ಎಬಿಪಿ ನ್ಯೂಸ್ Exit Poll : ಗುಜರಾತ್ ನಲ್ಲಿ ಬಿಜೆಪಿ ಬಾಯಿಗೆ ಶ್ರೀಖಂಡ

ನವದೆಹಲಿ, ಡಿಸೆಂಬರ್ 14 : ಗುಜರಾತ್ ವಿಧಾನಸಭೆ ಚುನಾವಣೆ ಮತದಾನ ಮುಗಿಯುತ್ತಿದ್ದಂತೆ ಚುನಾವಣೋತ್ತರ ಸಮೀಕ್ಷೆ ಭರಾಟೆ ಶುರುವಾಗಿದ್ದು, ಯಾವ ಪಕ್ಷ ಜಯಭೇರಿ ಬಾರಿಸುತ್ತದೆ, ಯಾವ ಪಕ್ಷ ಮಣ್ಣು ಮುಕ್ಕುತ್ತದೆ ಎಂಬುದರತ್ತ ಎಲ್ಲರ ಕಣ್ಣು ನೆಟ್ಟಿದೆ.

ಎಬಿಪಿ ನ್ಯೂಸ್ - ಸಿಎಸ್ ಡಿಎಸ್ ಜಂಟಿಯಾಗಿ ನಡೆಸಿದ ಸಮೀಕ್ಷೆಯ ಫಲಿತಾಂಶ ಹೊರಬಿದ್ದಿದ್ದು, ಭಾರತೀಯ ಜನತಾ ಪಕ್ಷ 117 ಕ್ಷೇತ್ರಗಳಲ್ಲಿ ಗೆಲುವಿನ ಮಾಲೆ ಧರಿಸಲಿದೆ. ಸರಳ ಬಹುಮತಕ್ಕೆ ಬೇಕಾಗಿರುವುದು 92 ಸ್ಥಾನಗಳು. ಕಾಂಗ್ರೆಸ್ 64 ಕ್ಷೇತ್ರಗಳನ್ನು ಪಡೆಯಲಿದ್ದರೆ, 1 ಕ್ಷೇತ್ರ ಮಾತ್ರ ಇತರ ಪಕ್ಷಗಳ ಪಾಲಾಗಲಿದೆ.

ಗುಜರಾತ್ ನ ಸೌರಾಷ್ಟ್ರ ಮತ್ತು ಕಛ್ ಬಿಜೆಪಿ ಜಯಭೇರಿ ಬಾರಿಸಲಿದ್ದು, 54 ಕ್ಷೇತ್ರಗಳಲ್ಲಿ 31-37ರಲ್ಲಿ ಜಯಶಾಲಿಯಾಗಲಿದೆ. ಕಾಂಗ್ರೆಸ್ಸಿಗೆ ಕೇವಲ 16-22 ಸ್ಥಾನಗಳು ಲಭಿಸಲಿವೆ. 1 ಕ್ಷೇತ್ರ ಪಕ್ಷೇತ್ರರ ಪಾಲಾಗಲಿದೆ.

ದಕ್ಷಿಣ ಗುಜರಾತ್ ನಲ್ಲಿ ಬಿಜೆಪಿ ಶೇ.52 ಮತಗಳನ್ನು ಕಬಳಿಸಲಿದ್ದು, 21-27 ಕ್ಷೇತ್ರಗಳಲ್ಲಿ ಗೆಲ್ಲಲಿದೆ. ಕಾಂಗ್ರೆಸ್ ಶೇ.40 ಮತ ಪಡೆಯಲಿದ್ದು, 9-13 ಸ್ಥಾನಗಳನ್ನು ಗೆಲ್ಲಲಿದೆ. ಶೇ.8ರಷ್ಟು ಮತಗಳು ಇತರ ಪಕ್ಷಗಳ ಪಾಲಾಗಲಿವೆ.

ಉತ್ತರ ಗುಜರಾತ್ ನಲ್ಲಿ ಚುನಾವಣಾಪೂರ್ವ ಸಮೀಕ್ಷೆ ಸಂಪೂರ್ಣವಾಗಿ ತಲೆಕೆಳಗು ಆಗಿದ್ದು, ಬಿಜೆಪಿ 32-38 ಸ್ಥಾನಗಳನ್ನು ಗೆಲ್ಲಲಿದೆ. ಕಾಂಗ್ರೆಸ್ 16-18 ಕ್ಷೇತ್ರಗಳಲ್ಲಿ ಗೆಲ್ಲಲಿದೆ. ಚುನಾವಣಾಪೂರ್ವ ಸಮೀಕ್ಷೆಯಲ್ಲಿ ಉತ್ತರ ಗುಜರಾತ್ ನಲ್ಲಿ ಕಾಂಗ್ರೆಸ್ ಗೆಲ್ಲಲಿದೆ ಎಂದು ಎಬಿಪಿ ನ್ಯೂಸ್ ಹೇಳಿತ್ತು.

ಗುಜರಾತ್ ನ ಕೇಂದ್ರ ಭಾಗದಲ್ಲಿ 40 ಕ್ಷೇತ್ರಗಳಲ್ಲಿ ಬಿಜೆಪಿ 21-27, ಕಾಂಗ್ರೆಸ್ 13-19 ಜಯ ಗಳಿಸಲಿವೆ. ಬಿಜೆಪಿ ಶೇ.47ರಷ್ಟು ಮತಗಳನ್ನು ಕಬಳಿಸಲಿದ್ದರೆ, ಕಾಂಗ್ರೆಸ್ ಪಾಲು ಶೇ.42ರಷ್ಟು. ಶೇ.11ರಷ್ಟು ಮತಗಳು ಇತರ ಪಕ್ಷಗಳ ಪಾಲಾಗಲಿವೆ.

English summary

Results of Gujarat Exit Poll 2017 are out now. Read latest updates related to exit poll done by ABP News-CSDS. BJP and Congress are major parties here.