Reliance: ಜಾಗತಿಕ ಸವಾಲುಗಳ ನಡುವೆಯೂ ರಿಲಯನ್ಸ್ ಲಾಭದಲ್ಲಿ ದಾಖಲೆಯ ಏರಿಕೆ; ಇಲ್ಲಿದೆ ಅಂಬಾನಿ ಕೊಟ್ಟ ಬಿಗ್ ಅಪ್ಡೇಟ್

Reliance annual profit: ಜಾಗತಿಕ ಸಂಘರ್ಷ ಮತ್ತು ಆರ್ಥಿಕ ಅನಿಶ್ಚಿತತೆಯ ಸವಾಲುಗಳ ನಡುವೆಯೂ ರಿಲಯನ್ಸ್ ಇಂಡಸ್ಟ್ರೀಸ್ 2026ರ ಹಣಕಾಸು ವರ್ಷದಲ್ಲಿ ಐತಿಹಾಸಿಕ ಸಾಧನೆ ಮಾಡಿದೆ. ಬೃಹತ್ ಆದಾಯದೊಂದಿಗೆ, ಸಾರ್ವಕಾಲಿಕ ದಾಖಲೆಯ ಲಾಭವನ್ನು ಗಳಿಸುವ ಮೂಲಕ ಮುಕೇಶ್ ಅಂಬಾನಿ ನೇತೃತ್ವದ ಸಮೂಹವು ಭಾರತದ ಆರ್ಥಿಕತೆಯ ದೊಡ್ಡ ಶಕ್ತಿಯಾಗಿ ಹೊರಹೊಮ್ಮಿದೆ. ಇಲ್ಲಿದೆ ನೋಡಿ ಸಂಪೂರ್ಣ ಮಾಹಿತಿ.

2026ರ ಮಾರ್ಚ್ 31ಕ್ಕೆ ಕೊನೆಯಾದ ಆರ್ಥಿಕ ವರ್ಷದ ಹಣಕಾಸು ಫಲಿತಾಂಶವನ್ನು ರಿಲಯನ್ಸ್ ಇಂಡಸ್ಟ್ರೀಸ್‌ನಿಂದ ಪ್ರಕಟಿಸಲಾಗಿದೆ. ಇದರೊಂದಿಗೆ ದಾಖಲೆಯ ವಾರ್ಷಿಕ ಏಕೀಕೃತ ಲಾಭ 95,754 ಕೋಟಿ ರೂಪಾಯಿ ವರದಿ ಆಗಿದೆ. ಆದಾಯದ ವಿಚಾರಕ್ಕೆ ಬಂದರೆ 11.76 ಲಕ್ಷ ಕೋಟಿ ರೂಪಾಯಿ ಬಂದಿದೆ.

ಗ್ರಾಹಕ ವ್ಯವಹಾರದಿಂದ ಹಿಡಿದು ತೈಲದಿಂದ ರಾಸಾಯನಿಕ ವ್ಯವಹಾರದ ತನಕದ ವ್ಯವಹಾರದಲ್ಲಿನ ಉತ್ತಮ ಬೆಳವಣಿಗೆಯು ಇಡೀ ವರ್ಷದ ಕಂಪನಿಯ ವ್ಯವಹಾರ ಫಲಿತಾಂಶವನ್ನು ಮೇಲಕ್ಕೆ ಎತ್ತಿದೆ. ಪಶ್ಚಿಮ ಏಷ್ಯಾದಲ್ಲಿನ ಯುದ್ಧ ಸನ್ನಿವೇಶದ ಕಾರಣಕ್ಕೆ ಮಾರ್ಚ್ ತ್ರೈಮಾಸಿಕದ ದುರ್ಬಲತೆಯ ಹೊರತಾಗಿಯೂ ಬಲವಾದ ವಾರ್ಷಿಕ ಫಲಿತಾಂಶ ಬಂದಿದೆ. ಇಲ್ಲಿ ನೆನಪಿಸಿಕೊಳ್ಳಬೇಕಾದ ಸಂಗತಿ ಏನೆಂದರೆ, ಇಂಧನ ವ್ಯವಹಾರದಲ್ಲಿನ ಒತ್ತಡದ ಕಾರಣಕ್ಕೆ ಲಾಭದಲ್ಲಿ ಇಳಿಕೆ ಆಗಿತ್ತು.

