Rich: 6ನೇ ತರಗತಿ ಓದಿರುವ ಲೀಮಾ ರೋಸ್ 1,000 ಕೋಟಿ ರೂ. ಒಡತಿ, ತಮಿಳುನಾಡು ಚುನಾವಣೆಯಲ್ಲಿ ಅತ್ಯಂತ ಶ್ರೀಮಂತ ಅಭ್ಯರ್ಥಿ

Rich: ತಮಿಳುನಾಡಿನ ವಿಧಾನಸಭೆ ಚುನಾವಣೆಗೆ ಕೆಲವೇ ದಿನಗಳು ಬಾಕಿ ಉಳಿದಿವೆ. ಈ ಬಾರಿ ತಮಿಳುನಾಡಿನ ವಿಧಾನಸಭೆ ಚುನಾವಣೆಯಲ್ಲಿ ಅತ್ಯಂತ ಶ್ರೀಮಂತರು ಸ್ಪರ್ಧೆ ಮಾಡುತ್ತಿದ್ದಾರೆ. ಕೋಟ್ಯಾಧಿಪತಿಗಳು ಚುನಾವಣಾ ಕಣದಲ್ಲಿ ಇರುವುದು ಗಮನ ಸೆಳೆಯುತ್ತಿದೆ. ಅದರಲ್ಲಿ ಲೀಮಾ ರೋಸ್ ಅವರು ಸಹ ಒಬ್ಬರು ಲಾಟರಿ ಕಿಂಗ್ ಮಾರ್ಟಿನ್ ಅವರ ಪತ್ನಿ ಆಗಿರುವ ಇವರು, ತಮಿಳುನಾಡಿನ ಅತ್ಯಂತ ಶ್ರೀಮಂತ ಅಭ್ಯರ್ಥಿಯಾಗಿದ್ದಾರೆ. ಇವರ ಬಳಿ ಬರೋಬ್ಬರಿ 1,000 ಕೋಟಿ ರೂ.ಗಳಿಗೂ ಹೆಚ್ಚಿನ ಆಸ್ತಿ ಇದೆ.

ಲಾಟರಿ ಉದ್ಯಮಿ ಸ್ಯಾಂಟಿಯಾಗೊ ಮಾರ್ಟಿನ್ ಅವರ ಪತ್ನಿ ಮತ್ತು ತಿರುಚಿ ಜಿಲ್ಲೆಯ ಲಾಲ್ಗುಡಿ ಕ್ಷೇತ್ರದ ಎಐಎಡಿಎಂಕೆ ಅಭ್ಯರ್ಥಿ ಲೀಮಾ ರೋಸ್, ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ಅತ್ಯಂತ ಶ್ರೀಮಂತ ಅಭ್ಯರ್ಥಿಯಾಗಿ ಹೊರಹೊಮ್ಮಿದ್ದಾರೆ. ಅವರ ಚುನಾವಣಾ ಅಫಿಡವಿಟ್ ಪ್ರಕಾರ, ಅವರ ಕುಟುಂಬದ ಒಟ್ಟು ಆಸ್ತಿ ಮೊತ್ತವು ಬರೋಬ್ಬರಿ 5,000 ಕೋಟಿ ರೂ.ಗಳಿಗೂ ಮೀರಿದೆ ಎನ್ನುವುದು ವಿಶೇಷ. ನಾಮನಿರ್ದೇಶನ ಪತ್ರದೊಂದಿಗೆ ಸಲ್ಲಿಸಿದ ಅಫಿಡವಿಟ್ ಪ್ರಕಾರ, ಲೀಮಾ ರೋಸ್ ತಮ್ಮ ಹೆಸರಿನಲ್ಲಿ ಆಭರಣಗಳು ಸೇರಿದಂತೆ 139.62 ಕೋಟಿ ರೂ. ಮೌಲ್ಯದ ಚರಾಸ್ತಿ ಮತ್ತು ಭೂಮಿ ಮತ್ತು ಕಟ್ಟಡಗಳು ಸೇರಿದಂತೆ 909.94 ಕೋಟಿ ರೂ. ಮೌಲ್ಯದ ಸ್ಥಿರ ಆಸ್ತಿಯನ್ನು ಹೊಂದಿದ್ದಾರೆ.

