ಇಂಡಿಗೋ ಪ್ರಯಾಣಿಕರಿಗೆ ಗುಡ್ ನ್ಯೂಸ್! ಹೊಸ 'ಲೈಟ್' ಫೇರ್ನಲ್ಲಿ ಸಿಗಲಿದೆ ಈ ಭರ್ಜರಿ ಲಾಭ
ನವದೆಹಲಿ: ಭಾರತದ ಪ್ರಮುಖ ವಿಮಾನಯಾನ ಸಂಸ್ಥೆಯಾದ ಇಂಡಿಗೋ ವಿಮಾನದಲ್ಲಿ ಕಡಿಮೆ ಸಾಮಾನು ಹೊತ್ತು ಪ್ರಯಾಣಿಸುವ ಪ್ರಯಾಣಿಕರಿಗೆ ಅನುಕೂಲವಾಗುವಂತೆ ಹೊಸ 'ಇಂಡಿಗೋ ಲೈಟ್ (IndiGo Lite)' ದರವನ್ನು ಪರಿಚಯಿಸಿದೆ. ಈ ಹೊಸ ದರ ವ್ಯವಸ್ಥೆ ಜುಲೈ 15, 2026ರಿಂದ ಪ್ರಯಾಣಿಸುವವರಿಗೆ ಅನ್ವಯವಾಗಲಿದ್ದು, ಬುಕ್ಕಿಂಗ್ ಅನ್ನು ಇಂದಿನಿಂದಲೇ ಆರಂಭಿಸಲಾಗಿದೆ.
ಪ್ರಸ್ತುತ ಭಾರತೀಯ ವಿಮಾನ ಪ್ರಯಾಣಿಕರಲ್ಲಿ ಹಲವರು ಯಾವುದೇ ಹೆಚ್ಚಿನ ವ್ಯವಸ್ಥಿತ ಲಗೇಜ್ ಇಲ್ಲದೆ, ಕೇವಲ 7 ಕೆಜಿ ಒಳಗಿನ ಸಣ್ಣ ಹ್ಯಾಂಡ್ ಬ್ಯಾಗ್ ಹಿಡಿದು ಕಚೇರಿ ಕೆಲಸಗಳಿಗಾಗಿ ಅಥವಾ ಅಲ್ಪಾವಧಿಯ ಪ್ರವಾಸಗಳಿಗಾಗಿಯೇ ಹೆಚ್ಚಾಗಿ ಪ್ರಯಾಣಿಸುತ್ತಾರೆ. ಇಂತಹ ನಿತ್ಯ ಪ್ರಯಾಣಿಕರಿಗೆ ಆರ್ಥಿಕ ಹೊರೆಯಾಗದಂತೆ ಸುಲಭ ಪ್ರವೇಶ ದರವನ್ನು ಒದಗಿಸುವುದು ಇಂಡಿಗೋದ ಈ ಹೊಸ 'ಲೈಟ್' ಯೋಜನೆಯ ಪ್ರಮುಖ ಉದ್ದೇಶವಾಗಿದೆ. ಇದರ ಅಡಿಯಲ್ಲಿ ಪ್ರಯಾಣಿಸುವ ಗ್ರಾಹಕರು ಸಾಮಾನ್ಯ ದರಕ್ಕಿಂತ ಗಮನಾರ್ಹ ರಿಯಾಯಿತಿ ಪಡೆಯಲಿದ್ದಾರೆ.
ಎಲ್ಲಿ ಬುಕ್ ಮಾಡಬಹುದು?
'ಇಂಡಿಗೋ ಲೈಟ್' ದರದಲ್ಲಿ ಟಿಕೆಟ್ ಬುಕ್ ಮಾಡಲು ಇಂಡಿಗೋದ ಅಧಿಕೃತ ವೆಬ್ಸೈಟ್, ಮೊಬೈಲ್ ಆ್ಯಪ್ ಮತ್ತು ಕಸ್ಟಮರ್ ಕೇರ್ ಮೂಲಕ ಮಾತ್ರ ಅವಕಾಶವಿದೆ. ಇದು ದೇಶೀಯ ಹಾಗೂ ಅಂತಾರಾಷ್ಟ್ರೀಯ ನಾನ್-ಸ್ಟಾಪ್ ವಿಮಾನಗಳ ಏಕಮುಖ, ರೌಂಡ್ ಟ್ರಿಪ್ ಮತ್ತು ಮಲ್ಟಿ-ಸಿಟಿ ಪ್ರಯಾಣಗಳಿಗೆ ಅನ್ವಯಿಸುತ್ತದೆ.
ಏನೆಲ್ಲ ಸೌಲಭ್ಯ ಸಿಗಲಿದೆ?
