ಗ್ರಾಹಕರಿಗೆ ದುಬಾರಿಯಾದ ಝೊಮ್ಯಾಟೊ, ಸ್ವಿಗ್ಗಿ: ಆದಾಯಕ್ಕಾಗಿ ಮತ್ತೆ ಶುಲ್ಕ ಹೆಚ್ಚಳ

ಆಹಾರ ಡೆಲಿವರಿ ಸಂಸ್ಥೆ ಝೊಮ್ಯಾಟೊ ಮತ್ತು ಸ್ವಿಗ್ಗಿ ಕೆಲವೆಡೆ ಶುಲ್ಕ ಹೆಚ್ಚಳ ಮಾಡಿದೆ. ಪ್ರಸ್ತುತ ದೆಹಲಿ, ಮುಂಬೈ ಮತ್ತು ಬೆಂಗಳೂರು ನಗರಗಳಲ್ಲಿ ಶುಲ್ಕವನ್ನು ಪ್ರತಿ ಆರ್ಡರ್‌ಗೆ 5ರಿಂದ 6 ರೂಪಾಯಿಯಂತೆ ಹೆಚ್ಚಿಸಲಾಗಿದೆ.

ಏಪ್ರಿಲ್‌ನಲ್ಲಿ ಝೊಮ್ಯಾಟೊ ತನ್ನ ಪ್ಲಾಟ್‌ಫಾರ್ಮ್ ಶುಲ್ಕವನ್ನು 25 ಪ್ರತಿಶತದಷ್ಟು ಹೆಚ್ಚಿಸಿ ಪ್ರತಿ ಆರ್ಡರ್‌ಗೆ 5 ರೂಪಾಯಿ ಫಿಕ್ಸ್ ಮಾಡಿತ್ತು. ಅಲ್ಲದೇ ಇದೇ ಝೊಮ್ಯಾಟೊ ಕಳೆದ ವರ್ಷ ಆಗಸ್ಟ್‌ನಲ್ಲಿ 2 ರೂಪಾಯಿ ಶುಲ್ಕವನ್ನು ಹೆಚ್ಚಿಸಿತ್ತು. ಝೊಮ್ಯಾಟೋಗೆ ಪ್ರತಿಸ್ಪರ್ಧಿಯಾಗಿರುವ ಸ್ವಿಗ್ಗಿ ಸಹ ಹಲವು ನಗರಗಳಲ್ಲಿ ಶುಲ್ಕವನ್ನು ಹೆಚ್ಚಳ ಮಾಡಿತ್ತು.

ಆದರೀಗ ದೆಹಲಿ, ಮುಂಬೈ, ಬೆಂಗಳೂರು ನಗರಗಳಲ್ಲಿ ಪ್ರತಿ ಆರ್ಡರ್‌ಗೆ 5ರಿಂದ 6 ರೂಪಾಯಿಗಳ ಶುಲ್ಕವನ್ನು ಹೆಚ್ಚಿಸಿದೆ. ಶುಲ್ಕ ಏರಿಕೆಗೆ ಕಾರಣಗಳನ್ನು ಖಚಿತಪಡಿಸಿಕೊಳ್ಳಲು ಸಂಪರ್ಕಿಸಿದಾಗ, Zomato ಮತ್ತು Swiggy ಎರಡೂ ಸಂಸ್ಥೆಗಳು ಪ್ರತಿಕ್ರಿಯೆ ನೀಡಲು ನಿರಾಕರಿಸಿದವು.

ಎರಡು ಕಂಪನಿಗಳು ಕಳೆದ ವರ್ಷ ಪ್ಲಾಟ್‌ಫಾರ್ಮ್ ಶುಲ್ಕವನ್ನು ಹೆಚ್ಚಿಸಿದ್ದವು. ಆರಂಭದಲ್ಲಿ ಪ್ರತಿ ಆರ್ಡರ್‌ಗೆ 2 ರೂ ಇದ್ದ ಶುಲ್ಕವನ್ನು ಕ್ರಮೇಣ ಹೆಚ್ಚಿಸಲಾಗಿದೆ. ಪ್ಲಾಟ್‌ಫಾರ್ಮ್ ಶುಲ್ಕವನ್ನು ಆಹಾರ-ವಿತರಣಾ ಪ್ಲಾಟ್‌ಫಾರ್ಮ್‌ಗಳು ತಮ್ಮ ಲಾಭದಾಯಕತೆಯನ್ನು ಹೆಚ್ಚಿಸಲು ಪ್ರಯತ್ನಿಸುತ್ತಿರುವ ವಿಧಾನಗಳಲ್ಲಿ ಒಂದಾಗಿ ಪರಿಗಣಿಸಲಾಗುತ್ತದೆ.