ಸ್ಯಾಂಟಿಯಾಗೊ ಮಾರ್ಟಿನ್ ಬಳಿ ಎಷ್ಟಿದೆ ಆಸ್ತಿ

ಇನ್ನು ಲೀಮಾ ರೋಸ್ ಪತಿ ಹಾಗೂ ಲಾಟರಿ ಕಿಂಗ್ ಎಂದೇ ಖ್ಯಾತಿ ಗಳಿಸಿರುವ ಸ್ಯಾಂಟಿಯಾಗೊ ಮಾರ್ಟಿನ್ ಅವರ ಬಳಿ ಬರೋಬ್ಬರಿ 3,262.01 ಕೋಟಿ ರೂ.ಗಳ ಚರಾಸ್ತಿ ಮತ್ತು 887.36 ಕೋಟಿ ರೂ.ಗಳ ಸ್ಥಿರ ಆಸ್ತಿ ಇರುವುದಾಗಿ ಘೋಷಿಸಿಕೊಂಡಿದ್ದಾರೆ. ಇನ್ನು ದಂಪತಿಯ ಮಗ ಜೋಸ್ ಡೈಸನ್ ಮಾರ್ಟಿನ್ ಅವರ ಬಳಿ 225.56 ಕೋಟಿ ರೂ.ಗಳ ಚರಾಸ್ತಿ ಮತ್ತು 439.21 ಕೋಟಿ ರೂ.ಗಳ ಸ್ಥಿರ ಆಸ್ತಿ ಇದೆ.

6ನೇ ತರಗತಿಯವರೆಗೆ ಅಧ್ಯಯನ

2024-25ನೇ ಹಣಕಾಸು ವರ್ಷದಲ್ಲಿ ಲೀಮಾ ರೋಸ್ ಅವರ ಬಳಿ 9.82 ಕೋಟಿ ರೂ. ಆದಾಯ ಇರುವುದಾಗಿ ಘೋಷಿಸಿಕೊಂಡಿದ್ದರು. ಆದರೆ ಅವರ ಪತಿ ಮಾರ್ಟಿನ್ 11.39 ಕೋಟಿ ರೂ. ಆದಾಯ ಇರುವುದಾಗಿ ಹೇಳಿಕೊಂಡಿದ್ದಾರೆ. ಅವರ ಮಗ ಜೋಸ್ ಡೈಸನ್ ಮಾರ್ಟಿನ್ 19.56 ಕೋಟಿ ರೂ. ಕುಟುಂಬದ ಅತ್ಯಧಿಕ ಆದಾಯವನ್ನು ಹೊಂದಿರುವುದಾಗಿ ಹೇಳಿದ್ದಾರೆ. ಲೀಮಾ ರೋಸ್ ಅವರು 6ನೇ ತರಗತಿ ವರೆಗೆ ಓದಿರುವುದಾಗಿ ಹೇಳಿಕೊಂಡಿದ್ದಾರೆ.

ಅಮ್ಮ - ಮಗ ಎರಡು ಪಕ್ಷದಿಂದ ಸ್ಪರ್ಧೆ

ಇನ್ನು ಈ ಶ್ರೀಮಂತ ಕುಟುಂಬದ ಸದಸ್ಯರು ತಮಿಳುನಾಡಿನ ವಿಧಾನಸಭೆ ಚುನಾವಣೆಯಲ್ಲಿ ಎರಡು ಪ್ರತ್ಯೇಕ ಪಕ್ಷದಿಂದ ಸ್ಪರ್ಧೆ ಮಾಡುತ್ತಿದ್ದಾರೆ. ಲೀಮಾ ರೋಸ್ ಅವರ ಮಗ ಜೋಸ್ ಚಾರ್ಲ್ಸ್, ಪುದುಚೇರಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ರಾಜಕೀಯ ಪಕ್ಷವಾದ ಲಚ್ಚಿಯಾ ಜನನಾಯಕ ಕಚ್ಚಿ (LJK) ಯ ನಾಯಕರಾಗಿದ್ದಾರೆ. ಕಳೆದ ಕೆಲವು ತಿಂಗಳುಗಳಿಂದ, ಲೀಮಾ ರೋಸ್ ಅವರು ಆ ಪಕ್ಷವನ್ನು ತೊರೆದು AIADMK ಸೇರುವ ನಿರ್ಧಾರವನ್ನು ಘೋಷಿಸಿದ್ದಾರೆ. ಇದಕ್ಕೂ ಮೊದಲು ಅವರು LJK ಬಗ್ಗೆ ಅಸಮಾಧಾನ ವ್ಯಕ್ತಪಡಿಸುತ್ತಿದ್ದರು ಎಂದು ವರದಿಯಾಗಿದೆ. ಅವರನ್ನು ಫೆಬ್ರವರಿ 2026 ರಲ್ಲಿ ಪಕ್ಷದ ಮುಖ್ಯಸ್ಥ ಎಡಪ್ಪಾಡಿ ಪಳನಿಸ್ವಾಮಿ ಅವರು ಎಐಎಡಿಎಂಕೆ ಮಹಿಳಾ ವಿಭಾಗದ ಜಂಟಿ ಕಾರ್ಯದರ್ಶಿಯಾಗಿ ನೇಮಿಸಿದ್ದರು.