ಕಂಪನಿಯಿಂದ ಹತ್ತು ರೂಪಾಯಿ ಮುಖಬೆಲೆಯ ಪ್ರತಿ ಷೇರಿಗೆ 6 ರೂಪಾಯಿ ಲಾಭಾಂಶ ಘೋಷಣೆ ಮಾಡಲಾಗಿದೆ. ಇಡೀ ವರ್ಷದಲ್ಲಿ ಕಂಪನಿಯಯ ಅತಿ ಹೆಚ್ಚಿನ ಆದಾಯವಾದ 11,75,919 ಕೋಟಿ ರೂಪಾಯಿಯನ್ನು ದಾಖಲಿಸಲಾಗಿದೆ. ವರ್ಷದಿಂದ ವರ್ಷಕ್ಕೆ ಶೇಕಡಾ 9.8ರಷ್ಟು ಹೆಚ್ಚಳ ದಾಖಲಾಗಿದೆ. ಜಿಯೋ ಪ್ಲಾಟ್ ಫಾರ್ಮ್ಸ್ ಆದಾಯವು ಶೇಕಡಾ 14.7ರಷ್ಟು ಏರಿಕೆ ಕಂಡಿದ್ದರೆ, ರಿಲಯನ್ಸ್ ರೀಟೇಲ್ ವೆಂಚರ್ಸ್ ಲಿಮಿಟೆಡ್ ಆದಾಯ ಶೇಕಡ 11.8ರಷ್ಟು ಮೇಲೇರಿದ್ದರೆ, ತೈಲದಿಂದ ರಾಸಾಯನಿಕದ ಆದಾಯ ಶೇಕಡಾ 5.7ರಷ್ಟು ಹೆಚ್ಚಳವಾಗಿದೆ.

ಏಕೀಕೃತವಾಗಿ ಸಗಟು ಆದಾಯ 3,25,290 ಕೋಟಿ ರೂಪಾಯಿ ಬಂದಿದೆ. ವರ್ಷದಿಂದ ವರ್ಷಕ್ಕೆ ಇದು ಶೇಕಡಾ 12.9ರಷ್ಟು ಮೇಲೇರಿದೆ. ತೈಲದಿಂದ ರಾಸಾಯನಿಕ (O2C), ಡಿಜಿಟಲ್ ಸೇವೆಗಳು ಹಾಗೂ ರೀಟೇಲ್ ಸೆಗ್ಮೆಂಟ್‌ನಲ್ಲಿ ಎರಡಂಕಿಯ ಬೆಳವಣಿಗೆಯ ದರ ದಾಖಲಾಗಿದೆ. ಕೆಜಿ D6 ಉತ್ಪಾದನೆಯಲ್ಲಿನ ಸಹ ಇಳಿಕೆ ಕಾರಣದಿಂದ ತೈಲ ಹಾಗೂ ಅನಿಲ ಆದಾಯವು ಇಳಿಕೆ ಆಗಿದೆ.

ಜಿಯೋ ಪ್ಲಾಟ್ ಫಾರ್ಮ್ಸ್ ಹೆಚ್ಚಿನ ಎಆರ್ ಪಿಯು ದಾಖಲಿದಿದ್ದು, 214 ರೂಪಾಯಿಗೆ ಮುಟ್ಟಿದೆ. ಇದಕ್ಕೆ ಕಾರಣ ಹೆಚ್ಚಿನ ಗ್ರಾಹಕರ ತೊಡಗಿಕೊಳ್ಳುವಿಕೆ ಹಾಗೂ ಚಂದಾದಾರರ ಉತ್ತಮ ಮಿಶ್ರಣ. ಮಾರ್ಚ್ 31, 2026ಕ್ಕೆ ಕೊನೆಯಾದಂತೆ ಬಂಡವಾಳ ವೆಚ್ಚವು 1,44,271 ಕೋಟಿ ರೂಪಾಯಿ. ತೈಲದಿಂದ ರಾದಸಾಯನಿಕ ಪ್ರಾಜೆಕ್ಟ್‌ಗಳ ಬೆಳವಣಿಗೆ ಅನುಷ್ಠಾನ, ಹೊಸ ಇಂಧನ ವ್ಯವಹಾರ, ಜಿಯೋ ಹಾಗೂ ರೀಟೇಲ್ ಜಾಲ ಮತ್ತು ಮೂಲಸೌಕರ್ಯ ವಿಸ್ತರಣೆ ಬಲಪಡಿಸುವುದು ಇವುಗಳಲ್ಲಿ ಒಂದೊಳ್ಳೆ ಪ್ರಗತಿ ಸಾಧಿಸಿದೆ.

