರ ಜೀವನಶೈಲಿ ಮತ್ತು ಸಂಸ್ಕೃತಿಯ ಬಗ್ಗೆ ಭಾರಿ ಕುತೂಹಲ ಮೂಡಿಸಿದೆ.
ಇತಿಹಾಸದ ಪುಟಗಳಿಂದ: ಉಂಗುರದ ಮೇಲಿದ್ದ "ಪುಸರಖಿತಸ" ಪದದ ರಹಸ್ಯವೇನು?
ಇತಿಹಾಸದ ರಹಸ್ಯಗಳನ್ನು ಬಿಚ್ಚಿಡುವ ಮತ್ತೊಂದು ರೋಚಕ ಘಟನೆ ನಡೆದಿದೆ! ಪತ್ತೆಯಾದ ಪುರಾತನ ಉಂಗುರವೊಂದರಲ್ಲಿ ಬ್ರಾಹ್ಮಿ ಲಿಪಿಯ ಕೆತ್ತನೆ ಪತ್ತೆಯಾಗಿದೆ. ತಜ್ಞರು ಅದನ್ನು ಜಾಗರೂಕತೆಯಿಂದ ಪರಿಶೀಲಿಸಿದಾಗ, ಅದರಲ್ಲಿದ್ದ ಬರಹ "ಪುಸರಖಿತಸ" ಎಂದು ತಿಳಿದುಬಂದಿದೆ. ಇದರ ಸರಳ ಅರ್ಥ "ಪುಷ್ಯನಿಂದ ರಕ್ಷಿಸಲ್ಪಟ್ಟವನು" ಎಂದು ತಜ್ಞರು ತಿಳಿಸಿದ್ದಾರೆ. ಈ ಉಂಗುರ ಯಾರದ್ದಾಗಿರಬಹುದು ಎಂಬ ಕುತೂಹಲವನ್ನು ಇತಿಹಾಸ ಪ್ರೇಮಿಗಳಲ್ಲಿ ಕೆರಳಿಸಿದೆ.
ಭಾರತೀಯ ಸಂಸ್ಕೃತಿಯೊಂದಿಗೆ ಉಂಗುರದ ನಂಟು: ಸಂಶೋಧಕರ ವಿಶ್ಲೇಷಣೆ
ಭಾರತೀಯ ಜ್ಯೋತಿಷ್ಯ ಶಾಸ್ತ್ರದಲ್ಲಿ 'ಪುಷ್ಯ ನಕ್ಷತ್ರ'ಕ್ಕೆ ಅತ್ಯಂತ ಪವಿತ್ರ ಹಾಗೂ ಶುಭ ಸ್ಥಾನವಿದೆ. ಈ ಹಿನ್ನೆಲೆಯಲ್ಲಿ, ಪ್ರಸ್ತುತ ಪತ್ತೆಯಾಗಿರುವ ಉಂಗುರಕ್ಕೂ ಭಾರತೀಯ ಸಂಸ್ಕೃತಿಗೂ ಆಳವಾದ ನಂಟು ಇರಬಹುದು ಎಂದು ಸಂಶೋಧಕರು ಬಲವಾಗಿ ಅಭಿಪ್ರಾಯಪಟ್ಟಿದ್ದಾರೆ. ಉಂಗುರದ ವಿನ್ಯಾಸ ಅಥವಾ ಹಿನ್ನೆಲೆಯಲ್ಲಿ ಈ ಶುಭ ನಕ್ಷತ್ರದ ಪ್ರಭಾವ ಇರಬಹುದು ಎನ್ನುವುದು ಸಂಶೋಧಕರ ಅಂದಾಜಾಗಿದೆ.
ಪ್ರಾಚೀನ ಚಿನ್ನದ ಉಂಗುರಗಳ ಆವಿಷ್ಕಾರ: ಪ್ರಮುಖ ಅಂಶಗಳು
ಸರಳ ವಿನ್ಯಾಸ: ಪತ್ತೆಯಾಗಿರುವ ಮತ್ತೊಂದು ಉಂಗುರವು ಯಾವುದೇ ವಿಶೇಷ ಕೆತ್ತನೆಗಳಿಲ್ಲದ, ಸಂಪೂರ್ಣ ಸರಳವಾದ ಚಿನ್ನದ ವಿನ್ಯಾಸವನ್ನು ಹೊಂದಿದೆ.
ವ್ಯಾಪಾರಿಗಳ ಲಿಂಕ್: ಈ ಎರಡೂ ಉಂಗುರಗಳು ಪ್ರಾಚೀನ ಭಾರತದ ಪ್ರಸಿದ್ಧ ವೈಶ್ಯ ಸಮುದಾಯದ ವ್ಯಾಪಾರಿಯೊಬ್ಬರ ಒಡೆತನಕ್ಕೆ ಸೇರಿದ್ದಿರಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ.
