ಮಾತಿನಂತೆ ವೇತನ ನೀಡಲಾಗದೆ ಕಾಲಾವಕಾಶ ಕೇಳಿದ ಜೆಟ್ ಏರ್ ವೇಸ್
ಜೆಟ್ ಏರ್ ವೇಸ್ ವಿಮಾನ ಯಾನ ಸಂಸ್ಥೆಗೆ ಸಿಬ್ಬಂದಿ ವೇತನ ಪಾವತಿಸಲು ಮತ್ತೊಮ್ಮೆ ಸಾಧ್ಯವಾಗಿಲ್ಲ. ಸೆಪ್ಟೆಂಬರ್ ತಿಂಗಳ ಆರಂಭದಲ್ಲೇ ಬಾಕಿ ಉಳಿಸಿಕೊಂಡ ಶೇಕಡಾ 50ರಷ್ಟು ವೇತನ ಪಾವತಿಗೆ ಇನ್ನೂ 10 ದಿನ ಸಮಯಾವಕಾಶ ಕೋರಿದೆ. ಮೊದಲ 50ರಷ್ಟು ವೇತನವನ್ನು ಸಂಸ್ಥೆಯು ಸೆಪ್ಟೆಂಬರ್ 11ರಂದು ಪಾವತಿಸಿತ್ತು. 26ನೇ ತಾರೀಕು ಬಾಕಿ ವೇತನ ಪಾವತಿಸುವುದಾಗಿ ತಿಳಿಸಿತ್ತು.
ಸೆಪ್ಟೆಂಬರ್ ಆರಂಭದಲ್ಲೇ ಈ ರೀತಿಯ ಪರಿಸ್ಥಿತಿಯನ್ನು ನವೆಂಬರ್ ತನಕ ಎದುರಿಸಬೇಕಾಗುತ್ತದೆ ಎಂದು ಜೆಟ್ ಏರ್ ವೇಸ್ ತಿಳಿಸಿತ್ತು. ಬುಧವಾರ ಸಿಬ್ಬಂದಿಗೆ ಇ ಮೇಲ್ ಕಳಿಸಲಾಗಿದ್ದು, ಇಂದು ಪಾವತಿಸಬೇಕಿದ್ದ ಬಾಕಿ ವೇತನವನ್ನು ಅಕ್ಟೋಬರ್ 9, 2018ರಂದು ನೀಡುವುದಾಗಿ ಹೇಳಲಾಗಿದೆ.
ಸಾವಿರಾರು ಕೋಟಿ ನಷ್ಟದಲ್ಲಿ ವಿಮಾನಯಾನ ಸಂಸ್ಥೆಗಳು
ಅಂದ ಹಾಗೆ ಜೆಟ್ ಏರ್ ವೇಸ್ ನ ಆರ್ಥಿಕ ಪರಿಸ್ಥಿತಿಯು ಬಹಳ ಕೆಟ್ಟದಾಗಿದೆ. ಸಂಸ್ಥೆಯ ಕಾರ್ಯಚಟುವಟಿಕೆಗೆ ಹಣ ಹೊಂದಿಸಲು ಸಹ ಕಷ್ಟ ಆಗುತ್ತಿದೆ. ಮೊದಲಿಗೆ ಸಿಬ್ಬಂದಿಯ ವೇತನದಲ್ಲಿ ಕಡಿತ ಮಾಡಲು ಸಂಸ್ಥೆಯು ಮುಂದಾಗಿತ್ತು. ಅದಕ್ಕೆ ಭಾರೀ ವಿರೋಧ ವ್ಯಕ್ತವಾಯಿತು. ನಂತರ ಆ ಆಲೋಚನೆಯನ್ನು ಸಂಸ್ಥೆಯು ಮುಂದಕ್ಕೆ ಹಾಕಿತು.