ವಿಜಯ್ ಪಕ್ಷದಲ್ಲಿ ಅಳಿಯ ಆದವ್ ಅರ್ಜುನ

ಇದಲ್ಲದೆ, ತಮಿಳಗ ವೆಟ್ರಿ ಕಳಗಂ (ಟಿವಿಕೆ) ಗಾಗಿ ಚುನಾವಣಾ ನಿರ್ವಹಣೆ ಮತ್ತು ಪ್ರಚಾರದ ಪ್ರಧಾನ ಕಾರ್ಯದರ್ಶಿ ಆದವ್ ಅರ್ಜುನ, ಲೀಮಾ ರೋಸ್ ಅವರ ಅಳಿಯ. ಒಂದೇ ಕುಟುಂಬದ ಸದಸ್ಯರು ವಿವಿಧ ರಾಜಕೀಯ ಪಕ್ಷಗಳ ಬ್ಯಾನರ್‌ಗಳ ಅಡಿಯಲ್ಲಿ ಈ ವಿಧಾನಸಭಾ ಚುನಾವಣೆಯಲ್ಲಿ ಸ್ಪರ್ಧಿಸುತ್ತಿದ್ದಾರೆ.

ತಮಿಳುನಾಡಿನಲ್ಲಿ ಅತ್ಯಂತ ಶ್ರೀಮಂತ ಅಭ್ಯರ್ಥಿ

ಇನ್ನು ತಮಿಳುನಾಡಿನ ವಿಧಾನಸಭೆ ಚುನಾವಣೆಯಲ್ಲಿ ಸ್ಪರ್ಧೆ ಮಾಡಿರುವ ಅತ್ಯಂತ ಶ್ರೀಮಂತ ಅಭ್ಯರ್ಥಿ ಎಂದು ಲೀಮಾ ರೋಸ್ ಗುರುತಿಸಿಕೊಂಡಿದ್ದಾರೆ. ಸಲ್ಲಿಸಿರುವ ಆಸ್ತಿ ವಿವರಗಳ ಆಧಾರದ ಮೇಲೆ, ಲೀಮಾ ರೋಸ್ ಮಾರ್ಟಿನ್ ತಮಿಳುನಾಡಿನಲ್ಲಿ ಅತ್ಯಂತ ಶ್ರೀಮಂತ ಅಭ್ಯರ್ಥಿಯಾಗಿ ಹೊರಹೊಮ್ಮಿದ್ದಾರೆ. ಅವರ ಕುಟುಂಬದ ಆಸ್ತಿ ವಿವರ ಅವರನ್ನು ಚುನಾವಣಾ ಕ್ಷೇತ್ರದಲ್ಲಿ ಎದ್ದು ಕಾಣುವಂತೆ ಮಾಡಿದೆ. 1967 ರಲ್ಲಿ ದೇವಕೊಟ್ಟೈನಲ್ಲಿ ಜನಿಸಿದ ಅವರು ಸ್ಯಾಂಟಿಯಾಗೊ ಮಾರ್ಟಿನ್ ಅವರನ್ನು ವಿವಾಹವಾದರು. ಅವರಿಗೆ ಜೋಸ್ ಚಾರ್ಲ್ಸ್ ಮಾರ್ಟಿನ್ ಮತ್ತು ಜೋಸ್ ಡೈಸನ್ ಮಾರ್ಟಿನ್ ಎಂಬ ಇಬ್ಬರು ಗಂಡು ಮಕ್ಕಳು ಮತ್ತು ಡೈಸಿ ಮಾರ್ಟಿನ್ ಎಂಬ ಮಗಳು ಇದ್ದಾರೆ.