ಭೂ ವೀಕ್ಷಣಾ ಉಪಗ್ರಹದ ಉಡ್ಡಯನ ವಿಫಲ: ಇಸ್ರೋ

ಅಮರಾವತಿ, ಮೇ 18: ಭಾನುವಾರ ಕೈಗೊಂಡಿದ್ದ ಭೂ ವೀಕ್ಷಣಾ ಉಪಗ್ರಹದ ಉಡ್ಡಯನ ವಿಫಲವಾಗಿದೆ ಎಂದು ಇಸ್ರೋ ಹೇಳಿದೆ. ಆಂಧ್ರ ಪ್ರದೇಶ ರಾಜ್ಯದ ಶ್ರೀಹರಿಕೋಟದಲ್ಲಿರುವ ಉಪಗ್ರಹ ಉಡಾವಣಾ ಕೇಂದ್ರದಿಂದ ಇಂದು ಬೆಳಗ್ಗೆ ಪಿಎಸ್‌ಎಲ್‌ವಿ-ಸಿ61 ರಾಕೆಟ್ ಉಪಗ್ರಹ ಹೊತ್ತು ನಭಕ್ಕೆ ಚಿಮ್ಮಿತ್ತು. ಆದರೆ ರಾಕೆಟ್ 3ನೇ ಹಂತದಲ್ಲಿ ವೈಫಲ್ಯ ಅನುಭವಿಸಿದೆ.

ಇಸ್ರೋ ಅಧ್ಯಕ್ಷ ವಿ. ನಾರಾಯಣನ್‌ ಈ ಕುರಿತು ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದಾರೆ. ಇಸ್ರೋದ ಭೂ ವೀಕ್ಷಣಾ ಉಪಗ್ರಹ ಉಡ್ಡಯನ ವಿಫಲವಾಗಿದೆ ಎಂದು ಹೇಳಿದ್ದಾರೆ. ಪಿಎಸ್‌ಎಲ್‌ವಿ ಇಸ್ರೋದ ವಿಶ್ವಾಸಾರ್ಹ ರಾಕೆಟ್‌ ಆಗಿದೆ.

ಭಾನುವಾರ ಉಪಗ್ರಹ ಹೊತ್ತ ರಾಕೆಟ್ ಸಾಮಾನ್ಯವಾಗಿಯೇ ಪ್ರಾರಂಭವಾಗಿತ್ತು. ಮೊದಲ ಎರಡು ಹಂತ ಯಶಸ್ವಿಯಾಗಿತ್ತು. ಆದರೆ 3ನೇ ಹಂತದಲ್ಲಿ ರಾಕೆಟ್ ವೈಫಲ್ಯ ಅನುಭವಿಸಿದ್ದು, 3ನೇ ಹಂತದ ಕಾರ್ಯಾಚರಣೆಯನ್ನು ಯಶಸ್ವಿಯಾಗಿಸಲು ಸಾಧ್ಯವಾಗಿಲ್ಲ ಎಂದು ಇಸ್ರೋ ಹೇಳಿದೆ.

ಭಾನುವಾರ ಬೆಳಗ್ಗೆ 5.59ಕ್ಕೆ ಇಸ್ರೋದ ಇಒಎಸ್ -09 (ಭೂ ಸರ್ವೇಕ್ಷಣಾ) ಉಪಗ್ರಹವನ್ನು ಹೊತ್ತ ಪಿಎಸ್‌ಎಲ್‌ವಿ-ಸಿ61 ರಾಕೆಟ್ ಯಶಸ್ವಿಯಾಗಿ ಉಡಾವಣೆಗೊಂಡಿತ್ತು. ಈ ಉಪಗ್ರಹವನ್ನು ಗಡಿ ಕಾವಲು, ಬೇಹುಗಾರಿಕೆ, ರಾಷ್ಟ್ರೀಯ ಭದ್ರತೆ, ವಿಪತ್ತು ನಿರ್ವಹಣೆಗೆ ಸಹಾಯಕವಾಗಲು ಉಡಾವಣೆಗೊಳಿಸಲಾಗಿತ್ತು.