ಜಾಗತಿಕ ವ್ಯಾಪಾರ ಸಂಬಂಧ: ಇದು ಕೇವಲ ಒಡವೆಯಷ್ಟೇ ಅಲ್ಲದೆ, ಪ್ರಾಚೀನ ಕಾಲದಲ್ಲಿ ಭಾರತ ಮತ್ತು ಆಗ್ನೇಯ ಏಷ್ಯಾದ ದೇಶಗಳ ನಡುವೆ ನಡೆದಿದ್ದ ವಾಣಿಜ್ಯ ವ್ಯವಹಾರಗಳಿಗೆ ಜೀವಂತ ಸಾಕ್ಷಿಯಾಗಿದೆ.
ಪತ್ತೆಯಾಯ್ತು 3,000 ವರ್ಷಗಳ ಹಿಂದಿನ 'ರಾಯಲ್' ಸಮಾಧಿ ತಾಣ!
ಫೆಬ್ರವರಿಯಿಂದ ಆರಂಭವಾದ ಈ ಮಹತ್ವದ ಉತ್ಖನನ ಕಾರ್ಯ ಈಗ ಇತಿಹಾಸದ ಹೊಸ ರಹಸ್ಯಗಳನ್ನು ಬಿಚ್ಚಿಡುತ್ತಿದೆ. ಇಲ್ಲಿ ಕೇವಲ ಎಂಟು ಮಾನವ ಅಸ್ಥಿಪಂಜರಗಳು ಮಾತ್ರವಲ್ಲದೆ, ಅವುಗಳ ಜೊತೆಗೆ ಹೂತಿಟ್ಟಿದ್ದ ಚಿನ್ನ, ಕಂಚಿನ ಆಭರಣಗಳು ಮತ್ತು ಮಣ್ಣಿನ ಪಾತ್ರೆಗಳು ಸಿಕ್ಕಿವೆ. ಸಮಾಧಿಯಲ್ಲಿ ಚಿನ್ನಾಭರಣಗಳನ್ನು ಇಟ್ಟಿರುವುದನ್ನು ನೋಡಿದರೆ, ಈ ಜಾಗ ಖಂಡಿತವಾಗಿಯೂ ಅಂದಿನ ಕಾಲದ ರಾಜಮನೆತನದವರು ಅಥವಾ ಶ್ರೀಮಂತ ವರ್ಗದವರ ಸಮಾಧಿ ಸ್ಥಳವಾಗಿ ಬಳಸಲಾಗುತ್ತಿತ್ತು ಎಂದು ಸಂಶೋಧಕರು ಅಂದಾಜಿಸಿದ್ದಾರೆ.
ಡಾನ್ ಯಾಯ್ ಥಾಂಗ್ ಪುರಾತತ್ವ ತಾಣದ ಐತಿಹಾಸಿಕ ಮಹತ್ವ
ಬ್ಯಾಂಕಾಕ್ನಿಂದ ಸುಮಾರು 130 ಕಿಲೋಮೀಟರ್ ದೂರದಲ್ಲಿರುವ 'ಡಾನ್ ಯಾಯ್ ಥಾಂಗ್' ಈ ವರ್ಷ ಪತ್ತೆಯಾದ ಅತ್ಯಂತ ಪ್ರಮುಖ ಪುರಾತತ್ವ ತಾಣವಾಗಿದೆ. ಸ್ಥಳೀಯ ನಿವಾಸಿಯೊಬ್ಬರ ಬತ್ತದ ಗದ್ದೆಯಲ್ಲಿ ಪುರಾತನ ಕಾಲದ ಕಂಚಿನ ಡ್ರಮ್ಗಳ ತುಂಡುಗಳು ಆಕಸ್ಮಿಕವಾಗಿ ಪತ್ತೆಯಾದ ನಂತರ ಈ ಪ್ರದೇಶದ ಪ್ರಾಮುಖ್ಯತೆ ಜಗತ್ತಿಗೆ ತಿಳಿಯಿತು. ಈ ಪತ್ತೆಯ ಬೆನ್ನಲ್ಲೇ ಪುರಾತತ್ವ ಇಲಾಖೆಯು ಇಲ್ಲಿ ವ್ಯಾಪಕ ಉತ್ಖನನ ಕಾರ್ಯವನ್ನು ಕೈಗೆತ್ತಿಕೊಂಡಿದ್ದು, ಇದು ಇತಿಹಾಸದ ಹಲವು ಅಪರೂಪದ ಪುಟಗಳನ್ನು ತೆರೆದಿಡುವ ನಿರೀಕ್ಷೆಯಿದೆ.
