ಸೆಪ್ಟೆಂಬರ್ ತಿಂಗಳಿನಲ್ಲಿ 95,480 ಕೋಟಿ GST ಸಂಗ್ರಹ: ಶೇ. 4ರಷ್ಟು ಏರಿಕೆ
ನವದೆಹಲಿ, ಅಕ್ಟೋಬರ್ 02: ದೇಶಾದ್ಯಂತ ಸಾಂಕ್ರಾಮಿಕ ರೋಗ ಪ್ರೇರಿತ ಲಾಕ್ಡೌನ್ ಸಡಿಲಿಕೆ ಬಳಿಕ ಉದ್ಯಮ ಚಟುವಟಿಗಳಿಗೆ ನಿಧಾನಗತಿಯಲ್ಲಿ ಚೇತರಿಸಿಕೊಳ್ಳುತ್ತಿದ್ದು, ಜಿಎಸ್ಟಿ ಆದಾಯವು ಕೂಡ ಚೇತರಿಕೊಂಡು ಸೆಪ್ಟೆಂಬರ್ ತಿಂಗಳಲ್ಲಿ ಶೇ. 4ರಷ್ಟು ಏರಿಕೆ ದಾಖಲಿಸಿದೆ.
ಕಳೆದ ಸೆಪ್ಟೆಂಬರ್ ತಿಂಗಳಲ್ಲಿ 95,480 ಕೋಟಿ ರುಪಾಯಿ ಜಿಎಸ್ ಟಿ ಸಂಗ್ರಹವಾಗಿದೆ. ಈ ವರ್ಷದ ಮಾರ್ಚ್ ತಿಂಗಳಲ್ಲಿ ಲಾಕ್ ಡೌನ್ ಆರಂಭವಾದ ನಂತರ ಸಂಗ್ರಹವಾದ ಅತಿ ದೊಡ್ಡ ಮೊತ್ತ ಇದಾಗಿದೆ. ಕಳೆದ ಆಗಸ್ಟ್ ಗೆ ಹೋಲಿಸಿದರೆ ಶೇ. 10.4ರಷ್ಟು ಹಾಗೂ ಕಳೆದ ವರ್ಷದ ಸೆಪ್ಟೆಂಬರ್ ಗೆ ಹೋಲಿಸಿದರೆ ಶೇ. 4ರಷ್ಟು ಹೆಚ್ಚಳವಾಗಿದೆ ಎಂದು ಹಣಕಾಸು ಸಚಿವಾಲಯ ಪ್ರಕಟಣೆಯಲ್ಲಿ ತಿಳಿಸಿದೆ.
GST ವಾರ್ಷಿಕ ವಿವರ ಸಲ್ಲಿಕೆ ಗಡುವು 1 ತಿಂಗಳ ಮಟ್ಟಿಗೆ ಮುಂದೂಡಿಕೆ
ಒಟ್ಟು ಸಂಗ್ರಹದಲ್ಲಿ ಕೇಂದ್ರ ಸರಕು ಮತ್ತು ಸೇವಾ ತೆರಿಗೆ(ಸಿಜಿಎಸ್ಟಿ) 17,741 ಕೋಟಿ ರೂ, ರಾಜ್ಯ ಸರಕು ಮತ್ತು ಸೇವಾ ತೆರಿಗೆ (ಎಸ್ಜಿಎಸ್ಟಿ) 23,131 ಕೋಟಿ ರೂ., ಸಮಗ್ರ ಸರಕು ಮತ್ತು ಸೇವಾ ತೆರಿಗೆ (ಐಜಿಎಸ್ಟಿ) 47,484 ಕೋಟಿ ರೂ. (ಆಮದು ಮೇಲೆ ಸಂಗ್ರಹಿಸಿದ 22,442 ಕೋಟಿ ರೂ. ಸರಕುಗಳ) ಮತ್ತು ಸೆಸ್ 7,124 ಕೋಟಿ ರೂ. ಸಂಗ್ರಹವಾಗಿದೆ.
ಮಹಾರಾಷ್ಟ್ರ ಜಿಎಸ್ಟಿ ಸಂಗ್ರಹದಲ್ಲಿ ಅಗ್ರಸ್ಥಾನದಲ್ಲಿದ್ದು 13,546 ಕೋಟಿ ರೂ. ಸಂಗ್ರಹಿಸಿದ್ದು, ನಂತರದ ಸ್ಥಾನದಲ್ಲಿ ತಮಿಳುನಾಡು 6,454 ಕೋಟಿ ರೂ. , ಗುಜರಾತ್ ನಲ್ಲಿ 6,090 ಕೋಟಿ ರೂ., ಕರ್ನಾಟಕದಲ್ಲಿ 6,050ಕೋಟಿ ರೂ. ಸಂಗ್ರಹವಾಗಿದೆ.