ಮುಕೇಶ್ ಅಂಬಾನಿ ಹೇಳಿದ್ದೇನು?

ನಾಲ್ಕನೇ ತ್ರೈಮಾಸಿಕವಾದ 2026ರ ಜನವರಿಯಿಂದ ಮಾರ್ಚ್ ತನಕದ ಅವಧಿಯಲ್ಲಿ ರಿಲಯನ್ಸ್ ನಿವ್ವಳ ಲಾಭ 20,589 ಕೋಟಿ ರೂಪಾಯಿ ಬಂದಿದೆ. "2025-26ನೇ ಹಣಕಾಸು ವರ್ಷದಲ್ಲಿ, ಅಂತಾರಾಷ್ಟ್ರೀಯ ಮಟ್ಟದಲ್ಲಿನ ಉದ್ವಿಗ್ನತೆ, ಇಂಧನ ಬೆಲೆಗಳಲ್ಲಿನ ಏರಿಳಿತ ಮತ್ತು ಬದಲಾಗುತ್ತಿರುವ ಜಾಗತಿಕ ವ್ಯಾಪಾರ ಮಾದರಿಗಳು ಸೇರಿದಂತೆ ಹಲವಾರು ಜಾಗತಿಕ ಸವಾಲುಗಳನ್ನು ನಾವು ಎದುರಿಸಿದ್ದೇವೆ. ಇವು ವಿಶ್ವಾದ್ಯಂತ ವ್ಯವಹಾರಗಳ ಮೇಲೆ ಪರಿಣಾಮ ಬೀರಿದವು. ಇದರ ಹೊರತಾಗಿಯೂ, ಭಾರತ ತನ್ನ ಆರ್ಥಿಕ ಆವೇಗವನ್ನು ಕಾಯ್ದುಕೊಂಡಿತು ಮತ್ತು ಈ ಅವಧಿಯಲ್ಲಿ ರಿಲಯನ್ಸ್ ಬಲವಾಗಿ ಬೆಳೆಯುತ್ತಲಿತ್ತು. ನಮ್ಮ ವೈವಿಧ್ಯಮಯ ವ್ಯವಹಾರ ಪೋರ್ಟ್‌ಫೋಲಿಯೊ ಮತ್ತು ಬಲವಾದ ದೇಶೀಯ ಗಮನವು ಈ ಅನಿಶ್ಚಿತ ವಾತಾವರಣದಲ್ಲಿ ಸಮತೋಲನವನ್ನು ಕಾಯ್ದುಕೊಳ್ಳಲು ನಮಗೆ ಸಹಾಯ ಮಾಡಿತು," ಎಂದು ಮುಕೇಶ್ ಅಂಬಾನಿ ಅವರು ಹೇಳಿದ್ದಾರೆ.

