ಕೇರಳ: ಇಡುಕ್ಕಿ ಜಲಾಶಯದ ಎಲ್ಲಾ 5 ಗೇಟ್ ಓಪನ್!

ಮುನ್ನಾರ್, ಆಗಸ್ಟ್ 10: ಕೇರಳದಲ್ಲಿ ಧಾರಾಕಾರವಾಗಿ ಸುರಿದ ಮಳೆಯಿಂದಾಗಿ ತುಂಬಿರುವ ಇಡುಕ್ಕಿ ಜಲಾಶಯದ ಎಲ್ಲಾ 5 ಗೇಟ್ ಗಳನ್ನು ತೆರೆಯಲಾಗಿದೆ.

ಭಾರತದ ಅತಿ ದೊಡ್ಡ ಜಲಾಶಯಗಳಲ್ಲಿ ಇಡುಕ್ಕಿ ಸಹ ಒಂದು. ಪೆರಿಯಾರ್ ನದಿಗೆ ಕಟ್ಟಲಾದ ಇಡುಕ್ಕಿ ಆಣೆಕಟ್ಟಿನ ಗರಿಷ್ಠ ಮಟ್ಟ 2403 ಅಡಿ. ನೀರಿನ ಮಟ್ಟ ಸದ್ಯಕ್ಕೆ 2401.50 ಅಡಿ ತಲುಪಿರುವ ಕಾರಣ ಐದು ಶಟರ್ ಗಳನ್ನು ತೆರೆಯಲಾಗಿದೆ. ಈಗಾಗಲೇ ಮೂರು ಬಾರಿ ರೆಡ್ ಅಲರ್ಟ್ ಘೋಷಿಸಲಾಗಿದ್ದು, ನದಿಪಾತ್ರದ ಜನರು ಎಚ್ಚರಿಕೆಯಿಂದಿರುವಂತೆ ಸೂಚಿಸಲಾಗಿದೆ.

ಸುರಕ್ಷಿತ ಪ್ರದೇಶಗಳಿಗೆ ತೆರಳುವಂತೆ ಈಗಾಗಲೇ ಸೂಚನೆ ನೀಡಲಾಗಿದ್ದು, ಇದುವರೆಗೂ ಕೇರಳ ಪ್ರವಾಹಕ್ಕೆ 26 ಮಂದಿ ಮೃತರಾಗಿದ್ದಾರೆ.

ಇದರೊಂದಿಗೆ 60 ಕ್ಕೂ ಹೆಚ್ಚು ಪ್ರವಾಸಿಗರು ಮುನ್ನಾರ್ ಬಳಿಯ ರೆಸಾರ್ಟ್ ವೊಂದರಲ್ಲಿ ಸಿಲುಕಿಕೊಂಡಿದ್ದು, ಇದರಲ್ಲಿ 20 ವಿದೇಶಿಯರಿದ್ದಾರೆ ಎನ್ನಲಾಗುತ್ತಿದೆ. ಅವರ ರಕ್ಷಣೆಗೆ ಸರ್ಕಾರ ಕ್ರಮ ಕೈಗೊಂಡಿದೆ.

English summary

All five shutters of the Idukki dam were opened for the first time in 40 years after heavy rain lashes kerala since a week.