ದೀಪಾವಳಿ; ಬೆಂಗಳೂರು ನಗರದಲ್ಲಿ ವಾಯು ಮಾಲಿನ್ಯ ಕಡಿಮೆ

ಬೆಂಗಳೂರು, ನವೆಂಬರ್ 18 : ದೀಪಾವಳಿಯ ಮೂರು ದಿನಗಳಲ್ಲಿ ಬೆಂಗಳೂರು ನಗರದಲ್ಲಿ ವಾಯು ಮಾಲಿನ್ಯದ ಪ್ರಮಾಣ ಗಣನೀಯವಾಗಿ ಕಡಿಮೆಯಾಗಿದೆ. 2019ಕ್ಕೆ ಹೋಲಿಕೆ ಮಾಡಿದರೆ ಶೇ 30.34ರಷ್ಟು ಮಾಲಿನ್ಯ ಪ್ರಮಾಣ ತಗ್ಗಿದೆ.

ಕರ್ನಾಟಕ ಮಾಲಿನ್ಯ ನಿಯಂತ್ರಣ ಮಂಡಳಿ ಈ ಕುರಿತ ಅಂಕಿ ಅಂಶಗಳನ್ನು ನೀಡಿದೆ. ನವೆಂಬರ್ 14 ರಿಂದ 16ರ ತನಕ ನಗರದಲ್ಲಿ ಎಕ್ಯುಐ (ವಾಯು ಗುಣಮಟ್ಟ ಸೂಚ್ಯಾಂಕ)ವನ್ನು ಮಾಲಿನ್ಯ ನಿಯಂತ್ರಣ ಮಂಡಳಿ ಅಧ್ಯಯನ ನಡೆಸಿದೆ.

ನಗರದಲ್ಲಿನ 7 ಅಧ್ಯಯನ ಕೇಂದ್ರದಲ್ಲಿ ವಾಯು ಮಾಲಿನ್ಯದ ಪ್ರಮಾಣವನ್ನು ಅಂದಾಜಿಸಲಾಗಿದೆ. ನಗರ ರೈಲು ನಿಲ್ದಾಣದಲ್ಲಿ ನವೆಂಬರ್ 9ರಂದು 82ರಷ್ಟು, ನ.14ರಿಂದ 16ರ ತನಕ ಶೇ 77ರಷ್ಟು ಮಾಲಿನ್ಯ ಪ್ರಮಾಣ ದಾಖಲಾಗಿದೆ. 2019ರ ದೀಪಾವಳಿ ಸಂದರ್ಭದಲ್ಲಿ 111 ರಷ್ಟು ಮಾಲಿನ್ಯ ದಾಖಲಾಗಿತ್ತು.

ಎಸ್‌. ಜಿ. ಹಳ್ಳಿಯಲ್ಲಿ 2019ರಲ್ಲಿ ಶೇ 85ರಷ್ಟು, ಈ ವರ್ಷ ಶೇ 39ರಷ್ಟು ಮಾಲಿನ್ಯ ಪ್ರಮಾಣ ದಾಖಲಾಗಿದೆ. ಜಯನಗರ 5ನೇ ಬ್ಲಾಕ್‌ನಲ್ಲಿ 2019ರಲ್ಲಿ 90, 2020ರಲ್ಲಿ 64ರಷ್ಟು ಮಾಲಿನ್ಯ ದಾಖಲಾಗಿದೆ.

ನಿಮ್ಹಾನ್ಸ್‌ನಲ್ಲಿ ಕಳೆದ ವರ್ಷ 69ರಷ್ಟು, ಈ ವರ್ಷ 61ರಷ್ಟು ಪ್ರಮಾಣ, ಸೆಂಟ್ರಲ್ ಸಿಲ್ಕ್ ಬೋರ್ಡ್‌ನಲ್ಲಿ 2019ರಲ್ಲಿ 67ರಷ್ಟು, ಈ ವರ್ಷ ಶೇ 43ರಷ್ಟು ಮಾಲಿನ್ಯ ಪ್ರಮಾಣ ದಾಖಲಾಗಿದೆ ಎಂದು ಮಂಡಳಿ ಹೇಳಿದೆ.

English summary

Air pollution in Bengaluru city during the three days of Deepavali fell by 30.34 per cent.