ಶಿಕ್ಷಕನನ್ನು ಬೆಂಕಿಗೆ ಹಾಕಿ ಸುಟ್ಟ ಸಹ ಶಿಕ್ಷಕರು

ಪೂರ್ನಿಯಾ, ಮೇ 29: ಬಿಹಾರದಲ್ಲಿ ಮತ್ತೊಂದು ಅಮಾನವೀಯ ಘಟನೆ ವರದಿಯಾಗಿದೆ. ಇಲ್ಲಿನ ಶಾಲಾ ಆವರಣದಲ್ಲಿಯೇ ಶಿಕ್ಷಕನೊಬ್ಬನನ್ನು ಆತನ ಸಹೋದ್ಯೋಗಿಗಳೇ ಜೀವಂತವಾಗಿ ದಹಿಸಿದ್ದಾರೆ.

ಪೊರ್ನಿಯಾ ಜಿಲ್ಲೆಯ ಮಾರಾಂಗ ಪೊಲೀಸ್ ಠಾಣೆ ವ್ಯಾಪ್ತಿಯ ಶಾಲೆಯೊಂದರಲ್ಲಿ ಪ್ರಿನ್ಸಿಪಾಲ್ ಹಾಗೂ ಶಿಕ್ಷಕರು ತಮ್ಮ ಸಹೋದ್ಯೋಗಿ ರಂಜಿತ್ ಕುಮಾರ್ (40) ಅವರನ್ನು ಶೌಚಾಲಯಕ್ಕೆ ಎಳೆದೊಯ್ದು, ಕೈ-ಕಾಲು ಕಟ್ಟಿ, ಅವರ ಮೇಲೆ ಸೀಮೆಎಣ್ಣೆ ಸುರಿದು ಬೆಂಕಿ ಹಚ್ಚಿತೆಂದು ಸ್ಥಳೀಯರು ನೀಡಿದ ಮಾಹಿತಿಯನ್ನಾಧರಿಸಿ ಜಿಲ್ಲಾ ಪೊಲೀಸ್ ಅಧೀಕ್ಷಕ ಕಿಮ್ ತಿಳಿಸಿದ್ದಾರೆ.

ಸೋಮವಾರ ಬೆಳಗ್ಗೆ ವಿದ್ಯಾರ್ಥಿಗಳು ಶಾಲೆಗೆ ಆಗಮಿಸುವ ಮುನ್ನವೇ ಈ ಬರ್ಬರ ಘಟನೆ ನಡೆದಿರುವುದಾಗಿ ಅವರು ಹೇಳಿದ್ದಾರೆ. ಜೀವಂತವಾಗಿ ದಹಿಸಲ್ಪಟ್ಟ ಶಿಕ್ಷಕನ ಆಕ್ರಂದನ ಕೇಳಿದ ನೆರೆಹೊರೆಯವರು ಸ್ಥಳಕ್ಕೆ ಧಾವಿಸಿ, ಅತನನ್ನು ರಕ್ಷಿಸಿ ಕಟಿಹಾರ್ ಜಿಲ್ಲಾಸ್ಪತ್ರೆಗೆ ಕೊಂಡೊಯ್ದರು. ಆದರೆ ಗಂಭೀರ ಸುಟ್ಟಗಾಯಗಳಿಂದ ಶಿಕ್ಷಕ ರಂಜಿತ್ ಕೊನೆಯುಸಿರೆಳೆದರೆಂದು ಎಸ್‌ಪಿ ಕಿಮ್ ತಿಳಿಸಿದ್ದಾರೆ.

ಈ ಘಟನೆಗೆ ಕಾರಣವೇನೆಂಬುದು ಇನ್ನೂ ತಿಳಿದುಬಂದಿಲ್ಲ. ತಲೆಮರೆಸಿಕೊಂಡಿರುವ ಆರೋಪಿಗಳಿಗಾಗಿ ಪೊಲೀಸರು ಶೋಧ ಕಾರ್ಯವನ್ನು ನಡೆಸಿದ್ದಾರೆ.

English summary

In a horrific incident in Purnia in Bihar, school teacher Ranjit Kumar (40) was burnt alive by his colleagues inside the school premises on Monday. The reason behind the ghastly incident is yet to be known. The attackers are absconding since the incident and the police have launched a search for them.