ಜೋಗದ ಗುಂಡಿಯಲ್ಲಿ ಜಾರಿಬಿದ್ದ ಚಿತ್ರದುರ್ಗ ಕೋತಿರಾಜ

ಜೋಗ (ಶಿವಮೊಗ್ಗ), ಏ.6: ಕೋತಿ ರಾಜ ಮತ್ತೆ ತನ್ನ ಅಭಿಮಾನಿಗಳಿಗೆ ಮತ್ತೊಮ್ಮೆ ಆಘಾತವನ್ನುಂಟುಮಾಡಿದ್ದಾನೆ. ಈ ಬಾರಿ ಜೋಗದ ಗುಂಡಿಯಲ್ಲಿ ಜಾರಿಬಿದ್ದ ಕೋತಿರಾಜ್ ಅಭಿಮಾನಿಗಳಲ್ಲಿ ತೀವ್ರ ಆತಂಕ ಮೂಡಿಸಿದ್ದಾರೆ.

ಚಿತ್ರದುರ್ಗ ಕೋಟೆಕೊತ್ತಲೆಗಳನ್ನು ಬರಿಗೈ, ಬರಿಗಾಲಲ್ಲಿ ಹತ್ತಿಳಿಯುವ ಜ್ಯೋತಿರಾಜ ಅಲಿಯಾಸ್ ಕೋತಿರಾಜ ಇತ್ತೀಚೆಗೆ ಶಿವಮೊಗ್ಗದ ಸುತ್ತಮುತ್ತ ತನ್ನ ಸಾಹಸಗಳನ್ನು ಪ್ರದರ್ಶಿಸುತ್ತಿದ್ದ. ಹಾಗಿರುವಾಗ ಇಂದು ಶನಿವಾರ ಬೆಳಗ್ಗೆ 12 ಗಂಟೆಯಲ್ಲಿ ಜೋಗ್ ಫಾಲ್ಸ್ ನಲ್ಲಿಯೂ ತನ್ನ ತಾಕತ್ತನ್ನು ಪ್ರದರ್ಶಿಸಲು ಮುಂದಾಗಿದ್ದಾನೆ.

ಹಾಗಿರುವಾಗ ಜೋಗ್ ಫಾಲ್ಸ್ ಗುಂಡಿಗೆ ಇಳಿದು ಅಲ್ಲಿಂದ ಮೇಲಕ್ಕೆ ನೀರಿನ ಹಾದಿಯಲ್ಲಿ (ಸದ್ಯಕ್ಕೆ ಜೋಗ ಖಾಲಿಯಾಗಿದೆ) ಹತ್ತಲು ಯತ್ನಿಸಿದ್ದಾನೆ. ಸುಮಾರು 20 ಅಡಿ ಮೇಲಕ್ಕೆ ಹತ್ತಿದ್ದಾನೆ.

ಕೋತಿರಾಜನ ಸಾಹಸವನ್ನು ಕಂಡು ಜನ ಚಪ್ಪಾಳೆ ತಟ್ಟುತ್ತಿರುವಾಗಲೇ ತಪ್ಪು ಹೆಜ್ಜೆ ಹಾಕಿದ್ದಾನೆ ಕೋತಿ. ಸರಿಯಾಗಿ ಕೆಳಗೆ ಉರುಳಿಬಿದ್ದಿದ್ದಾನೆ. ಇದರಿಂದ ಆತನ ಬೆನ್ನುಮೂಳೆಗೆ ಭಾರಿ ಪೆಟ್ಟು ಬಿದ್ದಿದೆ. ತಲೆಗೆ ಸಹ ಪೆಟ್ಟು ಬಿದ್ದಿದೆ. ತಕ್ಷಣ ಆತನನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಹೆಚ್ಚಿನ ಚಿಕತ್ಸೆಗಾಗಿ ಶಿವಮೊಗ್ಗದ ಆಸ್ಪತ್ರೆಗೆ ದಾಖಲಿಸುವ ಪ್ರಯತ್ನ ನಡೆಸಲಾಗಿದೆ.

ಕೋತಿರಾಜ್, ಹೀಗೆ ಮತ್ತೊಮ್ಮೆ ಪೆಟ್ಟು ಮಾಡಿಕೊಂಡಿರುವುದನ್ನು ಕೇಳಿ ಜನ ಬಾರಿ ಆತಂಕ/ನಿರಾಶೆಗೊಳಗಾಗಿದ್ದಾರೆ. ಇದೇ ವೇಳೆ ಕೋತಿರಾಜ್ ಶೀಘ್ರ ಗುಣಮುಖವಾಗಲಿ ಎಂದು ಹಾರೈಸಿದ್ದಾರೆ.

English summary

Jyothi Raj aka (Kothi Raj) of Chitradurga fort fame is yet again injured in Jog Falls in Shivamoga today April 6.