85 ಲಕ್ಷ ಮಂದಿ ನೌಕರರಿಗೆ ಸಿಹಿ ಸುದ್ದಿ

ನವದೆಹಲಿ, ಫೆ. 22: ಹೌದು ದೇಶದ ಖಾಸಗಿ ಮತ್ತು ಸರಕಾರಿ ಕಚೇರಿಗಳಲ್ಲಿ ದುಡಿಯುತ್ತಿರುವ 85 ಲಕ್ಷ ಮಂದಿ ನೌಕರರಿಗೆ ಇನ್ನು ಮುಂದೆ ಐಟಿ ರಗಳೆ ಇಲ್ಲ. ವಾರ್ಷಿಕವಾಗಿ ರೂ. 5 ಲಕ್ಷ ಆದಾಯ ಹೊಂದಿರುವ ನೌಕರರು ಈ ವರ್ಷದಿಂದ ಆದಾಯ ತೆರಿಗೆ ರಿಟರ್ನ್ ಸಲ್ಲಿಸುವ ಅಗತ್ಯವಿಲ್ಲ ಎಂದು ಹಣಕಾಸು ಸಚಿವಾಲಯದ ಅಧಿಸೂಚನೆಯೊಂದು ತಿಳಿಸಿದೆ. ಈ ಮಧ್ಯೆ, ತೆರಿಗೆ ವಿನಾಯಿತಿ ಮಿತಿಯನ್ನು ಈಗಿನ 1.80 ಲಕ್ಷ ರೂ.ಗಳಿಂದ 2 ಲಕ್ಷ ರೂ. ಗೆ ಹೆಚ್ಚಿಸುವ ಪ್ರಸ್ತಾಪವಿದೆ.

ಇದುವರೆಗೂ ಆದಾಯ ತೆರಿಗೆ ಕಾಯಿದೆ 1961ರ ಅನುಸಾರ ಎಲ್ಲ ಉದ್ಯೋಗಿಗಳು ಆದಾಯ ತೆರಿಗೆ ಕಟ್ಟುವುದು ಕಡ್ಡಾಯವಾಗಿತ್ತು. 1.80 ಯಿಂದ 5 ಲಕ್ಷ ರುಪಾಯಿ ಸಂಬಳ ಪಡೆಯುವವರು ಶೇ. 10ರಷ್ಟು ಆದಾಯ ತೆರಿಗೆ ಪಾವತಿಸುತ್ತಿದ್ದಾರೆ.

ಈ ಸಂಬಂಧ, ವಾರ್ಷಿಕವಾಗಿ 5 ಲಕ್ಷ ರೂ. ಆದಾಯ ಹೊಂದಿರುವ ನೌಕರರು ಈ ವರ್ಷದಿಂದ ಆದಾಯ ತೆರಿಗೆ ರಿಟರ್ನ್ ಸಲ್ಲಿಸುವ ಅಗತ್ಯವಿಲ್ಲ ಎಂದು ಹಣಕಾಸು ಸಚಿವಾಲಯ ಮಂಗಳವಾರ ಅಧಿಸೂಚನೆ ಹೊರಡಿಸಿದೆ. ದೇಶದಲ್ಲಿ 85 ಲಕ್ಷ ವೇತನ ಪಡೆಯುವ ನೌಕರರಿದ್ದು, ಅವರ ಆದಾಯದ ಮಿತಿ ವಾರ್ಷಿಕ 5 ಲಕ್ಷ ರೂ. ಗಿಂತಲೂ ಹೆಚ್ಚಿಲ್ಲ ಎಂದು ಅದು ಹೇಳಿದೆ.

ವಾರ್ಷಿಕ 5 ಲಕ್ಷ ರೂ. ಒಟ್ಟು ಆದಾಯ ಹೊಂದುವ ವ್ಯಕ್ತಿ ಅಥವಾ ವೇತನ ಪಡೆಯುವ ನೌಕಕರು ಹಾಗು ಫಿಕ್ಸೆಡ್ ಡೆಪಾಸಿಟ್ ಮತ್ತಿತರ ಖಾತೆಗಳ ಮೂಲಕ 10000 ರೂ. ಬಡ್ಡಿ ಪಡೆಯುವ ವ್ಯಕ್ತಿಗಳು 2012-13ನೆ ಹಣಕಾಸು ವರ್ಷದಿಂದ ಆದಾಯ ತೆರಿಗೆ ಕಟ್ಟುವ ಅಗತ್ಯವಿಲ್ಲ. ತಮ್ಮ ಮೇಲಧಿಕಾರಿಯಿಂದ ತೆರಿಗೆ ಕಡಿತ ಗೊಳಿಸುವ ಫಾರ್ಮ್ 16ರ ಪ್ರಮಾಣ ಪತ್ರವನ್ನು ಪಡೆದಿರುವ ವ್ಯಕ್ತಿಗಳಿಗೆ ಮಾತ್ರ ತೆರಿಗೆ ಪಾವತಿಯ ವಿನಾಯಿತಿಗೆ ಅನುಮತಿ ನೀಡಲಾಗುವುದು ಎಂದು ಅಧಿಸೂಚನೆಯಲ್ಲಿ ತಿಳಿಸಲಾಗಿದೆ.

English summary

Salaried employees earning up to Rs. 5 lakh a year will not be required to file income tax returns from this year, says a Finance Ministry notification. Exemption from filing will be permitted only if the person has received a certificate of tax deduction in Form 16 from his or her employer. In the mean while there is a propossl to raise the tax exemption limit to Rs. 2 lakh from Rs. 1.80 lakh.