ಅತಿ ಹೆಚ್ಚು ಪ್ರಯಾಣಿಕರ ವಿಮಾನ ಕಂಪನಿ ಯಾವುದು?

By Srinath

Published: Tuesday, April 2, 2013, 8:56 [IST]

ಬೆಂಗಳೂರು: ಭಾರತದ ಅತಿ ದೊಡ್ಡ ವಿಮಾನಯಾನ ಕಂಪನಿಗಳು ಯಾವುವು ಎಂದು ತಿಳಿದುಕೊಳ್ಳುವ ಕುತೂಹಲವಿದೆಯಾ? ಅದಕ್ಕೂ ಮುನ್ನ, ದೇಶೀಯ ಸ್ತರದಲ್ಲಿ ವಿಮಾನ ಯಾನದ ಸ್ಥಿತಿಗತಿಯತ್ತ ಒಂದು ಸ್ಥೂಲ ನೋಟ. ಪ್ರಸಕ್ತ ಸಾಲಿನ ಮೊದಲೆರಡು ತಿಂಗಳಲ್ಲಿ ವಿಮಾನ ಪ್ರಯಾಣಿಕರ ಸಂಖ್ಯೆ ಕಳೆದ ವರ್ಷಕ್ಕೆ ಹೋಲಿಸಿದಲ್ಲಿ ಶೇ. 3.57ರಷ್ಟು ಕುಸಿದಿದೆ.

ಅಧಿಕೃತ ಮಾಹಿತಿ ಪ್ರಕಾರ 2013ರ ಜನವರಿ ಫೆಬ್ರವರಿಯಲ್ಲಿ ಒಟ್ಟು 100.23 ಲಕ್ಷ ಮಂದಿ ವಿಮಾನ ಯಾನ ಮಾಡಿದ್ದಾರೆ. ಕಳೆದ ವರ್ಷ ಈ ಎರಡು ತಿಂಗಳಲ್ಲಿ 103.95 ಲಕ್ಷ ಮಂದಿ ಸಂಚರಿಸಿದ್ದರು. ಅಂದರೆ ವಿಮಾನ ಪ್ರಯಾಣಿಕರ ಸಂಖ್ಯೆ ಶೇ. 3.57 ರಷ್ಟು ಕುಸಿದಿದೆ.

ಇದಕ್ಕೆ ಮುಖ್ಯವಾಗಿ ಕಾರಣವಾಗಿರುವುದು ಕಿಂಗ್ ಫಿಶರ್ ಏರ್ ಲೈನ್ಸ್ ಸಂಚಾರ ಸ್ಥಗಿತಗೊಳಿಸಿರುವುದು. ಕಿಂಗ್ ಫಿಶರ್ ಏರ್ ಲೈನ್ಸ್ ಸಂಸ್ಥೆಯ 25 ವಿಮಾನಗಳು ಹಾರಾಟ ಸ್ಥಗಿತಗೊಂಡಿವೆ ಎಂಬುದು ಗಮನಾರ್ಹ.

ಅಗ್ರ ಸ್ಥಾನದಲ್ಲಿ ಇಂಡಿಗೋ ಸಂಸ್ಥೆಯಿದೆ. ಶೇ. 27.4 ರಷ್ಟು ಮಾರುಕಟ್ಟೆ ಪಾಲು ಪಡೆದಿದೆ. ಜತೆಗೆ ಈ ಸಂಸ್ಥೆಯ ವಿಮಾನಗಳಲ್ಲಿ ತಲಾ ಶೇ. 85ರಷ್ಟು ಸೀಟುಗಳು ಸದಾ ಭರ್ತಿಯಾಗಿರುತ್ತವೆ.