"ಜಿಯೋ ಭಾರತದ ಡಿಜಿಟಲ್ ಸ್ವರೂಪವನ್ನು ನಿರಂತರವಾಗಿ ಪರಿವರ್ತಿಸುತ್ತಿದೆ. ನಾವು ಜಿಯೋ ಪ್ಲಾಟ್‌ಫಾರ್ಮ್ಸ್ ಲಿಸ್ಟಿಂಗ್‌ನತ್ತ ಮುಂದುವರಿಯುತ್ತಿರುವುದಕ್ಕೆ ನನಗೆ ಸಂತೋಷವಾಗಿದೆ. ಇದು ಒಂದು ಮೈಲುಗಲ್ಲಾಗಲಿದೆ ಮತ್ತು ಭಾರತದ ಡಿಜಿಟಲ್ ಭವಿಷ್ಯದಲ್ಲಿ ತನ್ನ ಪಾತ್ರವನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತದೆ. ಮೊಬೈಲ್ ಸೇವೆಗಳು, ಹೋಮ್ ಬ್ರಾಡ್‌ಬ್ಯಾಂಡ್ ಮತ್ತು ಎಂಟರ್‌ಪ್ರೈಸ್ ಸೇವೆಗಳಿಗೆ ಸ್ಥಿರವಾಗಿ ಹೆಚ್ಚುತ್ತಿರುವ ಬೇಡಿಕೆಯಿಂದ ಪೂರ್ಣ ವರ್ಷಕ್ಕೆ ಶೇ 19ರಷ್ಟು ಬಲವಾದ EBITDA ಬೆಳವಣಿಗೆ ಮುನ್ನಡೆದಿದೆ. ಎಐ ಪರಿಕರಗಳು ಮತ್ತು ಮುಂದಿನ ಪೀಳಿಗೆಯ ತಂತ್ರಜ್ಞಾನಗಳನ್ನು ಹೆಚ್ಚಿನ ಜನರಿಗೆ ದೊರೆಯುವಂತೆ ಮಾಡಲು ನಾವು ಕೆಲಸ ಮಾಡುತ್ತಿದ್ದೇವೆ ಮತ್ತು ಭವಿಷ್ಯದಲ್ಲಿ ಭಾರತ ಹೇಗೆ ಸಂವಹನ ನಡೆಸುತ್ತದೆ ಮತ್ತು ಲೆಕ್ಕಾಚಾರ ಮಾಡುತ್ತದೆ ಎಂಬುದನ್ನು ಮರುರೂಪಿಸಲು ಜಿಯೋ ಉತ್ತಮ ಸ್ಥಾನದಲ್ಲಿದೆ. ಮತ್ತು ವಿಷಯವನ್ನು ಬಳಸಿಕೊಳ್ಳುತ್ತದೆ," ಎಂದರು.

"ರಿಲಯನ್ಸ್ ರೀಟೇಲ್ ಸಹ ವರ್ಷವಿಡೀ ಸ್ಥಿರ ಮತ್ತು ಬಲವಾದ ಕಾರ್ಯಕ್ಷಮತೆಯನ್ನು ನೀಡಿತು. ಅದರ ಓಮ್ನಿ-ಚಾನೆಲ್ ನೆಟ್‌ವರ್ಕ್ ಮತ್ತು ಭಾರತೀಯ ಗ್ರಾಹಕರ ಆಳವಾದ ತಿಳಿವಳಿಕೆಯು ಭವಿಷ್ಯದಲ್ಲಿ ನಿರಂತರ ಬೆಳವಣಿಗೆಗೆ ಕಾರಣವಾಗುತ್ತದೆ ಎಂದು ನನಗೆ ವಿಶ್ವಾಸವಿದೆ. ಈಗ ವಿಭಿನ್ನ ಮತ್ತು ಕೇಂದ್ರೀಕೃತ ರಚನೆಯಡಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಗ್ರಾಹಕ ಉತ್ಪನ್ನಗಳ ವ್ಯವಹಾರವು ವೇಗವಾಗಿ ಬೆಳೆಯುತ್ತಿದೆ ಮತ್ತು ಎಫ್ಎಂಸಿಜಿ ಬ್ರ್ಯಾಂಡ್‌ಗಳ ವ್ಯಾಪ್ತಿಯೂ ವಿಸ್ತರಿಸುತ್ತಿದೆ. ಭಾರತದಲ್ಲಿ ಬಳಕೆಯ ಕಥೆ ಹಲವು ವರ್ಷಗಳ ಕಾಲ ಮುಂದುವರಿಯಲಿದೆ ಮತ್ತು ನಮ್ಮ ವ್ಯವಹಾರಗಳು ಅದರ ಕೇಂದ್ರಬಿಂದುವಾಗಿವೆ," ಎಂದು ಹೇಳಿದ್ದಾರೆ.

