ಪಕ್ಷಕ್ಕೆ ಹರಿದು ಬರುತ್ತಿರುವ ಪಾರ್ಟಿ ಫಂಡ್: ಬಿಜೆಪಿ ಎಲ್ಲೋ, ಕಾಂಗ್ರೆಸ್ ಇನ್ನೆಲ್ಲೋ!

Published: Thursday, February 1, 2018, 10:42 [IST]

ಕಳೆದ ಲೋಕಸಭಾ ಚುನಾವಣೆಯ ನಂತರ, ಅದಾದ ಮೇಲೆ ಸಾಲುಸಾಲು ಅಸೆಂಬ್ಲಿ ಚುನಾವಣೆಯನ್ನು ಬಿಜೆಪಿ ನೇತೃತ್ವದ ಎನ್ಡಿಎ ಮೈತ್ರಿಕೂಟ ಬಹುತೇಕ ಗೆಲ್ಲುತ್ತಾ ಬರುತ್ತಿರುವುದರಿಂದ ಬಿಜೆಪಿಗೆ ಹರಿದು ಬರುತ್ತಿರುವ ಪಾರ್ಟಿ ಫಂಡ್ ಎಲ್ಲರ ಹುಬ್ಬೇರುವಂತೆ ಮಾಡಿದೆ.

ಕಾಂಗ್ರೆಸ್ ಹೈಕಮಾಂಡ್ ಅಳಿಯ ರಾಬರ್ಟ್ ವಾಧ್ರಾ ಅವರ 'ಡಿಎಲ್ಎಫ್ ಭೂಹಗರಣ'ದ ವಿಚಾರದಲ್ಲಿ ದೇಶಾದ್ಯಂತ ಭಾರೀ ಪ್ರತಿಭಟೆನೆ ಮಾಡಿದ್ದ ಬಿಜೆಪಿ, ಈಗ ಅದೇ ಸಂಸ್ಥೆ ನೀಡಿರುವ ಪಾರ್ಟಿ ಫಂಡ್ ಅನ್ನು ಮುಕ್ತ ಮನಸ್ಸಿನಿಂದ ತಮ್ಮ ಪಕ್ಷದ ಬ್ಯಾಂಕ್ ಅಕೌಂಟಿಗೆ ಸೇರಿಸಿಕೊಂಡಿದೆ.

ಎಡಿಆರ್ (ಅಸೋಸಿಯೇಷನ್ ಆಫ್ ಡೆಮಾಕ್ರಟಿಕ್ ರಿಫಾರ್ಮ್) 2016-17ರ ಸಾಲಿನಲ್ಲಿ ಯಾವ ಪಕ್ಷಕ್ಕೆ ಎಷ್ಟು ದೇಣಿಗೆ ಬಂದಿದೆ, ಯಾರು ಎಷ್ಟು ದೇಣಿಗೆ ನೀಡಿದರು ಎನ್ನುವ ಮಾಹಿತಿಯನ್ನು ಬಿಡುಗಡೆ ಮಾಡಿದೆ. ಆ ಪಟ್ಟಿಯ ಪ್ರಕಾರ, ಬಿಜೆಪಿಯ ಹತ್ತಿರಕ್ಕೂ ಯಾವುದೇ ಪಕ್ಷಗಳು ಬರದೇ ಇರುವುದು ವಿಶೇಷ.

