ದಿಶಾ ಒಂಬತ್ತು ವರ್ಷದ ಪುಟ್ಟ ಹುಡುಗಿ. ಓದಿನಲ್ಲೂ ಚುರುಕು. ಆದರೆ ಜನ್ಮಜಾತವಾಗಿ ಆಕೆಯಲ್ಲಿ ಕಾಣಿಸಿಕೊಂಡಿರುವ ಆರೋಗ್ಯ ಸಮಸ್ಯೆ ಆಕೆಯ ದಿನನಿತ್ಯದ ಬದುಕಿಗೂ ಅಡ್ಡಿಯಾಗುತ್ತಿದೆ. ಪುಟ್ಟ ವಯಸ್ಸಿನಲ್ಲಿಯೇ ಬೆನ್ನು ಹುರಿ ಸಮಸ್ಯೆ ಹೊಂದಿರುವ ದಿಶಾಗೆ ಈಗ ಚಿಕಿತ್ಸೆಯ ಅವಶ್ಯಕತೆ ಇದೆ.

ದಿಶಾ ಪಶ್ಚಿಮ ಬಂಗಾಳದ ಬಕುರಾದ ಕೃಷ್ಣಾನಗರ ನಿವಾಸಿಯಾಗಿದ್ದು, ಅಲ್ಲಿನ ಪ್ರಾಥಮಿಕ ಸರ್ಕಾರಿ ಶಾಲೆಯಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದಾಳೆ. ಬೆನ್ನುಹುರಿಯಲ್ಲಿ ಸಮಸ್ಯೆಯಿದ್ದರೂ ಓದಿನಲ್ಲಿ ಮುಂದಿದ್ದಾಳೆ. ಇದನ್ನು ಗಮನಿಸಿದ್ದ ಆಕೆಯ ಮುಖ್ಯ ಶಿಕ್ಷಕರು, ದಿಶಾಗೆ ಚಿಕಿತ್ಸೆ ಕೊಡಿಸುವಂತೆ ಪೋಷಕರಿಗೆ ಸಲಹೆ ನೀಡಿದ್ದಾರೆ. ಚೆನ್ನೈನಲ್ಲಿನ MIOT ಆಸ್ಪತ್ರೆಯಲ್ಲಿ ಈಕೆಗೆ ಚಿಕಿತ್ಸೆ ನೀಡಿದರೆ ಗುಣವಾಗುವುದು ಖಂಡಿತ ಎಂದು ಭರವಸೆ ನೀಡಿದ್ದಾರೆ.

ಆದರೆ ಈ ಪುಟ್ಟ ಬಾಲಕಿ ತಂದೆ ಉತ್ತಮ್ ರೈ ತರಕಾರಿ ಮಾರಿ ಜೀವನ ಸಾಗಿಸುವವರು. ಚೆನ್ನೈಗೆ ಪ್ರಯಾಣ ವೆಚ್ಚ ಭರಿಸಲೂ ಸಾಧ್ಯವಾಗದಂಥ ಸ್ಥಿತಿ ಅವರದ್ದು. ಆದರೂ ಒಮ್ಮೆ ಆಸ್ಪತ್ರೆಗೆ ಹೋಗಿ ಬರುವಂತೆ ತಿಳಿಸಿ ಮುಖ್ಯಶಿಕ್ಷಕರೇ ಪ್ರಯಾಣ ವೆಚ್ಚ ಭರಿಸಿ ಆಸ್ಪತ್ರೆಗೆ ಕಳುಹಿಸಿದ್ದಾರೆ.

MIOT ಆಸ್ಪತ್ರೆ ವೈದ್ಯರು ದಿಶಾಳನ್ನು ಪರೀಕ್ಷೆ ಮಾಡಿದ್ದು, ಆಕೆಗೆ ಕಡ್ಡಾಯವಾಗಿ ಚಿಕಿತ್ಸೆ ನೀಡಬೇಕು. ಕನಿಷ್ಠ ನಾಲ್ಕು ಹಂತಗಳಲ್ಲಿ ಶಸ್ತ್ರಚಿಕಿತ್ಸೆ ನಡೆಸಬೇಕೆಂದು ಪೋಷಕರಿಗೆ ತಿಳಿಸಿದ್ದಾರೆ. ಮಕ್ಕಳ ತಜ್ಞರ ಪರಿಶೀಲನೆಯೂ ಅವಶ್ಯಕ ಎಂದಿದ್ದಾರೆ.

ದಿಶಾಗೆ ಜನ್ಮಜಾತ ಸ್ಕೋಲಿಯಾಸಿಸ್ ಬೆನ್ನುಹುರಿ ತೊಂದರೆ ಇದ್ದು, ಬೆನ್ನುಹುರಿಯ ವಿರೂಪತೆ ಸರಿಪಡಿಸಲು ರಾಡ್‌ಗಳ ಬಳಕೆ ಮಾಡಿ ಚಿಕಿತ್ಸೆ ನಡೆಸಬೇಕೆಂದು ಹೇಳಿದ್ದಾರೆ. ಶಸ್ತ್ರಚಿಕಿತ್ಸೆ, ಐಸಿಯು, ಆಸ್ಪತ್ರೆವಾಸ, ವೈದ್ಯರ ಭೇಟಿ ಹಾಗೂ ಔಷಧಿಗಳು ಒಳಗೊಂಡಂತೆ 4,50,000ರೂ ವೆಚ್ಚವಾಗಬಹುದು ಎಂದು ಅಂದಾಜಿಸಿದ್ದಾರೆ.

ತರಕಾರಿ ಮಾರಿ ಜೀವನ ಸಾಗಿಸುತ್ತಿರುವ ಪೋಷಕರ ಬಳಿ ಅಷ್ಟು ಹಣ ಹೊಂದಿಸಲು ಸಾಧ್ಯವೇ ಇಲ್ಲ. ಹೀಗಾಗಿ ಚಿಕಿತ್ಸೆಗೆ ದಾರಿ ಕಾಣದೇ ತಮ್ಮ ಹಳ್ಳಿಗೆ ಹಿಂದಿರುಗಿದ್ದಾರೆ. ಆದರೆ ಈ ಪೋಷಕರಿಗೆ ನಿಮ್ಮ ನೆರವೇ ಆಶಾಕಿರಣವಾಗಬಹುದು. ಈ ಪುಟ್ಟ ಹುಡುಗಿಯ ಸಮಸ್ಯೆ ನಿಮ್ಮ ಸಹಾಯದಿಂದ ಕೊನೆಯಾಗಬಹುದು...