ಬರಲಿದೆ ಮನಮೋಹನ್ ಸಿಂಗ್, ಸೋನಿಯಾ, ರಾಹುಲ್ ಕುರಿತ ಸಿನಿಮಾ!

ನವದೆಹಲಿ, ಅಕ್ಟೋಬರ್ 14: ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್ ಅವರು ಪ್ರಧಾನಿಯಾಗಿ ಆಳಿದ 10 ವರ್ಷಗಳ ಅಧಿಕಾರಾವಧಿಯ ಬಗ್ಗೆ ಶೀಘ್ರದಲ್ಲೇ ಚಲನ ಚಿತ್ರವೊಂದು ತಯಾರಾಗಲಿದೆ. ಈಗಾಗಲೇ ಚಿತ್ರದ ಸ್ಕ್ರಿಪ್ಟ್ ಸಿದ್ಧವಾಗಿದ್ದು ಐರಿಶ್ ಮೂಲದ ಸಿನಿಮಾ ಸಂಸ್ಥೆಯೊಂದು ಈ ಚಿತ್ರವನ್ನು ನಿರ್ಮಿಸಲಿದೆ ಎಂದು ಹೇಳಲಾಗಿದೆ.

ಮನಮೋಹನ್ ಸಿಂಗ್ ಪಾತ್ರವನ್ನು ಭಾರತದ ಹಿರಿಯ ನಟರೊಬ್ಬರು ನಿರ್ವಹಿಸುತ್ತಿದ್ದಾರೆಂದು ಹೇಳಲಾಗಿದ್ದು, ಐರಿಶ್ ನಟರೊಬ್ಬರು ರಾಹುಲ್ ಗಾಂಧಿ ಪಾತ್ರವನ್ನು, ಇಟಲಿಯ ನಟಿಯೊಬ್ಬರು ಸೋನಿಯಾ ಗಾಂಧಿ ಪಾತ್ರವನ್ನು ಮಾಡಲಿದ್ದಾರೆ ಎಂದು ಕೆಲ ಮೂಲಗಳು ತಿಳಿಸಿವೆ.

ಅಂದಹಾಗೆ, ಈ ಚಿತ್ರವು ಸಂಜಯ್ ಬಾರು ಬರೆದಿರುವ 'ಮನಮೋಹನ್ ಸಿಂಗ್: ದ ಆ್ಯಕ್ಸಿಡೆಂಟಲ್ ಪ್ರೈಮ್ ಮಿನಿಸ್ಟರ್' ಎಂಬ ಪುಸ್ತಕ ಆಧಾರಿತವಾಗಿದೆ. ಕೇಂದ್ರದಲ್ಲಿ ಮನಮೋಹನ್ ಸಿಂಗ್ ಪ್ರಧಾನಿಯಾಗಿ 10 ವರ್ಷ ಅಧಿಕಾರದಲ್ಲಿದ್ದಾಗ ಅವರಿಗೆ ಸಂಜಯ್ ಬಾರು ಅವರು ಮಾಧ್ಯಮ ಸಲಹೆಗಾರರಾಗಿದ್ದರು.

ಮನಮೋಹನ್ ಸಿಂಗ್ ಪಾತ್ರ ಮಾತ್ರವಲ್ಲದೆ, ಇದರಲ್ಲಿ ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ, ಮಾಜಿ ರಾಷ್ಟ್ರಪತಿ ದಿವಂಗತ ಅಬ್ದುಲ್ ಕಲಾಂ, ಕಾಂಗ್ರೆಸ್ ನಾಯಕ ಅಹ್ಮದ್ ಪಟೇಲ್ ಹಾಗೂ ಸಂಜಯ್ ಬಾರು ಅವರ ಪಾತ್ರವೂ ಇರಲಿವೆಯಂತೆ.

ಅಂದಹಾಗೆ, ಚಿತ್ರವು 2019ರ ಸಂಸತ್ ಚುನಾವಣೆಗೆ ಕೆಲ ತಿಂಗಳ ಮುನ್ನ ಅಂದರೆ 2018ರ ಡಿಸೆಂಬರ್ ನಲ್ಲಿ ಬಿಡುಗಡೆಯಾಗಲಿದೆ ಎಂದು ಚಿತ್ರ ತಂಡ ಹೇಳಿಕೊಂಡಿದೆ.

English summary

An Indo-Irish actor who's a British citizen and has acted in Hollywood films will play Rahul Gandhi while an Italian actress is likely to play Sonia Gandhi — they are part of the star cast for the movie version of Sanjaya Baru's book on Manmohan Singh, The Accidental Prime Minister.