ಸ್ವಿಸ್ ಖಾತೆದಾರರ ಹೆಸರು ಗುಪ್ತ, ತೆರಿಗೆ ಮಾತ್ರ ಚುಕ್ತಾ

ನವದೆಹಲಿ, ಮಾ.27: ಸ್ವಿಸ್‌ ಬ್ಯಾಂಕ್‌ನಲ್ಲಿ ಖಾತೆವುಳ್ಳ ಭಾರತೀಯ ಮೂಲದ ವ್ಯಕ್ತಿಗಳು 180 ಕೋಟಿ ರು. ತೆರಿಗೆ ಪಾವತಿಸಿದ್ದಾರೆ ಎಂದು ಆರ್ಥಿಕ ಸಚಿವ ಪ್ರಣಬ್‌ ಮುಖರ್ಜಿ ಸಂಸತ್ತಿನಲ್ಲಿ ಹೇಳಿದ್ದಾರೆ. ಆದರೆ, ತೆರಿಗೆ ಕಟ್ಟಿದವರು ಯಾರು? ಖಾತೆ ಹೊಂದಿರುವವರ ವಿವರಗಳು ಮಾತ್ರ ಬಹಿರಂಗ ಪಡಿಸಲಿಲ್ಲ.

ಕಪ್ಪು ಹಣದ ಮಾಹಿತಿ ಕುರಿತು ಲೋಕಸಭಾ ಅಧಿವೇಶನದಲ್ಲಿ ಕೇಳಲಾದ ಪ್ರಶ್ನೆಗೆ ಲಿಖಿತ ಉತ್ತರ ಮೂಲಕ ಹೇಳಿಕೆ ನೀಡಿದ ಪ್ರಣಬ್ ಮುಖರ್ಜಿ ಹೆಚ್ಚಿನ ವಿಷಯವನ್ನು ನೀಡಲಿಲ್ಲ.

ಸರ್ಕಾರವು ದ್ವಿತೆರಿಗೆ ತಡೆ ಒಡಂಬಡಿಕೆ ಅಡಿ(Double Taxation Avoidance Convention)ಯಲ್ಲಿ ಫ್ರಾನ್ಸ್‌ ಮತ್ತು ಜರ್ಮನ್‌ ದೇಶಗಳಿಂದ ಮಾಹಿತಿಯನ್ನು ಪಡೆದುಕೊಂಡಿದೆ ಎಂದು ಮುಖರ್ಜಿ ಹೇಳಿದರು.

ತೆರಿಗೆ ಪ್ರಕ್ರಿಯೆ ಪೂರ್ಣಗೊಂಡ ನಂತರ ಅವರಿಗೆ ದಂಡ ವಿಧಿಸುವುದರ ಜೊತೆಗೆ ಪ್ರಾಸಿಕ್ಯೂಶನ್‌ ಅವರ ಮೇಲೆ ಕ್ರಮ ಕೈಗೊಳ್ಳಲಿದೆ ಎಂದು ತಿಳಿಸಿದ ಸಚಿವರು ಒಟ್ಟು 18 ಪ್ರತ್ಯೇಕ ಪ್ರಕರಣಗಳ ವಿರುದ್ಧ ತೆರಿಗೆ ವಿಧಿಸಲಾಗಿದೆ ಎಂದು ಮುಖರ್ಜಿ ಹೇಳಿದರು.(ಪಿಟಿಐ)

English summary

Some persons with accounts in a Swiss bank have paid taxes amounting to about Rs 180 crore so far, Finance Minister Pranab Mukherjee has said in Parliament. He did not disclose any name.