ಪ್ರತಿ ಆರ್ಡರ್​ಗೆ 1 ರೂಪಾಯಿ ಹೆಚ್ಚಳವು ಗ್ರಾಹಕರಿಗೆ ಸಣ್ಣದಾಗಿ ತೋರಿದರೂ, ಸುಮಾರು 2.2 ರಿಂದ 2.5 ಮಿಲಿಯನ್ ದೈನಂದಿನ ಆರ್ಡರ್​ಗಳನ್ನು ನಿರ್ವಹಿಸುವ ಝೊಮ್ಯಾಟೊಗೆ, ಇದು ಹೆಚ್ಚುವರಿಯಾಗಿ ದೈನಂದಿನ 25 ಲಕ್ಷ ರೂ. ಆದಾಯ ತಂದು ಕೊಡಲಿದೆ. ಆಹಾರ ವಿತರಣಾ ಕಂಪನಿಗಳು ಈ ಪ್ಲಾಟ್​ಫಾರ್ಮ್ ಶುಲ್ಕ ಏರಿಕೆಯ ಮೂಲಕ ಪ್ರತಿದಿನ 1.25 ರಿಂದ 1.5 ಕೋಟಿ ರೂಪಾಯಿ ಲಾಭ ಗಳಿಸುವ ನಿರೀಕ್ಷೆ ಇಟ್ಟುಕೊಂಡಿವೆ.

2023ರಲ್ಲೂ ಎರಡೂ ಕಂಪನಿಗಳು ಶುಲ್ಕವನ್ನು ಹೆಚ್ಚಿಸಿದ್ದವು. ಸ್ವಿಗ್ಗಿ ಮೊದಲ ಬಾರಿಗೆ ಏಪ್ರಿಲ್ 2023ರಲ್ಲಿ 2 ರೂ.ಗಳ ಪ್ಲಾಟ್​ಫಾರ್ಮ್ ಶುಲ್ಕವನ್ನು ಪರಿಚಯಿಸಿತ್ತು. ಅದೇ ವರ್ಷದ ಆಗಸ್ಟ್​ನಲ್ಲಿ ಜೊಮಾಟೊ ಕೂಡ ಶುಲ್ಕ ವಿಧಿಸಲಾರಂಭಿಸಿತು. ಅಂದಿನಿಂದ ಎರಡೂ ಕಂಪನಿಗಳು ಈ ಶುಲ್ಕವನ್ನು ಹೆಚ್ಚಿಸುತ್ತಲೇ ಬಂದಿವೆ. ಶುಲ್ಕ ಹೆಚ್ಚಿಸಿದರೂ ಗ್ರಾಹಕರು ಆರ್ಡರ್​ ಮಾಡುವುದನ್ನು ಕಡಿಮೆ ಮಾಡಿಲ್ಲ ಎಂಬುದನ್ನು ಎರಡೂ ಕಂಪನಿಗಳು ಕಂಡುಕೊಂಡಿವೆ.

ಅತ್ಯಂತ ದಟ್ಟಣೆಯ ಸಮಯದಲ್ಲಿ, ಜೊಮಾಟೊ ತನ್ನ ಪ್ಲಾಟ್ ಫಾರ್ಮ್ ಶುಲ್ಕವನ್ನು ಪ್ರತಿ ಆರ್ಡರ್​ಗೆ 9 ರೂ.ಗೆ ಹೆಚ್ಚಿಸಿದರೆ, ಸ್ವಿಗ್ಗಿ ಬೆಂಗಳೂರು, ದೆಹಲಿ, ಹೈದರಾಬಾದ್ ಮತ್ತು ಇತರ ನಗರಗಳಲ್ಲಿನ ನಿರ್ದಿಷ್ಟ ಗ್ರಾಹಕರಿಗೆ 10 ರೂ. ಪ್ಲಾಟ್​ಫಾರ್ಮ್​ ವಿಧಿಸುತ್ತಿದೆ. ಪ್ಲಾಟ್​ಫಾರ್ಮ್ ಶುಲ್ಕಗಳನ್ನು ಹೆಚ್ಚಿಸುವುದಿಲ್ಲ ಎಂದು ಈ ಹಿಂದೆ ಸ್ವಿಗ್ಗಿ ಹೇಳಿತ್ತು. ಆದರೆ ಗ್ರಾಹಕರಿಂದ ತೀವ್ರ ಪ್ರತಿರೋಧ ಬರುವವರೆಗೂ ಎರಡೂ ಕಂಪನಿಗಳು ಪ್ಲಾಟ್​ಫಾರ್ಮ್​ ಫೀಯನ್ನು ಹೆಚ್ಚಿಸುತ್ತಲೇ ಹೋಗಲಿವೆ ಎಂದು ಮಾರುಕಟ್ಟೆ ತಜ್ಞರು ಹೇಳುತ್ತಾರೆ.

ಸ್ವಿಗ್ಗಿ ಮತ್ತು ಜೊಮಾಟೊ ತಮ್ಮ ಆಹಾರ ವಿತರಣಾ ಸೇವೆಗಳಿಗೆ ಪ್ರತ್ಯೇಕವಾಗಿ ಪ್ಲಾಟ್ ಫಾರ್ಮ್ ಶುಲ್ಕವನ್ನು ಜಾರಿಗೆ ತಂದಿದ್ದರೂ, ಈ ಶುಲ್ಕವನ್ನು ತಮ್ಮ ತ್ವರಿತ ವಾಣಿಜ್ಯ ಉದ್ಯಮಗಳಾದ ಇನ್​ಸ್ಟಾಮಾರ್ಟ್​ ಮತ್ತು ಬ್ಲಿಂಕಿಟ್​ಗೆ ವಿಸ್ತರಿಸಿಲ್ಲ.

English summary

Swiggy, Zomato increase platform fee to Rs 6 per order for revenue boost.