"ಒ2ಸಿ ವ್ಯವಹಾರವು ವರ್ಷವಿಡೀ ಸಂಕೀರ್ಣ ಜಾಗತಿಕ ಪರಿಸರದಲ್ಲಿ ಕಾರ್ಯನಿರ್ವಹಿಸುತ್ತಿತ್ತು. ಪಶ್ಚಿಮ ಏಷ್ಯಾದಲ್ಲಿನ ಯುದ್ಧವು ಜಾಗತಿಕ ಪೂರೈಕೆ ಸರಪಳಿಗಳ ಮೇಲೆ ಗಮನಾರ್ಹವಾಗಿ ಪರಿಣಾಮ ಬೀರಿತು. ಈ ಸಮಯದಲ್ಲಿಯೂ ಸಹ ದೇಶಕ್ಕೆ ಅಗತ್ಯ ಇಂಧನ ಮತ್ತು ಸಂಪನ್ಮೂಲಗಳನ್ನು ಒದಗಿಸುವ ತನ್ನ ಬದ್ಧತೆಯನ್ನು ರಿಲಯನ್ಸ್ ಪೂರೈಸಿತು. ನಮ್ಮ ಒ2ಸಿ ತಂಡವು ಎಲ್ ಪಿಜಿ ಉತ್ಪಾದನೆಯನ್ನು ಹೆಚ್ಚಿಸಲು ಸಂಪನ್ಮೂಲಗಳನ್ನು ಪರಿಣಾಮಕಾರಿಯಾಗಿ ನಿಯೋಜಿಸಿತು, ಆದರೆ ಜಿಯೋ-ಬಿಪಿ ದೇಶಾದ್ಯಂತ ಇಂಧನ ಪೂರೈಕೆಗಳನ್ನು ನಿರ್ವಹಿಸಿತು. KG-D6 ಜಲಾನಯನ ಪ್ರದೇಶದಿಂದ ಅನಿಲವನ್ನು ರಾಷ್ಟ್ರೀಯ ಆದ್ಯತೆಗಳಿಗೆ ಅನುಗುಣವಾಗಿ ಅಗತ್ಯ ವಲಯಗಳಿಗೆ ತಿರುಗಿಸಲಾಯಿತು. ನಮ್ಮ ತಂಡಗಳ ಬದ್ಧತೆ ಮತ್ತು ಸವಾಲುಗಳನ್ನು ಎದುರಿಸುವ ಅವರ ಸಾಮರ್ಥ್ಯದ ಬಗ್ಗೆ ನನಗೆ ಹೆಮ್ಮೆ ಇದೆ," ಎಂದು ತಿಳಿಸಿದ್ದಾರೆ.

"ಇತ್ತೀಚಿನ ಬೆಳವಣಿಗೆಗಳು ಇಂಧನ ಭದ್ರತೆಯ ಮಹತ್ವವನ್ನು ಮತ್ತಷ್ಟು ಎತ್ತಿ ತೋರಿಸಿವೆ. ರಿಲಯನ್ಸ್ ತನ್ನ ಹೊಸ ಇಂಧನ ಗಿಗಾ-ಕಾರ್ಖಾನೆಗಳನ್ನು ವೇಗವಾಗಿ ನಿರ್ಮಿಸುತ್ತಿದೆ ಎಂದು ನನಗೆ ಸಂತೋಷವಾಗಿದೆ. ಈ ವ್ಯವಹಾರವು ಭವಿಷ್ಯದಲ್ಲಿ ರಿಲಯನ್ಸ್‌ಗೆ ಪ್ರಮುಖ ಬೆಳವಣಿಗೆಯ ಎಂಜಿನ್ ಆಗಿರುತ್ತದೆ ಮತ್ತು ಭಾರತದ ಇಂಧನ ಅಗತ್ಯಗಳಿಗೆ ಗಮನಾರ್ಹವಾಗಿ ಕೊಡುಗೆ ನೀಡುತ್ತದೆ," ಎಂದು ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಮುಕೇಶ್ ಅಂಬಾನಿ ಅವರು ಹೇಳಿದ್ದಾರೆ.

