ಮುಂಬೈ ಸ್ಫೋಟ ತನಿಖೆಗೆ FBI ನೆರವು : ಬಿಪಿನ್‌

ಮುಂಬೈ, ಜುಲೈ 19: ಮುಂಬೈ ತ್ರಿವಳಿ ಸ್ಫೋಟಕ್ಕೂ ಕರ್ನಾಟಕಕ್ಕೂ ನಂಟು ಜೋರಾಗಿಯೇ ಬೆಸೆಯುತ್ತಿದೆ. ಸ್ಫೋಟದಲ್ಲಿ ಮಂಗಳೂರು ಮೂಲದ ಪಾತಕಿಗಳು ಭಾಗಿಯಾಗಿದ್ದಾರೆ ಎಂಬ ಸುಳಿವು ದೊರೆತದ್ದೇ ತಡ ಆಂತರಿಕ ಭದ್ರತೆ ವಿಭಾಗದ ಹೆಚ್ಚುವರಿ ಪೊಲೀಸ್‌ ಮಹಾನಿರ್ದೇಶಕ ಬಿಪಿನ್‌ ಗೋಪಾಲಕೃಷ್ಣ ಎದ್ದು ಕುಳಿತಿದ್ದಾರೆ.

ಬೆಂಗಳೂರಿನ ಪರಪ್ಪನ ಅಗ್ರಹಾರ ಜೈಲಿನಲ್ಲಿ ಐವರನ್ನು ಮುಂಬೈ ಎಟಿಎಸ್ ಪೊಲೀಸರು ವಿಚಾರಣೆ ನಡೆಸಿದ್ದಾರೆ ಎಂಬುದು ತಮ್ಮ ಗಮನಕ್ಕೆ ಬರುತ್ತಿದ್ದಂತೆ ವಿಶೇಷ ಪೊಲೀಸ್‌ ತಂಡ ರಚಿಸಿಕೊಂಡು ಸೋಮವಾರ ಮುಂಬೈಗೂ ಹೊರಟಿದ್ದಾರೆ.

ಈ ಮಧ್ಯೆ, ತ್ರಿವಳಿ ಸ್ಫೋಟದ ಸಂಬಂಧ ಅಮೆರಿಕದ ಎಫ್ ಬಿಐ ನೆರವು ಕೋರಿರುವುದಾಗಿಯೂ ತಿಳಿದುಬಂದಿದೆ. ಸ್ಫೋಟದಲ್ಲಿ ಬಳಸಿರುವ ವಸ್ತುಗಳ ಬಗ್ಗೆ ಹೆಚ್ಚಿನ ಬೆಳಕು ಚೆಲ್ಲಲು FBI ತಂಡವೊಂದು ( US Federal Bureau of Investigation) ಈಗಾಗಲೇ ಮುಂಬೈನತ್ತ ಮುಖಮಾಡಿದೆ.

ಮಂಗಳೂರು ಪೊಲೀಸ್‌ ಮಹಾನಿರ್ದೇಶಕರೂ ಆಗಿರುವ ಬಿಪಿನ್ ಅವರನ್ನು ಮಹಾರಾಷ್ಟ್ರ ಭಯೋತ್ಪಾದನೆ ನಿಗ್ರಹ ದಳ (ATS) ಅಧಿಕಾರಿಗಳು ಜುಲೈ 17ರಂದು ಮಾತುಕತೆ ನಡೆಸಿದ ವೇಳೆ FBI ನೆರವು ಯಾಚಿಸುವ ಬಗ್ಗೆ ತೀರ್ಮಾನಿಸಲಾಯಿತು ಎಂದು ಉನ್ನತ ಮೂಲಗಳು ಹೇಳಿವೆ.

ಈ ಮಧ್ಯೆ, FBI ತಂಡ ತನಿಖೆಗೆ ನೆರವು ನೀಡಲು ಸಿದ್ಧವಿರುವುದಾಗಿ ತಿಳಿಸಿದೆ. ಸ್ಫೋಟದಲ್ಲಿ ಬಳಸಿರುವ ವಸ್ತುಗಳು ಎಂಥವು ಎಂಬುದು ಸ್ಪಷ್ಟವಾಗುತ್ತಿದ್ದಂತೆ ಅಂಥ ವಸ್ತುಗಳನ್ನು ಬಳಸುವ ಪಾತಕಿಗಳನ್ನು ಪತ್ತೆ ಹಚ್ಚುವುದು ಸುಲಭವಾದೀತು ಎಂಬುದು ಇದರ ಲೆಕ್ಕಾಚಾರವಾಗಿದೆ.

English summary

A team led by Karnataka ADGP Bipin Gopal Krishna, who is also in-charge of internal security, have sought help from the US Federal Bureau of Investigation (FBI) in finding the composition of materials used in executing the recent Mumbai blasts.