ಸುನಿತಾಗೆ ಅಂತರಿಕ್ಷದಿಂದ ಒಲಿಂಪಿಕ್ಸ್ ನೋಡುವ ಆಸೆ

ಬೆಂಗಳೂರು, ಜು.16: ಅಂತರಿಕ್ಷದಲ್ಲಿ ಭಾರತದ ಕೀರ್ತಿ ಪತಾಕೆ ಹಾರಿಸಿರುವ ಅಮೆರಿಕದ ಭಾರತೀಯ ಸಂಜಾತೆ ಸುನಿತಾ ವಿಲಿಯಮ್ಸ್ ತಮ್ಮ ಹೊಸ ಮನೆ ಅಂತರಿಕ್ಷ ನೌಕೆಯಿಂದ ಲಂಡನ್ ಒಲಿಂಪಿಕ್ಸ್ 2012 ನೋಡಲು ಕಾತುರರಾಗಿದ್ದಾರೆ.

ಬೈಕಾನೂರ್ ನಿಂದ ಅಂತರಿಕ್ಷಕ್ಕೆ ಹಾರಿರುವ ಸುನಿತಾ ತನ್ನ ಹೊಸ ನೆಲೆಯಾದ ರೂಸ್ ವೆಲ್ಟ್ ಮಾಡ್ಯೂಲ್ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ(ಐಎಸ್ ಎಸ್) ತಲುಪಲು ಜುಲೈ 17 ರ ತನಕ ಕಾಯಬೇಕು.

ಐಎಸ್ಎಸ್ ನೌಕೆಯಲ್ಲಿ ಸುಮಾರು 195 ದಿನ ತಂಗಲಿರುವ ಸುನಿತಾ ಅಲ್ಲಿಂದಲೇ ಲಂಡನ್ ಒಲಿಂಪಿಕ್ಸ್ ವೀಕ್ಷಿಸಲು ದಿನಾಂಕ ನಿಗದಿಪಡಿಸಿಕೊಂಡಿದ್ದಾರೆ. ಜು.27ರಂದು ಆರಂಭವಾಗಲಿರುವ ಒಲಿಂಪಿಕ್ಸ್ ವೀಕ್ಷಿಸಲು ಸೂಕ್ತ ಸೌಲಭ್ಯ ಸಿಗುವ ನಿರೀಕ್ಷೆ ಹೊಂದಿದ್ದಾರೆ.

"I'm looking at some type of relay maybe or something like that. So I think we're going to have some competitions up there. We'll see what happens," ಎಂದು ಸುನಿತಾ ಹೇಳಿದ್ದಾರೆ.

ನ.12ಕ್ಕೆ ಹಿಂತಿರುಗಲಿರುವ ಸುನಿತಾ ಅವರು ನ.6ರಂದು ಅಮೆರಿಕ ಅಧ್ಯಕ್ಷೀಯ ಚುನಾವಣೆಗೆ ಮತದಾನ ಮಾಡುವ ಮೂಲಕ ಮತ್ತೊಂದು ವಿಕ್ರಮ ಸಾಧಿಸಲಿದ್ದಾರೆ. ಎಕ್ಸ್ ಪೆಡಿಷನ್ 32 ಎಂಬ ಹೆಸರಿನಲ್ಲಿ ಯಾತ್ರೆ ಕೈಗೊಂಡಿರುವ ಸುನಿತಾ ಜೊತೆ ರಷ್ಯಾದ ಯುರಿ ಮಲೆಂಚೆಂಕೊ, ಜಪಾನಿನ ಅಕಿಹಿಕೊ ಹೊಶಿದೆ ಕೂಡಾ ಇದ್ದಾರೆ. ರಷ್ಯಾ ನಿರ್ಮಿತ ಸೋಯುಜ್ ಟಿಎಂಎ-05ಎಎಂ ಬಾಹ್ಯಾಕಾಶ ನೌಕೆ ಬಳಸಲಾಗಿದೆ.