ಈ ಹೊಸ ದರದಲ್ಲಿ ಪ್ರಯಾಣಿಕರಿಗೆ ಕೆಳಗಿನ ಸೌಲಭ್ಯಗಳು ದೊರೆಯಲಿವೆ:
7 ಕೆಜಿ ತನಕ ಉಚಿತ ಕ್ಯಾಬಿನ್ ಬ್ಯಾಗ್
ಹೆಚ್ಚುವರಿ ಶುಲ್ಕವಿಲ್ಲದೆ ಸ್ವಯಂಚಾಲಿತವಾಗಿ ಸೀಟ್ ಹಂಚಿಕೆ
ಕಡಿಮೆ ಮೂಲ ಟಿಕೆಟ್ ದರ
ಅಗತ್ಯವಿದ್ದರೆ ಹೆಚ್ಚುವರಿ ಸೇವೆಗಳನ್ನು ಪ್ರತ್ಯೇಕವಾಗಿ ಖರೀದಿಸುವ ಅವಕಾಶ
ಹೆಚ್ಚುವರಿ ಸೇವೆಗಳಿಗೆ ಪ್ರತ್ಯೇಕ ಶುಲ್ಕ
ಪ್ರಯಾಣಿಕರು ತಮ್ಮ ಅಗತ್ಯಕ್ಕೆ ಅನುಗುಣವಾಗಿ ಕೆಳಗಿನ ಸೇವೆಗಳನ್ನು ಹೆಚ್ಚುವರಿ ಶುಲ್ಕ ನೀಡಿ ಸೇರಿಸಿಕೊಳ್ಳಬಹುದು.
ಚೆಕ್-ಇನ್ ಬ್ಯಾಗೇಜ್
ಇಷ್ಟದ ಸೀಟ್ ಆಯ್ಕೆ
ವಿಮಾನದಲ್ಲಿನ ಆಹಾರ
ಫಾಸ್ಟ್ ಫಾರ್ವರ್ಡ್ (Priority Service)
ಈ ಸೇವೆಗಳನ್ನು ವಿಮಾನ ಹೊರಡುವ ಒಂದು ಗಂಟೆ ಮೊದಲುವರೆಗೆ ವೆಬ್ಸೈಟ್ ಅಥವಾ ವಿಮಾನ ನಿಲ್ದಾಣದಲ್ಲಿಯೂ ಸೇರಿಸಬಹುದು ಎಂದು ಇಂಡಿಗೋ ತಿಳಿಸಿದೆ.
ಲಾಯಲ್ಟಿ ಪಾಯಿಂಟ್ಗೂ ಅವಕಾಶ
'ಇಂಡಿಗೋ ಲೈಟ್' ದರದಲ್ಲಿ ಪ್ರಯಾಣಿಸಿದರೂ IndiGo BluChip ಲಾಯಲ್ಟಿ ಪಾಯಿಂಟ್ಗಳನ್ನು ಗಳಿಸುವ ಹಾಗೂ ಬಳಸುವ ಅವಕಾಶ ಮುಂದುವರಿಯಲಿದೆ ಎಂದು ಕಂಪನಿ ಸ್ಪಷ್ಟಪಡಿಸಿದೆ.
ಇಂಡಿಗೋದಿಂದ ಕೈಗೆಟುಕುವ ದರದ 'ಇಂಡಿಗೋ ಲೈಟ್' ಪರಿಚಯ: ಸಂಸ್ಥೆ ಹೇಳಿದ್ದೇನು?
ಕಡಿಮೆ ಸಾಮಾನುಗಳೊಂದಿಗೆ ಪ್ರಯಾಣಿಸುವವರಿಗಾಗಿ ಇಂಡಿಗೋ ವಿಮಾನಯಾನ ಸಂಸ್ಥೆಯು 'ಇಂಡಿಗೋ ಲೈಟ್' ಎಂಬ ಹೊಸ ದರ ವ್ಯವಸ್ಥೆಯನ್ನು ಪರಿಚಯಿಸಿದೆ. ಈ ಕುರಿತು ಮಾತನಾಡಿದ ಸಂಸ್ಥೆಯ ಮುಖ್ಯ ಕಾರ್ಯತಂತ್ರ ಅಧಿಕಾರಿ ಅಲೋಕ್ ಸಿಂಗ್, "ಗ್ರಾಹಕರು ತಮಗೆ ಅಗತ್ಯವಿರುವ ಸೇವೆಗಳಿಗೆ ಮಾತ್ರ ಹಣ ಪಾವತಿಸುವಂತೆ ಮಾಡಲು ಮತ್ತು ವಿಮಾನ ಪ್ರಯಾಣವನ್ನು ಮತ್ತಷ್ಟು ಸುಲಭ ಹಾಗೂ ಕೈಗೆಟುಕುವ ದರದಲ್ಲಿ ಒದಗಿಸಲು ಈ ಯೋಜನೆಯನ್ನು ರೂಪಿಸಲಾಗಿದೆ," ಎಂದು ತಿಳಿಸಿದ್ದಾರೆ. ಈ ಹೊಸ ವ್ಯವಸ್ಥೆಯು ಕಡಿಮೆ ವೆಚ್ಚದಲ್ಲಿ ಪ್ರಯಾಣಿಸಲು ಬಯಸುವ ಪ್ರಯಾಣಿಕರಿಗೆ ಅತ್ಯುತ್ತಮ ಆಯ್ಕೆಯಾಗಲಿದೆ.
Click it and Unblock the Notifications
Sign in with Google