ಆಕಾಶ್ ಅಂಬಾನಿ ಹೇಳಿದ್ದೇನು?

"ಭಾರತವನ್ನು ಇಂಟರ್ ನೆಟ್ ಯುಗಕ್ಕೆ ಸಂಪರ್ಕಿಸುವಲ್ಲಿ ಜಿಯೋ ಪ್ರಮುಖ ಪಾತ್ರವಹಿಸಿದೆ. ಇಂದು 52.4 ಕೋಟಿಗಿಂತಲೂ ಹೆಚ್ಚು ಚಂದಾದಾರರನ್ನು ಹೊಂದಿರುವ ಇದು ಇಂಟೆಲಿಜೆನ್ಸ್ ಯುಗಕ್ಕೆ ಡಿಜಿಟಲ್ ಗೇಟ್‌ವೇ ಆಗಲು ಸಜ್ಜಾಗಿದೆ. ಜಿಯೋದ ಮುಂದುವರಿದ ಸಂಪರ್ಕ ಮತ್ತು ಎಡ್ಜ್ ಕಂಪ್ಯೂಟ್ ಮೂಲಸೌಕರ್ಯವು ದೇಶಾದ್ಯಂತ ಎಐ ಸೇವೆಗಳು ಗ್ರಾಹಕರು, ಮನೆಗಳು ಮತ್ತು ವ್ಯವಹಾರಗಳನ್ನು ತಲುಪುವ ಪ್ರಮುಖ ಮಾಧ್ಯಮವಾಗಿದೆ. ಈ ಸಾಮರ್ಥ್ಯಗಳು ಜಿಯೋ ತನ್ನ ಉದ್ಯಮ-ಪ್ರಮುಖ ಬೆಳವಣಿಗೆಯನ್ನು ಮುಂಬರುವ ವರ್ಷಗಳಲ್ಲಿ ಉಳಿಸಿಕೊಳ್ಳಲು ಅನುವು ಮಾಡಿಕೊಡುತ್ತದೆ," ಎಂದು ರಿಲಯನ್ಸ್ ಜಿಯೋ ಇನ್ಫೋಕಾಮ್ ಅಧ್ಯಕ್ಷರಾದ ಆಕಾಶ್ ಅಂಬಾನಿ ಅವರು ಹೇಳಿದ್ದಾರೆ.

ಇಶಾ ಅಂಬಾನಿ ಹೇಳಿದ್ದೇನು?

"2026ನೇ ಹಣಕಾಸು ವರ್ಷವು ರಿಲಯನ್ಸ್ ರೀಟೇಲ್‌ಗೆ ಭಾರಿ ಬೆಳವಣಿಗೆಯ ವರ್ಷವಾಗಿತ್ತು. ನಮ್ಮ ಆದಾಯ 3.70 ಲಕ್ಷ ಕೋಟಿ ಮೀರಿದೆ, EBITDA 27,000 ಕೋಟಿ ಮೀರಿದೆ, ಮತ್ತು ನಾವು 193 ಕೋಟಿ ವಹಿವಾಟುಗಳ ಮೂಲಕ 38.7 ಕೋಟಿ ನೋಂದಾಯಿತ ಗ್ರಾಹಕರಿಗೆ ಸೇವೆ ಸಲ್ಲಿಸಿದ್ದೇವೆ. ಇದು ಭಾರತದ ಅತಿದೊಡ್ಡ ರೀಟೇಲ್ ಜಾಲದ ಬಲವನ್ನು ಪ್ರದರ್ಶಿಸುತ್ತದೆ," ಎಂದು ಹೇಳಿದ್ದಾರೆ.

