ಬೆಂಗಳೂರಿನಲ್ಲಿ ಎಟಿಎಂ ಮೋಸದ ಜಾಲ ಪತ್ತೆ, ಲಕ್ಷಾಂತರ ಹಣ ಗುಳುಂ
ಬೆಂಗಳೂರು, ಜುಲೈ 05 : ಜಿಎಸ್ಟಿ ಕೃಪೆಯಿಂದಾಗಿ ಹಲವಾರು ತೆರಿಗೆ ದರಗಳು ಏರಿಳಿತ ಕಂಡು ನಾಗರಿಕ ಕಂಗಾಲಾಗಿರುವ ಹೊತ್ತಿನಲ್ಲಿ ಹಣಕಾಸಿಗೆ ಸಂಬಂಧಿಸಿದಂತೆ ಮತ್ತೊಂದು ಸಂಕಷ್ಟದಲ್ಲಿ ಬೆಂಗಳೂರಿನ ಶ್ರೀಸಾಮಾನ್ಯ ಸಿಲುಕಿದ್ದಾನೆ.
ಅದು ಎಟಿಎಂ ಮೋಸ. ಕೆಲವೊಂದು ಎಟಿಎಂಗಳಲ್ಲಿ ನಟೋರಿಯಸ್ ಗ್ಯಾಂಗ್ ವೊಂದು ಎಟಿಎಂಗಳಲ್ಲಿ, ಡೆಬಿಟ್ ಮತ್ತು ಕ್ರೆಡಿಟ್ ಕಾರ್ಡ್ ಗಳಿಂದ ಮಾಹಿತಿಯನ್ನು ಕದಿಯುವಂಥ ಆಧುನಿಕ ಹಾರ್ಡ್ ವೇರ್ (ಸ್ಕಿಮ್ಮರ್ಸ್) ಇನ್ ಸ್ಟಾಲ್ ಮಾಡಿದೆ ಎಂದು ಬೆಂಗಳೂರು ಪೊಲೀಸರು ಶಂಕೆ ವ್ಯಕ್ತಪಡಿಸಿದ್ದಾರೆ.
ಹೀಗೆ ಶಂಕೆ ವ್ಯಕ್ತಪಡಿಸಲು ಕಾರಣ, ಬೆಂಗಳೂರಿನ 200ಕ್ಕೂ ಹೆಚ್ಚು ನಾಗರಿಕರು, ಕಳೆದ ಒಂದು ವಾರದಲ್ಲಿ 10 ಲಕ್ಷ ರುಪಾಯಿಗೂ ಹೆಚ್ಚು ಹಣವನ್ನು ಈ ಮೋಸದ ಜಾಲದಿಂದ ಕಳೆದುಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಎಲ್ಲ ಎಟಿಎಂಗಳಲ್ಲಿ ಸಿಸಿಟಿವಿಗಳನ್ನು ಅಳವಡಿಸಲಾಗಿದ್ದರೂ ಇಷ್ಟೊಂದು ಹಣವನ್ನು ಕದಿಯಲು ಹೇಗೆ ಸಾಧ್ಯ ಎಂಬುದು ಚಿದಂಬರ ರಹಸ್ಯವಾಗಿದೆ. ಮೋಸ ಹೋದವರಿಂದ ಸೈಬರ್ ಕ್ರೈಂ ಇಲಾಖೆಗೆ ಈಗಾಗಲೆ ಹಲವಾರು ದೂರುಗಳು ಬಂದಿವೆ.
ನಾವು ಮೋಸ ಹೋಗುತ್ತಿದ್ದೇವೆ ಎಂದು ತಿಳಿಯುವುದು ಹೇಗೆ? ಮೋಸವಾಗುತ್ತಿರುವುದನ್ನು ಶ್ರೀಸಾಮಾನ್ಯರು ಪತ್ತೆ ಹಚ್ಚುವುದು ಹೇಗೆ? ಈಗ ಕಳೆದುಕೊಂಡಿರುವ ಹಣವನ್ನು ವಾಪಸ್ ಪಡೆಯುವುದು ಹೇಗೆ? ಸ್ಕಿಮ್ಮರ್ಸ್ ಎಂದರೇನು? ಅದರ ಬಗ್ಗೆ ಹೆಚ್ಚು ತಿಳಿವಳಿಕೆ ಕೊಡಿ ಎಂದು ಪೊಲೀಸರನ್ನು ಕೇಳುತ್ತಿದ್ದಾರೆ.
ರಜಿತ್ ಎಂಬುವವರ ಡೆಬಿಟ್ ಕಾರ್ಡ್ ನಿಂದ 30 ಸಾವಿರ ರುಪಾಯಿ ಲಪಟಾಯಿಸಲಾಗಿದೆ. ತನ್ನ ಬಳಿಯೇ ಡೆಬಿಟ್ ಕಾರ್ಡ್ ಇದ್ದು, ಯಾರೊಂದಿಗೂ ಟಿಪಿನ್ ಶೇರ್ ಮಾಡಿಕೊಂಡಿರದಿದ್ದರೂ ಹೇಗೆ ಕದಿಯಲು ಸಾಧ್ಯವಾಯಿತು ಎಂದು ಅವರು ಪ್ರಶ್ನಿಸಿದ್ದಾರೆ.
Kindly be aware of SKIMMERS (additional hardware to thieve all details of your Credit/Debit cards) that may be mounted on ATM machines. pic.twitter.com/bXcF01a7JG
— S Ravi, IPS (@AddlCPCrime) July 4, 2017
ಮತ್ತೊಬ್ಬರು, ನಿನ್ನೆ ನನ್ನ ಕ್ರೆಡಿಟ್ ಕಾರ್ಡ್ ಬಳಸಿ ಎರಡು ವಹಿವಾಟು ಮಾಡಲಾಗಿದೆ. ಓಟಿಪಿ ಇಲ್ಲದೆ ಕ್ರೆಡಿಟ್ ಕಾರ್ಡ್ ಟ್ರಾನ್ಸಾಕ್ಷನ್ ಮಾಡಲು ಹೇಗೆ ಸಾಧ್ಯ? ಎಂದು ಪ್ರಶ್ನಿಸಿದ್ದಕ್ಕೆ, ಅಮೆರಿಕದಲ್ಲಿ ಕ್ರೆಡಿಟ್ ಕಾರ್ಡ್ ವಹಿವಾಟು ಮಾಡಲು ಓಟಿಪಿ ಬೇಕಾಗಿಲ್ಲ ಎಂದು ಮಗದೊಬ್ಬರು ಉತ್ತರಿಸಿದ್ದಾರೆ.
Recommended Video
ಒಟ್ಟಿನಲ್ಲಿ ಈ ಪ್ರಕರಣಗಳು ಪೊಲೀಸರಿಗೆ ಮಾತ್ರವಲ್ಲ ಬ್ಯಾಂಕಿನವರಿಗೂ ಕೂಡ ತಲೆನೋವಾಗಿ ಪರಿಣಮಿಸಿದೆ. ಸೈಬರ್ ಕ್ರೈಂ ತಜ್ಞರ ಸಹಾಯದಿಂದ ಬ್ಯಾಂಕಿನವರು ಕೂಡಲೆ ಇದರ ಮೂಲವನ್ನು ಪತ್ತೆ ಹಚ್ಚುವುದರಿಂದ ಮತ್ತಷ್ಟು ಮೋಸಗಳನ್ನು ತಡೆಯಬಹುದು.
Click it and Unblock the Notifications
Sign in with Google