ಶ್ರೀರಾಮುಲು 'ಸೀಲಿಂಗ್ ಫ್ಯಾನ್'ಗೆ ಜೋತುಬಿದ್ದಿದ್ದು ಹೇಗೆ, ಏಕೆ?

ಬಳ್ಳಾರಿ, ನ.17: ಬಳ್ಳಾರಿ ಗ್ರಾಮಾಂತರ ವಿಧಾನಸಭಾ ಕ್ಷೇತ್ರದ (ಪರಿಶಿಷ್ಟ ಪಂಗಡ ಮೀಸಲು) ಉಪ ಚುನಾವಣೆ ಕಣ ರಂಗೇರುತ್ತಿದೆ. ಸ್ವತಂತ್ರ ಅಭ್ಯರ್ಥಿ, ಮೈನಿಂಗ್ ದೊರೆ ಜನಾರ್ದನ ರೆಡ್ಡಿಯ ನಂಬಿಗಸ್ಥ ದೊರೆ ಬಿ. ಶ್ರೀರಾಮುಲುಗೆ ಚುನಾವಣೆ ಆಯೋಗ 'ಸೀಲಿಂಗ್ ಫ್ಯಾನ್' ಚಿಹ್ನೆ ದಯಪಾಲಿಸಿದೆ.

ವಾಸ್ತವವಾಗಿ, ಶ್ರೀರಾಮುಲು ನಿಯಮದಂತೆ ಮೂರು ಚಿಹ್ನೆಗಳನ್ನು ಸೂಚಿಸಿದ್ದರು. ಈಗ ಲಭ್ಯವಾಗಿರುವ ಸೀಲಿಂಗ್ ಫ್ಯಾನ್ ಜತೆಗೆ ಗ್ಯಾಸ್ ಸಿಲಿಂಡರ್ ಮತ್ತು ಟೆಲಿವಿಶನ್ ಸೆಟ್ ಸಹ ಇತ್ತು. ಆದರೆ ಶ್ರೀರಾಮುಲುಗೆ 'ಸೀಲಿಂಗ್ ಫ್ಯಾನ್' ಮೇಲೆ ಹೆಚ್ಚು ಒಲವು ಇತ್ತು. ಅದಕ್ಕೆ ಕಾರಣವೂ ಇಲ್ಲದಿಲ್ಲ. ಏನಪಾ ಅಂದರೆ...

ರೆಡ್ಡಿ ಕುಟುಂಬದ ಮತ್ತೊಬ್ಬ ಸಮೀಪವರ್ತಿ, ನೆರೆಯ ಆಂಧ್ರದ ವೈಎಸ್ ಜಗನ್ ಮೋಹನ್ ರೆಡ್ಡಿ ಕಾಂಗ್ರೆಸ್ ವಿರುದ್ಧ ಸಿಡಿದೆದ್ದು ಕಳೆದ ಏಪ್ರಿಲ್ ನಲ್ಲಿ YSR Congress ಪಕ್ಷ ಹುಟ್ಟುಹಾಕಿದಾಗ ಅವರಿಗೂ ಸಹ ಇದೇ 'ಸೀಲಿಂಗ್ ಫ್ಯಾನ್' ಚಿಹ್ನೆ ದಯಪಾಲಿಸಲಾಗಿತ್ತು. ಹೀಗಾಗಿ, ರೆಡ್ಡಿ-ಜಗನ್ ಕುಟುಂಬಗಳೆರಡೂ ವ್ಯಾಪಾರ ವಹಿವಾಟು ವಗೈರೆಗಳಲ್ಲಿ ಒಂದಾಗಿರುವಾಗ ರಾಜಕೀಯದಲ್ಲೂ ಒಂದಾಗಿರೋಣ ಎಂದೆಣೆಸಿ, 'ಸೀಲಿಂಗ್ ಫ್ಯಾನ್' ಗೇ ಜೋತುಬಿದ್ದಿದ್ದಾರೆ.

'ಸೀಲಿಂಗ್ ಫ್ಯಾನ್' ದಕ್ಷಿಣ ಭಾರತದಲ್ಲಿ ಬಿರುಗಾಳಿ ಎಬ್ಬಿಸುತ್ತದಾ?: ಶ್ರೀರಾಮುಲು ಹೀಗೆ ಸೀಲಿಂಗ್ ಫ್ಯಾನ್ ಗೆ ಜೋತುಬಿದ್ದಿರುವ ಸಂದರ್ಭದಲ್ಲಿ 'ನಮ್ಮಣ್ಣ ಜೈಲಿನಿಂದ ಹೊರಕ್ಕೆ ಬರಲಿ. ಇದೇ 'ಸೀಲಿಂಗ್ ಫ್ಯಾನ್' ನಡಿ ಪ್ರಾದೇಶಿಕ ಪಕ್ಷ ಕಟ್ಟಿ ನಮ್ಮ ತಾಖತ್ತು ಏನು ಎಂಬುದನ್ನು ತೋರಿಸುತ್ತೇವೆ' ಎಂದು ಗುಡುಗಿದ್ದಾರೆ.

ರೆಡ್ಡಿ-ಜಗನ್ ಸಂಗಮದಲ್ಲಿ 'ಸೀಲಿಂಗ್ ಫ್ಯಾನ್' ಪಾರ್ಟಿ ದಕ್ಷಿಣ ಭಾರತದಲ್ಲಿ ರಾಜಕೀಯ ಬಿರುಗಾಳಿ ಎಬ್ಬಿಸುತ್ತದಾ? ಕಾಲಾಯತಸ್ಮೈನಮಃ!

English summary

The allotment of the ceiling fan symbol to Independent candidate and G. Janardhan Reddy’s lieutenant Sreeramulu in the bypoll for Bellary (ST) assembly constituency may go a long way in the politics of neighbouring states of Karnataka and Andhra Pradesh where the same symbol was allotted to YSR Congress party, led by Kadapa MP Y.S. Jagan Mohan Reddy.