"ಈ ವರ್ಷದ ದೊಡ್ಡ ಬದಲಾವಣೆಯು ರಚನಾತ್ಮಕವಾಗಿತ್ತು. ಹೈಪರ್-ಲೋಕಲ್ ಕಾಮರ್ಸ್ ಆರ್ಡರ್‌ಗಳು ವರ್ಷದಿಂದ ವರ್ಷಕ್ಕೆ ನಾಲ್ಕು ಪಟ್ಟು ಹೆಚ್ಚು ಬೆಳೆದವು. ನಾವು ದಿನಸಿ, ಎಲೆಕ್ಟ್ರಾನಿಕ್ಸ್ ಮತ್ತು ಫ್ಯಾಷನ್‌ನಾದ್ಯಂತ ಭಾರತದ ಅತಿದೊಡ್ಡ ಹೈಪರ್-ಲೋಕಲ್ ವಿತರಣಾ ಜಾಲವನ್ನು ನಿರ್ವಹಿಸುತ್ತೇವೆ, 1,200+ ನಗರಗಳು ಮತ್ತು 5,100+ ಪಿನ್ ಕೋಡ್‌ಗಳಲ್ಲಿ ಹರಡಿರುವ 3,100+ ಅಂಗಡಿಗಳಿಂದ ಕಾರ್ಯ ನಿರ್ವಹಿಸುತ್ತೇವೆ. ಇದು ರಿಲಯನ್ಸ್‌ನ ಪ್ರಮಾಣದಲ್ಲಿ ನಿರ್ಮಿಸಲಾದ ವಿಶಿಷ್ಟವಾದ ಭಾರತೀಯ ಮಾದರಿಯಾಗಿದೆ," ಎಂದು ಹೇಳಿದ್ದಾರೆ.

"2027ನೇ ಹಣಕಾಸು ವರ್ಷದಲ್ಲಿ ನಮ್ಮ ಗಮನವು ಈ ದೊಡ್ಡ ನೆಟ್‌ವರ್ಕ್ ಮೂಲಕ ಗ್ರಾಹಕ ಸೇವೆಯನ್ನು ಗರಿಷ್ಠಗೊಳಿಸುವುದು. ಲಾಭದಾಯಕತೆಯನ್ನು ತಲುಪಿಸುವತ್ತ ಗಮನ ಹರಿಸಲಾಗುವುದು. ಎಐ ಆಧಾರಿತ ವ್ಯಾಪಾರೀಕರಣ, ಸುಧಾರಿತ ಬೆಲೆ ನಿಗದಿ ಮತ್ತು ಬಲವಾದ ಕಾರ್ಯಗತಗೊಳಿಸುವಿಕೆ ಮೂಲಕ ನಾವು ಇದನ್ನು ಸಾಧಿಸುತ್ತೇವೆ. ನಮ್ಮ ಬ್ಯಾಲೆನ್ಸ್ ಶೀಟ್ ಪ್ರಬಲವಾಗಿದೆ. ವಿವಿಧ ಕ್ಷೇತ್ರಗಳಲ್ಲಿ ನಮ್ಮ ನಾಯಕತ್ವ ವಿಭಾಗಗಳು ಸ್ಥಿರವಾಗಿ ವಿಸ್ತರಿಸುತ್ತಿವೆ. ಮುಂದಿನ ದಶಕದಲ್ಲಿ ಸುಸ್ಥಿರ ಮತ್ತು ಲಾಭದಾಯಕ ಬೆಳವಣಿಗೆಗಾಗಿ ನಾವು ರಿಲಯನ್ಸ್ ರೀಟೇಲ್ ಅನ್ನು ಇರಿಸುತ್ತಿದ್ದೇವೆ," ಎಂದು ರಿಲಯನ್ಸ್ ರೀಟೇಲ್ ವೆಂಚರ್ಸ್ ಲಿಮಿಟೆಡ್‌ನ ಕಾರ್ಯನಿರ್ವಾಹಕ ನಿರ್ದೇಶಕಿ ಇಶಾ ಅಂಬಾನಿ ಹೇಳಿದ್ದಾರೆ.

English summary

Reliance Industries posts record ₹95,754 crore profit for FY2025-26 with revenue reaching ₹11.76 lakh crore. Strong growth in Jio, retail, and O2C segments drives performance.