ಭಾರತದ ಏಳು ಮಾರ್ಗದಲ್ಲಿ ಸಂಚರಿಸಲಿದೆ ಬುಲೆಟ್ ಟ್ರೈನ್
ನವದೆಹಲಿ, ಸೆಪ್ಟೆಂಬರ್ 14 : ಭಾರತದ ಬಹು ನಿರೀಕ್ಷೆಯ ಮುಂಬೈ-ಅಹಮದಾಬಾದ್ ನಡುವಿನ ಬುಲೆಟ್ ರೈಲು ಯೋಜನೆ ಕೋವಿಡ್ ಕಾರಣದಿಂದಾಗಿ ವಿಳಂಬವಾಗುತ್ತಿದೆ. ಕೇಂದ್ರ ಸರ್ಕಾರ ಇನ್ನೂ 7 ಬುಲೆಟ್ ರೈಲು ಯೋಜನೆಯನ್ನು ರೂಪಿಸುತ್ತಿದೆ.
ಒಟ್ಟು ಏಳು ಬುಲೆಟ್ ಟ್ರೈನ್ ಯೋಜನೆಗೆ ಸುಮಾರು 10 ಟ್ರಿಲಿಯನ್ ವೆಚ್ಚವಾಗಲಿದೆ ಎಂದು ಬ್ಯುಸಿನೆಸ್ ಸ್ಟಾಂಡರ್ಡ್ ವರದಿ ಮಾಡಿದೆ. ಏಳು ಮಾರ್ಗ ಸೇರಿ ಸುಮಾರು 4,869 ಕಿ.ಮೀ. ಮಾರ್ಗದಲ್ಲಿ ರೈಲು ಸಂಚರಿಸಲಿದೆ.
ದೆಹಲಿ-ವಾರಣಾಸಿ, ಮುಂಬೈ-ನಾಗ್ಪುರ, ದೆಹಲಿ-ಅಹಮದಾಬಾದ್, ಚೆನ್ನೈ-ಮೈಸೂರು, ದೆಹಲಿ-ಅಮೃತಸರ, ಮುಂಬೈ-ಹೈದರಾಬಾದ್ ಮತ್ತು ವಾರಣಾಸಿ-ಹೌರಾ ಮಾರ್ಗದಲ್ಲಿ ಬುಲೆಟ್ ರೈಲು ಓಡಲಿದೆ.
"ಸರ್ಕಾರ ಏಳು ಮಾರ್ಗದ ಡಿಪಿಆರ್ ಸಿದ್ಧಪಡಿಸಲು ಸೂಚನೆ ನೀಡಿದೆ. ಯೋಜನೆಯ ವೆಚ್ಚ ಎಷ್ಟಾಗಬಹುದು ಎಂದು ವರದಿ ಬಳಿಕ ಅಂತಿಮವಾಗಲಿದೆ" ಎಂದು ರಾಷ್ಟ್ರೀಯ ಹೈಸ್ಪೀಡ್ ರೈಲು ನಿಗಮ ಹೇಳಿದೆ.
ಜಪಾನ್ ತಂತ್ರಜ್ಞಾನದ ನೆರವಿನಿಂದ ಮುಂಬೈ-ಅಹಮದಾಬಾದ್ ಹೈಸ್ಪೀಡ್ ರೈಲು ಯೋಜನೆ ಜಾರಿಗೊಳಿಸಲಾಗುತ್ತಿದೆ. ಆದರೆ, ಎಲ್ಲಾ ಯೋಜನೆಗಳನ್ನು ಇದೇ ಮಾದರಿಯಲ್ಲಿ ಮಾಡುವುದಿಲ್ಲ. ಮಾರ್ಗಗಳಿಗೆ ಅನುಗುಣವಾಗಿ ಯೋಜನಾ ವೆಚ್ಚ ಬದಲಾವಣೆಯಾಗಲಿದೆ.
ಭಾರತದಲ್ಲಿ ಮೊದಲು ಘೋಷಣೆ ಮಾಡಿದ ಹೈಸ್ಪೀಡ್ ರೈಲು ಯೋಜನೆ ಮುಂಬೈ-ಅಹಮದಾಬದ್. ಆದರೆ, ಟೆಂಡರ್ ಪ್ರಕ್ರಿಯೆ, ಭೂ ಸ್ವಾಧೀನ ಕೋವಿಡ್ ಕಾರಣದಿಂದಾಗಿ ವಿಳಂಬವಾಗಿದೆ. 2028ರಲ್ಲಿ ಈ ಯೋಜನೆ ಪೂರ್ಣಗೊಳ್ಳುವ ನಿರೀಕ್ಷೆ ಇದೆ.
ಎನ್ಹೆಚ್ಎಸ್ಆರ್ಸಿಎಲ್ ಈಗಾಗಲೇ ಈ ಯೋಜನೆಗಾಗಿ ಶೇ 77ರಷ್ಟು ಭೂಮಿಯನ್ನು ಗುಜರಾತ್ನಲ್ಲಿ ಸ್ವಾಧೀನಪಡಿಸಿಕೊಂಡಿದೆ. ಶೇ 80ರಷ್ಟನ್ನು ದಾದ್ರಾ ಮತ್ತು ನಗರ ಹವೇಲಿಯಲ್ಲಿ ಮತ್ತು ಶೇ 22ರಷ್ಟು ಭೂಮಿಯನ್ನು ಮಹಾರಾಷ್ಟ್ರದಲ್ಲಿ ವಶಕ್ಕೆ ತೆಗೆದುಕೊಳ್ಳಲಾಗಿದೆ.
Click it and Unblock the Notifications
Sign in with Google