16-17ರ ಸಾಲಿನಲ್ಲಿ ವಿವಿಧ ಪಕ್ಷಗಳಿಗೆ ಹರಿದು ಬಂದ ಒಟ್ಟು ದೇಣಿಗೆಯಲ್ಲಿ ಶೇ.89 ಬಿಜೆಪಿಗೆ ಬಂದಿದ್ದರೆ ಶೇ.11 ಇತರ ಒಂಬತ್ತು ಪಕ್ಷಗಳಿಗೆ ಬಂದಿದೆ. ಪ್ರುಡೆಂಟ್ ಎಲೆಕ್ಟೊರಲ್ ಟ್ರಸ್ಟ್ ಮೂಲಕ ಸಂಗ್ರಹವಾದ ದೇಣಿಗೆಯಲ್ಲಿ ಸಿಂಹಪಾಲು ಮತ್ತು ಜನತಾ ನಿರ್ವಾಚಕ ಟ್ರಸ್ಟ್ ಮೂಲಕ ಸಂಗ್ರಹವಾದ ಎಲ್ಲಾ ದೇಣಿಗೆಗಳು ಬಿಜೆಪಿ ಪಾಲಾಗಿವೆ.

ವಿವಿಧ ಕಾರ್ಪೋರೇಟ್ ಸಂಸ್ಥೆಗಳು,ಎಲೆಕ್ಟೊರಲ್ ಸಂಸ್ಥೆಗಳ ಮೂಲಕ ರಾಜಕೀಯ ಪಕ್ಷಗಳಿಗೆ ನೀಡುವ ದೇಣಿಗೆ ಮೊತ್ತ, ಪ್ರತೀ ವರ್ಷ ಹೆಚ್ಚಾಗುತ್ತಿರುವುದು ಗಮನಿಸಬೇಕಾದ ವಿಚಾರ. ಕೇಂದ್ರದಲ್ಲಿ ಆಡಳಿತ ಪಕ್ಷದ ಮೇಲೆ, ಸಂಸ್ಥೆಗಳು ಪರೋಕ್ಷವಾಗಿ ದೇಣಿಗೆ ಎನ್ನುವ ಮೂಲಕ 'ಬಂಡವಾಳ' ಹೂಡುವುದು ಹೊಸದೇನಲ್ಲ. 2016-17ರ ಸಾಲಿನಲ್ಲಿ, ಪ್ರಮುಖವಾಗಿ ಒಂಬತ್ತು ಸಂಸ್ಥೆ ಎಷ್ಟು ಹಣ ರಾಜಕೀಯ ಪಕ್ಷಗಳಿಗೆ ನೀಡಿದೆ, ಮುಂದೆ ಓದಿ..

2016-17ರ ಸಾಲಿನಲ್ಲಿ 325.27 ಕೋಟಿ ರೂಪಾಯಿ

ಸೆಂಟ್ರಲ್ ಬೋರ್ಡ್ ಆಫ್ ಡೈರೆಕ್ಟ್ ಟ್ಯಾಕ್ಸ್ ಮೂಲಕ ನೊಂದಾಯಿಸಿಕೊಂಡಿರುವ 21 ಎಲೆಕ್ಟೊರಲ್ ಟ್ರಸ್ಟ್ ಗಳ ಮೂಲಕ, 2016-17ರ ಸಾಲಿನಲ್ಲಿ 325.27 ಕೋಟಿ ರೂಪಾಯಿ ವಿವಿಧ ಪಕ್ಷಗಳಿಗೆ ಹರಿದು ಬಂದಿದೆ. ಇದರಲ್ಲಿ, 290.22 ಕೋಟಿ ರೂಪಾಯಿ ಬಿಜೆಪಿ ಪಾರ್ಟಿ ಫಂಡಿಗೆ ಬಂದಿದೆ. ಕಾಂಗ್ರೆಸ್ಸಿಗೆ 16.5 ಕೋಟಿ, ಶಿರೋಮಣಿ ಅಕಾಲಿದಳಕ್ಕೆ 9 ಕೋಟಿ, ಸಮಾಜವಾದಿ ಪಕ್ಷಕ್ಕೆ 6.5 ಕೋಟಿ, ಆಮ್ ಆದ್ಮಿ ಮತ್ತು ಶಿವಸೇನೆಗೆ 1ಕೋಟಿ ದೇಣಿಗೆ ಹರಿದುಬಂದಿದೆ.