ಕಳೆದ ಬಾರಿ ತಮ್ಮ ಜೊತೆ ಗಣೇಶ ದೇವರ ಚಿತ್ರವನ್ನು ಸುನಿತಾ ಕೊಂಡೊಯ್ದಿದ್ದರು. ಈ ಬಾರಿ ಈ ಬಗ್ಗೆ ಯಾವುದೇ ಮಾಹಿತಿ ಸಿಕ್ಕಿಲ್ಲ. ಈ ತಂಡ ಪ್ರಕೃತಿ ವಿಕೋಪ ಮುನ್ಸೂಚನೆ, ಜೀವ ವೈವಿಧ್ಯ, ಹವಾಮಾನ ಮಾಹಿತಿಯ ಬಗ್ಗೆ ಸಂಶೋಧನೆ ನಡೆಸಲಿದೆ. ಕಳೆದ ಬಾರಿ ಸುನಿತಾರ ಆರೋಗ್ಯದಲ್ಲಿ ಕೊಂಚ ಏರುಪೇರಾಗಿತ್ತು. ಆದರೆ, ಈ ಬಾರಿ ಹೆಚ್ಚಿನ ಮುತುವರ್ಜಿ ವಹಿಸಲಾಗಿದೆ.

ಅಮೆರಿಕದ ನೌಕಾದಳದಲ್ಲಿ ಅಧಿಕಾರಿ ಹಾಗೂ ನಾಸಾದಲ್ಲಿ ಗಗನಯಾತ್ರಿಯಾಗಿರುವ ಸುನಿತಾ ಅವರನ್ನು ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಏರ್ಪಡಿಸಿದ್ದ ಎಕ್ಸ್‌ಪೆಡಿಷನ್ 14ರ ಯಾನದಲ್ಲಿಯ ಗಗನ ಯಾತ್ರಿಗಳಲ್ಲಿ ಒಬ್ಬರನ್ನಾಗಿ ಆಯ್ಕೆ ಮಾಡಲಾಗಿತ್ತು.

ನಂತರ ಎಕ್ಪ್‌ಪೆಡಿಷನ್ 15ರಲ್ಲೂ ಕೂಡ ಅವರನ್ನು ಬಳಸಿಕೊಳ್ಳಲಾಯ್ತು. ಅವರು ಅತಿ ಹೆಚ್ಚು ದಿನ (195 ದಿನ) ಬಾಹ್ಯಾಕಾಶ ನೌಕೆಯಲ್ಲಿ ಕಾಲ ಕಳೆದ ಮಹಿಳೆ ಎಂಬ ದಾಖಲೆಯನ್ನು ಹೊಂದಿದ್ದಾರೆ. ನಾಸಾದ ಸಾರ್ವಜನಿಕ ವಕ್ತಾರೆಯಾಗಿರುವ ಇವರನ್ನು ಕೊಲ್‌ಬರ್ಟ್ ರಿಪೋರ್ಟ್ ಕಿರುತೆರೆ ಕಾರ್ಯಕ್ರಮದಲ್ಲಿ ISSನ Node 3ಗೆ ಸೂಚಿಸಲಾದ ಹೆಸರನ್ನು ಬಿತ್ತರಿಸಲು ಆಯ್ಕೆ ಮಾಡಲಾಗಿತ್ತು.

ಡಾ.ದೀಪಕ್ ಪಾಂಡ್ಯಾ ಮತ್ತು ಬೋನಿ ಪಾಂಡ್ಯಾ ಅವರ ಮಗಳಾಗಿ ಸುನಿತಾ ಒಹಾಯೋದಲ್ಲಿರುವ ಯುಕ್ಲಿಡ್‌ನಲ್ಲಿ ಹುಟ್ಟಿದರು. ದೀಪಕ್ ಪಾಂಡ್ಯಾ ಭಾರತದ ಗುಜರಾತ್ ಮೂಲದವರಾಗಿದ್ದು ಅವರ ಪೂರ್ವಜರು ಇನ್ನೂ ಭಾರತದಲ್ಲಿ ನೆಲೆಸಿದ್ದಾರೆ. 2007ರಲ್ಲಿ ಸುನಿತಾ ಕೂಡಾ ತಮ್ಮ ಪೂರ್ವಜರ ಹಳ್ಳಿಯಾದ ಗುಜರಾತ್‌ನ ಜುಲಾಸನ್‌ಗೆ ಭೇಟಿ ನೀಡಿದ್ದರು. ತಾಯಿಯ ಕಡೆಯಿಂದ ವಿಲಿಯಮ್ಸ್ ಸ್ಲೋವಿನ್ ಮೂಲದವರಾಗಿದ್ದಾರೆ.

English summary

Sunita Williams is is looking forward to have relay saervice to watch Lon Olympics 2012 from her current home the International Space Station. Sunita is all excited about watching the London Olympics from the space. Sunita may also vote for US election from Space.