ಸಾಮಾಜಿಕ ಜಾಲತಾಣದಲ್ಲಿ ಇಸ್ರೋ ಮಾಹಿತಿ

Today 101st launch was attempted, PSLV-C61 performance was normal till 2nd stage. Due to an observation in 3rd stage, the mission could not be accomplished.

— ISRO (@isro) May 18, 2025

ಪೋಲಾರ್ ಸ್ಯಾಟಲೈಟ್ ಲಾಂಚ್ ವೆಹಿಕಲ್ (ಪಿಎಸ್‌ಎಲ್‌ವಿ) ವಿಶ್ವಾಸಾರ್ಹ ರಾಕೆಟ್ ಆಗಿದೆ. ಭಾನುವಾರ ಬೆಳಗ್ಗೆ ಯಶಸ್ವಿ ಉಡಾವಣೆ ಬಳಿಕ ಮೊದಲ ಎರಡು ಹಂತಗಳು ಯಶಸ್ವಿಯಾಗಿ ಪೂರ್ಣಗೊಂಡಿದ್ದವು. ರಾಕೆಟ್ ಮೂರನೇ ಹಂತದಲ್ಲಿ ವೈಫಲ್ಯವನ್ನು ಅನುಭವಿಸಿತು ಎಂದು ವಿ. ನಾರಾಯಣನ್‌ ಹೇಳಿದ್ದಾರೆ.

ಇಸ್ರೋ ಅಧ್ಯಕ್ಷ ವಿ. ನಾರಾಯಣನ್‌, "ಶ್ರೀಹರಿಕೋಟದಿಂದ ಪಿಎಸ್‌ಎಲ್‌ವಿ-ಸಿ61 ಇಒಎಸ್‌-09 ಮಿಷನ್ ಮೂಲಕ ಇಂದು ನಾವು ಇಸ್ರೋದ 101ನೇ ಉಡ್ಡಯನ ಕೈಗೊಂಡಿದ್ದೆವು. ಪ್ರಾರಂಭದ ಹಂತದಲ್ಲಿ ರಾಕೆಟ್‌ ಉಡ್ಡಯನ ಯಶಸ್ವಿಯಾಗಿತ್ತು" ಎಂದು ತಿಳಿಸಿದ್ದಾರೆ.

"ಮೊದಲ ಎರಡು ಹಂತಗಳ ಬಳಿಕ ಮೂರನೇ ಹಂತದಲ್ಲಿ ಮೋಟಾರ್ ಸುರಕ್ಷಿತವಾಗಿತ್ತು. ಆದರೆ ಕಾರ್ಯ ನಿರ್ವಹಣೆಯನ್ನು ಸಪೂರ್ಣವಾಗಿ ಪೂರ್ಣಗೊಳಿಸಲು ಸಾಧ್ಯವಾಗಲಿಲ್ಲ. ವೈಫಲ್ಯಕ್ಕೆ ಕಾರಣ ಏನು ಎಂಬುದನ್ನು ನಾವು ವಿಶ್ಲೇಷಣೆ ಮಾಡುತ್ತೇವೆ" ಎಂದು ಇಸ್ರೋ ಅಧ್ಯಕ್ಷರು ಹೇಳಿದ್ದಾರೆ.