ಇತ್ತೀಚೆಗೆ ಪತ್ತೆಯಾಗಿರುವ ಐತಿಹಾಸಿಕ ತಾಣವು ಸುಮಾರು 1,500 ರಿಂದ 2,500 ವರ್ಷಗಳಷ್ಟು ಹಳೆಯದಾದ ಕಬ್ಬಿಣ ಯುಗಕ್ಕೆ ಸೇರಿದ್ದಾಗಿದೆ ಎಂದು ಪುರಾತತ್ವ ತಜ್ಞರು ತಿಳಿಸಿದ್ದಾರೆ. ಈ ಪ್ರದೇಶದಲ್ಲಿ ಈಗ ನಡೆಯುತ್ತಿರುವ ಉತ್ಖನನ ಕಾರ್ಯ ಮುಂದಿನ ಒಂದು ತಿಂಗಳಲ್ಲಿ ಸಂಪೂರ್ಣಗೊಳ್ಳಲಿದ್ದು, ಇಲ್ಲಿ ಸಿಕ್ಕಿರುವ ಅಪರೂಪದ ಪುರಾತನ ವಸ್ತುಗಳನ್ನು ಸಾರ್ವಜನಿಕರ ವೀಕ್ಷಣೆಗಾಗಿ ಪ್ರದರ್ಶನಕ್ಕೆ ಇಡಲು ಥಾಯ್ಲೆಂಡ್ ಸರ್ಕಾರ ಯೋಜಿಸಿದೆ.
ಭಾರತದಲ್ಲೂ ಮಹತ್ವದ ಸಂಶೋಧನೆ
ಜಾಗತಿಕ ಸಂಶೋಧನೆಗಳ ನಡುವೆ ಭಾರತದಲ್ಲೂ ಒಂದು ಪ್ರಮುಖ ಬೆಳವಣಿಗೆಯಾಗಿದೆ. ಹರಿಯಾಣದ ರಾಖಿಗಢಿ ತಾಣದಲ್ಲಿ ಸಿಕ್ಕ ಸಿಂಧೂ-ಸರಸ್ವತಿ ನಾಗರಿಕತೆಯ ಕಾಲದ ಮಾನವ ಅಸ್ಥಿಪಂಜರಗಳು ಈಗ ವಿಜ್ಞಾನಿಗಳ ಕೈಸೇರಿವೆ. ಇವುಗಳನ್ನು ಆಳವಾದ ವೈಜ್ಞಾನಿಕ ಸಂಶೋಧನೆಗೆ ಒಳಪಡಿಸಲು ಭಾರತೀಯ ಮಾನವಶಾಸ್ತ್ರೀಯ ಸಮೀಕ್ಷೆ (AnSI) ಸಂಸ್ಥೆಗೆ ಹಸ್ತಾಂತರಿಸಲಾಗಿದ್ದು, ನಮ್ಮ ಪೂರ್ವಜರ ರಹಸ್ಯಗಳನ್ನು ಭೇದಿಸಲು ಸಂಶೋಧಕರು ಸಜ್ಜಾಗಿದ್ದಾರೆ.
ಸಿಂಧೂ-ಸರಸ್ವತಿ ನಾಗರಿಕತೆಯ ಅತಿ ದೊಡ್ಡ ನಗರ ತಾಣ ಯಾವುದು ಗೊತ್ತೇ? ಅದುವೇ ಒಟ್ಟು 550 ಹೆಕ್ಟೇರ್ ವ್ಯಾಪ್ತಿ ಹೊಂದಿರುವ 'ರಾಖಿಗಢಿ'. ಇತ್ತೀಚಿನ ಉತ್ಖನನಗಳ ಪ್ರಕಾರ, ಈ ಪುರಾತನ ನಗರವು ಇಂದಿನ ಆಧುನಿಕ ನಗರಗಳಿಗಿಂತಲೂ ಅದ್ಭುತವಾದ ಪ್ಲಾನಿಂಗ್ ಹೊಂದಿತ್ತು! ಇಲ್ಲಿನ ಸುಧಾರಿತ ಒಳಚರಂಡಿ ವ್ಯವಸ್ಥೆ, ಕೈಗಾರಿಕಾ ಮಳಿಗೆಗಳು, ದೂರದ ದೇಶಗಳೊಂದಿಗಿನ ವ್ಯಾಪಾರ ಸಂಪರ್ಕಗಳು ಮತ್ತು ಸಮಾಧಿ ಸ್ಥಳಗಳ ಅಧ್ಯಯನವು, ನಮ್ಮ ಪೂರ್ವಜರು ತಂತ್ರಜ್ಞಾನ ಹಾಗೂ ಸಂಸ್ಕೃತಿಯಲ್ಲಿ ಎಷ್ಟು ಮುಂದುವರಿದಿದ್ದರು ಎಂಬುದನ್ನು ಜಗತ್ತಿಗೆ ಸಾರುತ್ತಿದೆ.
Click it and Unblock the Notifications
Sign in with Google