2022ರಲ್ಲಿ ಇಸ್ರೋ ಇಒಎಸ್-04 ಮಿಷನ್ ಕೈಗೊಂಡಿತ್ತು. ಈ ಉಪಗ್ರಹವನ್ನು ಯಶಸ್ವಿಯಾಗಿ ಉಡ್ಡಯನ ಮಾಡಲಾಗಿತ್ತು. ಇದೇ ಮಾದರಿಯಲ್ಲಿ ಈಗ ಇಒಎಸ್‌-09 ಮಿಷನ್ ಕೈಗೊಳ್ಳಲಾಗಿತ್ತು. ಈ ಉಪ್ರಹ ಹಗಲು, ರಾತ್ರಿ ಮತ್ತು ಎಲ್ಲಾ ಮಾದರಿಯ ಹವಾಮಾನದ ವ್ಯವಸ್ಥೆಯಲ್ಲಿಯೂ ಕೂಡ ಭೂಮಿಗೆ ಚಿತ್ರಗಳನ್ನು ಕಳಿಸುವ ಸಾಮರ್ಥ್ಯವನ್ನು ಹೊಂದಿತ್ತು.

ಇಸ್ರೋದ 101ನೇ ಉಡ್ಡಯನ ಯಶಸ್ವಿಯಾಗಲಿ ಎಂದು ಶುಕ್ರವಾರ ತಿರುಪತಿ ದೇವಾಲಯದಲ್ಲಿ ವಿಶೇಷ ಪೂಜೆಯನ್ನು ಸಲ್ಲಿಕೆ ಮಾಡಲಾಗಿತ್ತು. ಭಾನುವಾರ ಬೆಳಗ್ಗೆ 5.59ಕ್ಕೆ ಪಿಎಸ್‌ಎಲ್‌ವಿ-ಸಿ61 ರಾಕೆಟ್ ಯಶಸ್ವಿಯಾಗಿಯೇ ಉಡ್ಡಯನಗೊಂಡಿತ್ತು. ಆದರೆ ಬಳಿಕ ಕಾಣಿಸಿಕೊಂಡ ತಾಂತ್ರಿಕ ತೊಂದರೆಯಿಂದಾಗಿ ಮಿಷನ್ ವಿಫಲವಾಗಿದೆ.

ಮೇ 16ರಂದು ಇಸ್ರೋ ತನ್ನ ಪತ್ರಿಕಾ ಪ್ರಕಟಣೆಯಲ್ಲಿ ಭಾರತ ತನ್ನ ಬಾಹ್ಯಾಕಾಶ ಕಾರ್ಯಕ್ರಮದ 101ನೇ ಕಾರ್ಯಾಚರಣೆಯೊಂದಿಗೆ ಮಹತ್ವದ ಮೈಲಿಗಲ್ಲು ಸಾಧಿಸಲು ಸಜ್ಜಾಗಿದೆ . ಮೇ 18ರ ಬೆಳಗ್ಗೆ 05:59ಕ್ಕೆ ಇಸ್ರೋದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಲ್ಲಿರುವ ಮೊದಲ ಉಡಾವಣಾ ಪ್ಯಾಡ್‌ನಿಂದ PSLV-C61 ನಲ್ಲಿ EOS-09 ಅನ್ನು ಉಡಾವಣೆ ಮಾಡಲಿದ್ದೇವೆ ಎಂದು ಹೇಳಿತ್ತು.

ಈ ಕಾರ್ಯಾಚರಣೆ ಭೂ ವೀಕ್ಷಣಾ ಉಪಗ್ರಹವನ್ನು ಸೂರ್ಯ ಸಿಂಕ್ರೊನಸ್ ಧ್ರುವ ಕಕ್ಷೆಯಲ್ಲಿ ಇರಿಸಲಿದೆ. ಉಡಾವಣಾ ವಾಹಕ PSLV-C61 PSLV-C61 ಪೋಲಾರ್ ಸ್ಯಾಟಲೈಟ್ ಲಾಂಚ್ ವೆಹಿಕಲ್‌ನ 63ನೇ ಹಾರಾಟ ಮತ್ತು PSLV-XL ಸಂರಚನೆಯನ್ನು ಬಳಸುವ 27ನೇ ಹಾರಾಟವಾಗಿದೆ ಎಂದು ತಿಳಿಸಿತ್ತು.

English summary

ISRO tweeted that today 101st launch was attempted, PSLV-C61 performance was normal till 2nd stage. Due to an observation in 3rd stage, the mission could not be accomplished.